Саалтыр 75 - Сибэтиэй Биибилийэ кинигэлэрэ

¹ Хуор салайааччытыгар. Устурууналаах инструмент доҕуһуолунан. Асаф псалома. Ырыа.

² Иудеяҕа Таҥараны билэллэр; Кини аата Израильга – сүдү аат.

³ Иерусалимҥа баар Кини олоҕо, Сиоҥҥа Кини олорор.

⁴ Онно тоһуталаабыта Кини кустук охтору, хары куйаҕын, кылыһы, сэрии сэбин-сэбиргэлин. Села

⁵ Эн кэрэмэн килбиэннээххин, мэҥэ хайалардааҕар сүҥкэҥҥин.

⁶ Харса суох буойуннар халаабыт булумньуларын былдьаппыттар, уһуктубат уһун ууларын кинилэр утуйбуттар: аны бу эрэттэр илиилэрин да өндөппөттөр.

⁷ Эн буойуоҥ эрэ кэрэх, Иаков Таҥарата, – аттар таалбыттар, колесницалар тохтообуттар.

⁸ Оо, дьулааҥнын даҕаны Эн! Ким Эн уордайар кэмҥэр иннигэр кэлэн туруоҕай?

^9-10 Дьүүл буоларын Эн халлааннартан биллэрдиҥ; сир бары баттаммыттарын быыһыырдыы, Таҥара буруйдаахтары дьүүллүү турбутугар, сир үрдэ дьулайан ах барда. Села

¹¹ Бэл дьон уоҕа-кылына Эйиэхэ албан ааты эргитиэҕэ: сэрииттэн ордубут өстөөх кытта Эн дьоро күннэргин бэлиэтиэҕэ.

¹² Мэктиэ тылгытын биэриҥ Айыы Тойон Таҥараҕытыгар, Киниэхэ эрэннэрбиккитин толоруҥ; тулатыгар бааллар бука бары Киниэхэ, Дьулааҥҥа, бэлэхтэрин аҕаллыннар.

¹³ Кини киэмсик кинээстэри сыһыталыыр, сир ыраахтааҕыларын салыннартыыр.