Саалтыр 31 - Сибэтиэй Биибилийэ кинигэлэрэ

1 Давид үөрэтиитэ.

¹ Давид үөрэтиитэ. Ким буруйа-сэмэтэ бырастыы гыныллыбыт, аньыыта-харата суола суох сотуллубут, ол дьоллоох.

² Ким Айыы Тойон иннигэр аньыыта аахсыллыбатах, албыны ис тыыныгар киллэрбэтэх, ол дьоллоох.

³ Тылбыттан матан саҥата суох сылдьарым саҕана уһун күнү быһа ынчыктыырбыттан уҥуоҕум улугурбута.

⁴ Эн ыар илиигиттэн күннэри-түүннэри эрэйдэммитим, чэгиэн бэйэм, сайыҥҥы курааҥҥа курдук, кэхтибитим. Села

⁵ Дьэ онтон мин аньыыбын Эйиэхэ этиммитим, хара дьайыыбын Эйигиттэн кистээбэтэҕим. «Буруйбун Айыы Тойоҥҥо билиниэм», – диэбитим, ол иһин аньыым буруйун Эн бырастыы гыммытыҥ. Села

⁶ Онон хас биирдии бэриниилээх киһи тоҕоостоох кэмигэр Эйиэхэ үҥүөҕэ, оччоҕо халаан уутунуу анньан кэлэр аан алдьархай кини олоҕор ааҥныа суоҕа.

⁷ Эн миэхэ халыҥ хаххам буолаҕын; Эн миигин алдьархайтан харыстыыгын, өрүһүллүү ырыатынан тулалыыгын. Села

⁸ «Мин эйигин өйдөтүөм, барыахтаах суолгар үөрэтиэм; хараҕым далыгар илдьэ сылдьан сүбэлиэм.

⁹ Уостуганнаах үүн эрэ сыһытар кыахтаах хаҥыл атын, биитэр өһөс оселун курдук өйө суох буолумаҥ; олору онтон атыннык сыһыппаккын».

¹⁰ Хара дьайдаах киһи эрэйэ-буруйа хаҥыыр, оттон Айыы Тойоҥҥо эрэнээччини бигэ таптал харыстыыр.

¹¹ Өрө көтөҕүллүҥ Айыы Тойонтон, үөрүҥ, кырдьыктаахтар; өрөгөйдөөҥ бука бары, көнө сүрэхтээхтэр.