Саалтыр 6 - Сибэтиэй Биибилийэ кинигэлэрэ

¹ Хуор салайааччытыгар. Аҕыс устурууналаах инструмент доҕуһуолунан. Давид псалома.

² Айыы Тойон! Абарбыккын аһардан баран, миигин дьарыйаар, уордайбыккын уҕарытан баран, буруйдаар.

³ Абыраа-аһын, Айыы Тойон, сырам-сылбам быһынна; Айыы Тойон, үтүөрт, уҥуоҕум халыр босхо барда.

⁴ Дууһам миэнэ уолуһуйда; оттон Эн, Айыы Тойон, хаһааҥҥа диэри?

⁵ Төнүн, Айыы Тойон, мин тыыммын өллөйдөө, көмүскэллээх санааҕыттан миигин быыһаа.

⁶ Өлбүттэр аны Эйигин өйдөөбөттөр; үтүгэн түгэҕэр ким Эйигин айхаллыаҕай?

⁷ Өрүтэ тыынарбыттан мин сэниэм эһиннэ; түүн ахсын икки хараҕым уутунан суунабын, сыттыгым, таҥаһым илийиэр диэри ытыыбын.

⁸ Санаарҕааммын, көмүскэм чөҥөрүйэ уолла, бары өстөөхпүттэн ытааммын, көрөрдүүн мөлтөөтүм.

⁹ Киэр тэйиҥ миигиттэн бука бары, кэрээннэрин сүтэрбиттэр; мин ытыыр саҥабын Айыы Тойон иһиттэ.

¹⁰ Айыы Тойон ааттаһарбын иһиттэ; Айыы Тойон мин үҥэрбин ылыныа.

¹¹ Өстөөхтөрүм бары, сир сирэйдэнэн, өлөр кутталга хам ыллардыннар; чугуйан, атахха биллэрэн, чыпчылыйыах иннинэ саакка бардыннар.