Саалтыр 72 - Сибэтиэй Биибилийэ кинигэлэрэ

III КИНИГЭТЭ 72–88 псаломнар

1 Асаф псалома.

¹ Асаф псалома. Чахчы даҕаны Таҥара үтүө сыһыаннаах Израильга, ыраас сүрэхтээхтэргэ!

² Оттон мин бүдүрүйэн иһэн өрүһүннүм, халтарыйан иһэн быыһанным:

³ нэгэй дьон баай-талым олоҕун көрөммүн, улуутумсуктары ордугургуу санаатым.

⁴ Кинилэр өлүөхтэригэр да диэри эрэйи билбэттэр, үскэл-ньүөл бэйэлээхтэр;

⁵ дьон ыарахан үлэтигэр кинилэр суохтар, атыттары кытта очурга охсуллубаттар.

⁶ Ол иһин улахамсык санаа оҕуруоламмыттар, баламат быһыы таҥастаммыттар.

⁷ Аһара уойаннар, харахтара бүтэйбит, мэник санаа сүрэхтэригэр көччүйбүт.

⁸ Тугу барытын күлэллэр, кырыктаахтык тыллаһаллар, улаханнык сананан, суоһурҕаналлар.

⁹ Уостара халлааҥҥа тиийэ уһаабыт, тыллара сири-дойдуну дархаһыйа кэрийбит.

¹⁰ Ол иһин бэл Таҥара норуота кинилэри батыһар, тугу куппуттарын толору сомсон иһэр.

¹¹ «Таҥара хайдах билиэҕэй, Үрдүктэн Үрдүк билэр үһү дуо?» – дииллэр нэгэйдэр.

¹² Итинниктэр хара саҥнаахтар: бу үйэҕэ барҕараллар, баайдарын-дуолларын хаҥаталлар.

¹³ Ама халтайга мин ыраас сүрэхтэнэргэ таласпытым, аньыыта-буруйа суох буоларга дьулуспутум,

¹⁴ халтайга хас күн аайы охсуллубутум, хас сарсыарда аайы дьарыллыбытым буолуо дуо?

¹⁵ Ол эрэн: «Кинилэр курдук тыллаһыам», – диэбитим буоллар, Эн норуотуҥ иннигэр буруйдаах тахсыах эбиппин.

¹⁶ Хайдах итини өйдүүбүн дии саныырым, итини ыпсарары ыарырҕата көрөрүм.

¹⁷ Дьэ онтон, Таҥара Дьиэтигэр киирэн тураммын, мин өйдөөбүтүм кинилэр муҥур уһуктарын.

¹⁸ Чахчы даҕаны Эн кинилэри халтараан суолга туруорбуккун, түгэҕэ биллибэт далайга түһэртиир эбиккин.

¹⁹ Хайдах курдук эмискэ имнэри эһиннилэр, хайдах курдук уолуйан, суола суох сүттүлэр!

²⁰ Киһи уһуктан баран түүлүн умнарыныы, Айыы Тойон, Эн тураат да, кинилэр мөссүөннэрин умнуоҕуҥ.

²¹ Мин сүрэҕим умайар-оргуйар, дууһам муунтуйар кэмигэр,

²² тугу да өйдөөбөт ньүдьү-балай этим, сүөһү кэриэтэ этим Эн иннигэр.

²³ Ол да буоллар, мин өрүү Эйигинниин бииргэбин – Эн миигин уҥа илиибиттэн сиэтэҕин,

²⁴ сүбэлээн-амалаан сирдиигин; кэнэҕэһин да Эн миигин кэрэмэн килбиэҥҥэ киллэриэҕиҥ.

²⁵ Ким миэхэ баарый халлааҥҥа Эйигиттэн ураты? Эйигин кытта сылдьан, сиргэ даҕаны тугу да баҕарбаппын.

²⁶ Төһө да этим-хааным, сүрэҕим мөлтөөбүтүн иһин, Таҥара миэхэ сүрэҕим бигэ кириэппэһинэн, үйэлэр тухары мин аналбынан хаалыаҕа.

²⁷ Дьиҥ чахчы, Эйигиттэн ыраатааччылар өлөллөр; Эйигиттэн тэйээччилэри Эн имири эһэҕин.

²⁸ Оттон миэхэ үчүгэй да буоллаҕа Таҥараҕа чугаһыырым! Эн бары дьайыыгын иһитиннэрээри, Айыы Тойон Таҥараҕа мин эрэнним.