Саалтыр 41 - Сибэтиэй Биибилийэ кинигэлэрэ

II КИНИГЭТЭ 41–71 псаломнар

¹ Хуор салайааччытыгар. Корей уолаттарын үөрэтиитэ.

² Таба үрүйэ уутугар тардыһарыныы, Таҥара, мин дууһам Эйиэхэ тардыһар.

³ Дууһам миэнэ утаппыттыы, Таҥараҕа, тыыннаах Таҥараҕа талаһар: оо, хаһан эрэ тиийэммин, Таҥара сирэйин көрөбүн?

⁴ Таҥараҥ ханнаный диэн күннэтэ кэнийэр кэмнэригэр көмүскэм уута буолара күннэри-түүннэри кэбийэр килиэбим.

⁵ Ону эргитэ санааммын, хараҕым уутунан суунабын: хаһан эрэ мин үтүмэн дьоннуун үөрдүһэрим, дьоро күннүү, үҥэ-сүктэ кэлбиттэри үөрүү-көтүү, уруй-айхал аргыстаах Таҥара Дьиэтигэр сирдиирим.

⁶ Тоҕо санньыйаҕын, дууһам миэнэ, тоҕо айманаҕын? Таҥараҕа эн эрэн: мин өссө да Кинини айхаллыаҕым – Быыһааччыбын, Таҥарабын.

⁷ Дууһам санньыар санааҕа ылларан, бу Иордан сиригэр, Ермон үрдүгэр, Мицар хайатыгар тураммын, мин Эйигин саныыбын.

⁸ Чүөмпэ чүөмпэни ыҥыран күүгүнүүр Эн күрүлгэниҥ күрүлэс үөһүгэр; Эн долгунуҥ, Эн ытылҕаныҥ барыта мин үрдүбүнэн бааллыран ааста.

⁹ Күнүс Айыы Тойон миэхэ бигэ тапталын көрдөрөр, оттон түүн мин Киниэхэ ырыа ыллыыбын, олоҕум Таҥаратыгар үҥэбин.

¹⁰ Таҥарабар, Көмүскээччибэр, этэбин: «Тоҕо Эн миигин умнаҕын? Тоҕо мин, өстөөххө күөмчүлэтэн, курутуйа сылдьабын?»

¹¹ Таҥараҥ ханнаный диэн, күн аайы кэнийэр өстөөхтөрүм үөҕүүлэриттэн мин өлөрдүү эрэйдэнним.

¹² Тоҕо санньыйаҕын, дууһам миэнэ, тоҕо айманаҕын? Таҥараҕа эн эрэн: мин өссө да Кинини айхаллыаҕым, Быыһааччыбын, Таҥарабын.