Саалтыр 76 - Сибэтиэй Биибилийэ кинигэлэрэ

¹ Хуор салайааччытыгар Идифумҥа. Асаф псалома.

² Куолаһым муҥунан Айыы Таҥараны ыҥырабын; Таҥара миигин иһиттин диэн, куолаһым муҥунан Кинини ыҥырабын.

³ Күчүмэҕэй күммэр Айыы Тойону көрдүүбүн; түүнү быһа, түһэрбэккэ, икки илиибин Киниэхэ уунабын; мин дууһам уоскулаҥы ылыммат.

⁴ Таҥараны санаатым да, мин энэлийэн барабын, толкуйга түстүм да, тыыным-быарым ыгыллар. Села

⁵ Эн миигин харахпын симнэрэ түспэккин; аһара аймаһыйан, саҥарар да кыаҕым суох.

⁶ Өрдөөҥҥү күннэри эргитэ саныыбын, ааспыт сыллары ахтабын.

⁷ Түүнүн ырыаларбын өйдөөн кэлэбин, сүрэхпин кытта сэһэргэһэбин; мин кутум-сүрүм барытын сыныйан көрөр:

⁸ Ама Айыы Тойон, бүтэһиктээхтик аккаастанан, аны биһиэхэ үтүөтүк сыһыаннаһыа суоҕа дуо?

⁹ Ама Кини, бигэ таптала букатын уларыйан, аны биһиэхэ эрэннэрбитин толоруо суоҕа дуо?

¹⁰ Ама Айыы Таҥара аһынарын умнан, аһара абаран, аны биһигини аһыныа суоҕа дуо? Села

¹¹ Итиэннэ эппитим: «Мин аһыйарым-кутуйарым баар – Үрдүктэн Үрдүк аны уҥа илиитин биһиэхэ утары ууммат».

¹² Айыы Тойон дьайыыларын мин ахта саныам; Эн былыр көрдөрбүт дьиктилэргин өйдөөн кэлиэм.

¹³ Эн тугу оҥорбуккун барытын иҥэн-тоҥон көрүөм, Эн улуу дьайыыларгын мин анаарыам.

¹⁴ Айыы Таҥара, Эн суолуҥ сибэтиэй. Хайа таҥара биһиги Таҥарабыт курдук улуу буолуой!

¹⁵ Эн эҥин дьиктини оҥорор Таҥараҕын; норуоттарга Эн сүҥкэн күүскүн көрдөрбүтүҥ.

¹⁶ Эн Бэйэҥ норуоккун, Иаковтаах Иосиф уолаттарын, күүстээх илиигинэн өрүһүйбүтүҥ. Села

¹⁷ Улуу байҕаллар Эйигин көрөн, Айыы Таҥара, улуу байҕаллар Эйигин көрөн, уолуйаллара; түгэҕэ биллибэт далайдар өрө дьалкыйаллара.

¹⁸ Былыттар ууларын тоҕо туталлара, халлаантан этиҥ этэн ньириһитэрэ, тула Эн охторуҥ күлүмнүү көтөллөрө.

¹⁹ Эн сүллэр этиҥиҥ ньиргиэрэ халлааны биир гына лүһүгүрүү эргийэрэ, чаҕылҕаныҥ аан дойдуну сандаардара, сир, титирэстээн ыла-ыла, өрө дьигиһийэрэ.

²⁰ Эн суолуҥ муоранан ааһара, Эн ыллыгыҥ дириҥ уунан барара, ким да Эн суолгун-иискин көрбөт этэ.

²¹ Эн норуоккун, бараан үөрүн илдьэ иһэрдии, Моисейдаах Аарон илиитинэн сирдиириҥ.