Саалтыр 3 - Сибэтиэй Биибилийэ кинигэлэрэ

¹ Давид уолуттан Авессаломтан куотан иһэн ыллаабыт псалома.

² Айыы Тойон, өстөөҕүм үксээтэ даҕаны! Үгүстэр миигин утары өрө тураллар;

³ үгүстэр мин туспунан: «Таҥара кинини быыһыа суоҕа», – дэһэллэр. Села

⁴ Ол эрэн, Айыы Тойон, Эн буолаҕын мин көмүскэнэр куйаҕым, албан аатым, Эн өрө көтөҕөҕүн мин санньыйбыт төбөбүн.

⁵ Куолаһым муҥунан Айыы Тойону ыҥырабын, оччоҕо Кини миэхэ сибэтиэй хайатыттан хардарар. Села

⁶ Айыы Тойоҥҥо көмүскэтэр буоламмын, мин холкутук сытан утуйан турабын.

⁷ Тула өттүбүттэн саба түһэр үтүмэн дьонтон ончу куттаныам суоҕа.

⁸ Оо, туруй, Айыы Тойон! Өрүһүй миигин, Таҥарам! Эн иэдэскэ охсоҕун мин өстөөхтөрбүн барыларын; Эн тоһутаҕын хара дьайдаахтар анаҕастарын.

⁹ Быыһабыл Айыы Тойонтон кэлэр; Эн алгыһыҥ норуоккар тосхойдун. Села