Саалтыр 35 - Сибэтиэй Биибилийэ кинигэлэрэ

¹ Хуор салайааччытыгар. Таҥара кулутун Давид псалома.

² Нэгэй киһи сүрэҕэр аньыы саҥата сипсийэр, ол иһин Таҥараттан куттанары кини билбэт.

³ Таҥара буруйбун булуо суоҕа, булан да, ону абааһы көрүө суоҕа диэн, кини бэйэтин албыннанар.

⁴ Тыла-өһө барыта ньоҕой, албын-түөкэй; үтүөнү оҥорор өйдөнүөн баҕарбат.

⁵ Оронугар сытан, буруйу оҥорору торумнуур; токур-туора суолга турунар, куһаҕантан кини туттуммат.

⁶ Айыы Тойон, Эн бигэ тапталыҥ халлааннарга тиийэр; Эн кырдьыгыҥ былыттардыын быысаһар.

⁷ Кырдьыктаах быһыыҥ Эйиэнэ үрдүк хайа кэриэтэ, көнө дьүүлүҥ – түгэҕэ биллибэт чүөмпэ. Дьону да, кыылы-сүөлү да Эн араҥаччылыыгын, Айыы Тойон.

⁸ Хайдах курдук күндүнүй Эн бигэ тапталыҥ, Айыы Таҥара! Дьон аймах барыта Эн кынатыҥ анныгар уоскуйар,

⁹ Эн Дьиэҥ уйгута кинилэри дуоһутар, Эн үөрүүҥ өрүһэ утахтарын ханнарар.

¹⁰ Эйиэхэ баар олох төрдө; биһиги Эн сырдыккар сылдьан, сырдыгы көрөбүт.

¹¹ Эйигин билэр дьону таптыырыҥ хаһан да уларыйбатын, көнө сүрэхтээхтэри өрүһүйэриҥ хаһан да уурайбатын.

¹² Киэбирбит киһи тилэҕэ миигин тэпсибэтин, нэгэй киһи илиитэ миигин үүрбэтин.

¹³ Онно охтубуттара хара дьайдаахтык быһыыламмыттар, кинилэр аны турбаттыы самныбыттар.