Саалтыр 63 - Сибэтиэй Биибилийэ кинигэлэрэ

¹ Хуор салайааччытыгар. Давид псалома.

² Айыы Таҥара, иһит мин муҥатыйар саҥабын, суостаах өстөөхтөн өрүһүй дууһабын.

³ Саһыар оҕуруктаахтар куомуннарыттан, хара дьайдаахтар өрө турууларыттан,

⁴ тылларын кылыстыы сытыыланааччылартан, сүлүһүннээх тыл оҕунан кыҥааччылартан.

⁵ Буруйа суох киһини ытаары тоһуурга сыталлар, туохтан да куттаммакка соһуччу ыталлар.

⁶ Хара дьайдаахтык быһыыланарга бигэтик туруммуттар; биллибэтинэн угаайы оҥорордуу киксэллэр, «Ким биһигини көрүөҕэй?» – дэһэллэр.

⁷ Уодаһыннаах суолга куомуннаһаллар, «Барытын бэркэ аттардыбыт, бэлэм буолла», – диэн үөрэллэр. Оо, киһи сүрэҕэ, өйө-санаата хараҥа даҕаны!

⁸ Ол эрээри Таҥара кинилэри оҕунан ытыаҕа, оччоҕо эмискэ бааһырыахтара.

⁹ Тылларын иһин кинилэри сууһартыаҕа; көрбүт эрэ барыта, дьулайан, баһын быһа илгистиэҕэ.

¹⁰ Оччоҕо ким барыта саллыаҕа; бары Таҥара дьайыытын кэпсиэхтэрэ, Кини тугу оҥорбутун анаарыахтара.

¹¹ Оттон көнө киһи Айыы Тойонтон үөрүөҕэ, Кинини дурда-хахха туттуоҕа; көнө сүрэхтээх эрэ барыта өрөгөйө үрдүөҕэ.