Саалтыр 71 - Сибэтиэй Биибилийэ кинигэлэрэ

1 Соломон псалома.

¹ Соломон псалома. Айыы Таҥара, ыраахтааҕыны үөрэт көнөтүк дьүүллүүргэ, ыраахтааҕы уолун – кырдьыктаах буоларга.

² Кини Эн дьоҥҥун көнөтүк дьүүллүөхтүн, Эн дьадаҥыларгын кырдьыгынан көрүөхтүн.

³ Хайалар дьоҥҥо или-эйэни аҕаллыннар, томтордор – кырдьыгы.

⁴ Кини норуот дьадаҥыларын көмүскээтин, кыһалҕалаахтары быыһаатын, кыһарыйааччыны сыһыттын.

⁵ Оччоҕо кинилэр көлүөнэттэн көлүөнэҕэ, Айыы Таҥара, ый-күн баарын тухары Эйигиттэн толлуохтара.

⁶ Ыраахтааҕы охсуллар ходуһаҕа түһэр самыырга, сир үрдүн ньүөлсүтэр ардахха холоонноох буолуоҕа.

⁷ Кини кэмигэр кырдьыксыт туругуруоҕа, ый сырдатарын тухары ил-эйэ чэчирии туруоҕа.

⁸ Кини саарыстыбата муораттан муораҕа тиийиэҕэ, Евфрат өрүстэн сир уһугар диэри тэнийиэҕэ.

⁹ Кураайы дуол олохтоохторо кини иннигэр сөһүргэстиэхтэрэ, кини өстөөхтөрө сири-буору салыахтара.

¹⁰ Фарсис уонна муора арыыларын ыраахтааҕылара киниэхэ түһээн төлүөхтэрэ; Аравия уонна Сава ыраахтааҕылара бэлэхтэрин илдьэ кэлиэхтэрэ.

¹¹ Бары ыраахтааҕылар киниэхэ сүгүрүйүөхтэрэ, бары норуоттар киниэхэ үлэлиэхтэрэ.

¹² Кини көмө көрдүүр кыһалҕалаахтары, дьадаҥыны, хантан да көмө кэлбэт киһитин өрүһүйүөҕэ;

¹³ мөлтөҕү, баттаммыты-үктэммити аһыныаҕа, кыһалҕалаахтар олохторун быыһыаҕа;

¹⁴ хара батталтан, үтүргэнтэн дууһаларын толуйуоҕа; кинилэр хааннара кини хараҕар улахаҥҥа туруоҕа.

¹⁵ Туругурдун ыраахтааҕы! Киниэхэ Аравия кыһыл көмүһүттэн биэриэхтэрэ; кини туһугар өрүү үҥүөхтэрэ, кинини күннэтэ алгыахтара.

¹⁶ Бурдук, сиргэ өлгөмнүк үүнэн, хайа үрдүгэр долгуйа хамсыаҕа, үүнүүтэ Ливаҥҥа курдук, үрдүк буолуоҕа. Куораттарын дьоно, төрөөн-үөскээн, хонуу отунуу хойдуоҕа.

¹⁷ Ыраахтааҕы аата-суола үйэлэргэ барыаҕа, кини албан аата күн үйэтэ үйэлэниэҕэ. Бары норуоттарга кини алгыһы аҕалыаҕа, кинини ким барыта дьоллооҕунан ааттыаҕа.

¹⁸ Алгыс буоллун Айыы Тойоҥҥо, Израиль Таҥаратыгар, эҥин дьиктини оҥорор соҕотох сүдү кыахтаахха.

¹⁹ Алгыс буоллун үйэлэр тухары Кини килбиэннээх аатыгар. Кини кэрэмэн килбиэнэ сир үрдүн толоруохтун. Аминь, аминь.

²⁰ Иессей уолун Давид үҥүүтэ бүттэ.