Саалтыр 33 - Сибэтиэй Биибилийэ кинигэлэрэ

¹ Авимелех иннигэр өйө суох буолан кубулуммут Давид, киниттэн үүрүллэн баран, ыллаабыт псалома.

² Айыы Тойону алгыаҕым хайа да кэмҥэ, Кинини уруйдуурбун ууратыам суоҕа.

³ Айыы Тойонунан мин дууһам күөн туттуоҕа, көрсүө-сэмэй дьон маны истэн үөрүөҕэ.

⁴ Уруйдааҥ Айыы Тойону миигин кытта, бары бииргэ айхаллыаҕыҥ Кини аатын.

⁵ Айыы Тойону көрдүүрүм иһин Кини миигин иһиттэ, бары суоһуур кутталтан миигин өрүһүйдэ.

⁶ Хараххытын Киниттэн араарбакка, сырдыы-сыдьаайа сылдьыҥ, оччоҕо эһиги сирэйгит хаһан да кытарыа суоҕа.

⁷ Бу дьадаҥы киһи Таҥараны ыҥырбыппар, Айыы Тойон истэн, бары кыһалҕабыттан быыһаата.

⁸ Айыы Тойонтон куттанар дьону тула Кини Аанньала сылдьан, кинилэри өрүһүйэн ылар.

⁹ Кэлиҥ, бэйэҕит билиҥ Айыы Тойон хайдахтаах үтүөтүн! Ким Киниэхэ эрэнэр, ол дьоллоох.

¹⁰ Айыы Тойонтон куттаныҥ эһиги, Кини сибэтиэйдэрэ; Киниттэн куттанар дьон тугунан да тутайбаттар.

¹¹ Эдэр хахайдар, аһылык булбакка, аччыктыыллар, оттон Айыы Тойону көрдөөччүлэр хайа да үтүөттэн маппаттар.

¹² Кэлиҥ, оҕолоор, миигин истиҥ: мин эһигини Айыы Тойонтон толлорго үөрэтиэм.

¹³ Эһигиттэн ким олох олоруон баҕарар, үтүөнү көрөр туһугар, уһун үйэлэниэн саныыр,

¹⁴ ол, куһаҕаны саҥарбаттыы, тылын кыана тутуннун, албыннык тыллаһартан туттуннун.

¹⁵ Куһаҕантан тэйэн биэриҥ, үтүөнү оҥоруҥ, или-эйэни көрдөөҥ, онуоха эрэ дьулуһуҥ.

¹⁶ Айыы Тойон хараҕа көнө дьону көрөр, Кини кулгааҕа кинилэр үөгүлэрин истэр.

¹⁷ Оттон хара дьайдаахтарга Айыы Тойон утары турунар, кинилэри сир үрдүттэн суола суох соторго сорунар.

¹⁸ Көнө дьон көмө көрдүүрүн Айыы Тойон истэр, кинилэри бары кыһалҕаларыттан өрүһүйэр.

¹⁹ Айыы Тойон самныбыт санаалаахтарга чугас, Кини сүөм түспүттэри быыһаан ылар.

²⁰ Көнө киһи элбэх эрэйи көрсөр эрээри, кинини барытыттан Айыы Тойон өрүһүйэр.

²¹ Кини кырдьыксыт бары уҥуоҕун харыстыыр, онон биирин да тоһуттарыа суоҕа.

²² Хара дьайдааҕы бэйэтин дьайа өлөрүөҕэ, кырдьыксыты абааһы көрөөччү өлүөҕэ.

²³ Айыы Тойон кулуттарын олоҕун толуйан ылыаҕа, Киниэхэ эрэнээччилэртэн ким да буруйданыа суоҕа.