Саалтыр 56 - Сибэтиэй Биибилийэ кинигэлэрэ

¹ Хуор салайааччытыгар. «Өлөрүмэ» матыыбынан. Давид, Саултан күрэнэн баран, хайа хаспаҕар саһа сылдьан ыллаабыт ырыата.

² Абыраа миигин, Айыы Таҥара, абыраа миигин; Эйиэхэ дууһам эрэнэр. Аан алдьархай буурҕата намырыар диэри, Эн кынатыҥ күлүгэр мин хорҕойуом.

³ Үрдүктэн Үрдүк Таҥараны мин ыҥырабын, миэхэ үтүөнү оҥорор Таҥараны.

⁴ Кини, халлаантан көмө ыытан, миигин быыһыаҕа, оттон миигин күөмчүлээччилэри саатырдыаҕа. Села Таҥара бигэ тапталын, кырдьыгын ыытыаҕа.

⁵ Мин хахайдар ортолоругар, киһини мэҥиэстээччилэр быыстарыгар баарбын; кинилэр тиистэрэ – үҥүү да ырба, тыллара – кыырыктаах кылыс.

⁶ Халлааннар уҥуордарынан айхаллан, Айыы Таҥара, бүтүн сир үрдүнэн көһүннүн Эн килбиэниҥ.

⁷ Барар суолбар миэхэ угаайы оҥорбуттар, ону көрөн, дууһам санньыйда. Мин иннибэр иин хаспыттар, ол эрэн, онно бэйэлэрэ түстүлэр. Села

⁸ Мин сүрэҕим бэлэм, Айыы Таҥара, мин сүрэҕим бэлэм. Эйигин айхаллаан, мин ырыа ыллыам.

⁹ Уһугун, дууһам миэнэ! Уһуктуҥ, арфа уонна лира! Мин сарыалы уһугуннарыам.

¹⁰ Норуоттар ортолоругар, Айыы Тойон, Эйиэхэ махтаныам, омуктар ортолоругар Эйигин айхаллыам.

¹¹ Эн бигэ тапталыҥ халлааннары аһара барар, Эн кырдьыгыҥ былыттардыын быысаһар.

¹² Халлааннар уҥуордарынан айхаллан, Айыы Таҥара, бүтүн сир үрдүнэн көһүннүн Эн килбиэниҥ.