Саалтыр 65 - Сибэтиэй Биибилийэ кинигэлэрэ

1 Хуор салайааччытыгар. Ырыа. Псалом.

¹ Хуор салайааччытыгар. Ырыа. Псалом. Таҥараны айхаллаа, сир үрдэ бүттүүнэ;

² Кини аата улуутун хоһуйан, эһиги ыллааҥ; уруй-айхал тылларын Киниэхэ анааҥ.

³ Этиҥ Таҥараҕа: «Дьулааннар даҕаны Эн дьайыыларыҥ! Эн сүҥкэн күүстээҕиҥ иһин, өстөөхтөрүҥ Эйиэхэ бэринэллэр.

⁴ Сир бүттүүнэ Эйиэхэ сүгүрүйүөҕэ; Эйигин ырыанан айхаллыахтара, Эн ааккар ыллыахтара!» Села

⁵ Кэлиҥ, көрүҥ Таҥара тугу гыммытын, Кини дьон аймахха оҥорбут дьулаан дьайыыларын:

⁶ Кини муораны кураанах сиргэ кубулуппута; өбүгэлэрбит өрүһү эмиэ оломнообуттара. Онно биһиги Киниттэн үөрэрбит-көтөрбүт.

⁷ Модун кыаҕынан Кини үйэлэр тухары салайар; Кини норуоттары хараҕын далыгар илдьэ сылдьар, онон өрө турааччылар улаханнык санамматыннар. Села

⁸ Алҕааҥ, норуоттар, биһиги Таҥарабытын, Киниэхэ анааҥ эһиги айхал тылларын!

⁹ Кини биһигини тыыннаах хаалларда, биһиги атахпытын халбаҥнаттарбата.

¹⁰ Эн биһигини тургутан көрбүтүҥ, Айыы Таҥара, уулаах үрүҥ көмүһү курдук, уһааран көрбүтүҥ.

¹¹ Эн биһигини илимҥэ иҥиннэрбитиҥ, ыар сүгэһэри биһиэхэ сүктэрбитиҥ;

¹² төбөбүтүгэр көлүөһэлээх аттаахтары көрүлэппитиҥ; ууга-уокка да түһэртээн ылбытыҥ, ол да буоллар, биһигини көҥүлгэ таһаарбытыҥ.

^13-14 Уматар бэримньибин илдьэ, Эн Дьиэҕэр киирэммин, Эйиэхэ эппит мэктиэ тылбын – эриирдээх кэммэр эрэннэрбиппин толоруом.

¹⁵ Эмис сүөһүнү уматан, Эйиэхэ бэлэхтиэм, барааны сиэртибэ биэрэн, буруотун унаардыам; оҕустары, козеллары сиэртибэлиэм. Села

¹⁶ Кэлиҥ, истиҥ эһиги, Таҥараттан куттанааччылар бары, Кини миэхэ тугу оҥорбутун мин сэһэргиэм.

¹⁷ Мин, көмө көрдөһөн, Кинини ыҥырбытым, уруй-айхал тылларын Киниэхэ эппитим.

¹⁸ Аньыыны сүрэхпэр биһиктии сылдьыбытым буоллар, Айыы Тойон миигин истиэ суоҕа этэ.

¹⁹ Ол эрэн Таҥара миигин иһиттэ, мин көрдөһөр саҥабын сэҥээрдэ.

²⁰ Алгыс буоллун – мин үҥэрбиттэн киэр хайыспатах, миигин бигэ тапталыттан матарбатах Айыы Таҥараҕа.