Саалтыр 53 - Сибэтиэй Биибилийэ кинигэлэрэ

¹ Хуор салайааччытыгар. Устурууналаах инструмент доҕуһуолунан. Давид үөрэтиитэ.

² Зифейдэр Саулга кэлэн «Давид биһиэхэ саһан сылдьар эбит буолбат дуо?» диэбиттэригэр.

³ Айыы Таҥара, Бэйэҥ ааккынан миигин быыһаа, модун кыаххынан мин кырдьыкпын таһаар.

⁴ Айыы Таҥара, иһит мин үҥэрбин, болҕой Эйиэхэ этэрбин.

⁵ Туора дьон миигин утары өрө турдулар, күүстээхтэр мин дууһабар суудайдылар; кинилэр иннилэригэр Таҥараны көрбөттөр. Села

⁶ Ол эрэн миэхэ Таҥара көмөлөһөр, Айыы Тойон мин куппун-сүрбүн бөҕөргөтөр.

⁷ Өстөөхтөрүм өһүөннэрин Кини иэстиэҕэ; Эн кинилэри кырдьыгыҥ күүһүнэн имири эс.

⁸ Ис сүрэхпиттэн мин Эйиэхэ сиэртибэ биэриэм, Эн үтүөкэннээх ааккын, Айыы Тойон, албан аатырдыам.

⁹ Эн миигин бары иэдээнтэн өрүһүйдүҥ, онон мин өстөөхтөрбүн өрөгөйдүү көрдүм.