Саалтыр 60 - Сибэтиэй Биибилийэ кинигэлэрэ

¹ Хуор салайааччытыгар. Устурууналаах инструмент доҕуһуолунан. Давид псалома.

² Айыы Таҥара, иһит мин үөгүлүүр саҥабын, болҕой Эйиэхэ үҥэрбин.

³ Санньыар санааттан сүрэҕим айманан, сир уһугуттан Эйигин ыҥырабын. Оо, сирдээн таһаар дуу миигин үөһэ урут кыайан дабайбатах туруук хайабар;

⁴ Эн буолаҕын эбээт мин суон дурдам, өстөөхтөн быыһанар халыҥ хаххам.

⁵ Эн Дьиэҕэр мин үйэлэр тухары олоруум, Эн кынатыҥ хаххатыгар хорҕойуум. Села

⁶ Айыы Таҥара, мин мэктиэ тылбын Эн иһиттиҥ, Эн ааккыттан толлор дьон нэһилиэстибэтин миэхэ биэрдиҥ.

⁷ Ыраахтааҕы үйэтин уһат; кини олоҕо көлүөнэттэн көлүөнэҕэ салҕаныахтын.

⁸ Үйэлэр тухары кини Таҥара иннигэр сырыттын; Эн бигэ тапталыҥ уонна кырдьыгыҥ кинини араҥаччылыахтыннар.

⁹ Күн аайы мэктиэ тылбын толорон, мин үйэм тухары Эн ааккар ыллыам.