Саалтыр 29 - Сибэтиэй Биибилийэ кинигэлэрэ

¹ Давид псалома. Храм сибэтии буолбут күнүгэр ылламмыт ырыа.

² Уруйдуом Эйигин, Айыы Тойон, миигин өрүһүйбүтүҥ иһин, өстөөхтөрбүн үрдүбэр үҥкүүлэппэтэҕиҥ иһин.

³ Айыы Тойон Таҥарам, Эйигиттэн көмө көрдөөбүппэр, Эн миигин үтүөртүҥ;

⁴ Айыы Тойон, мин дууһабын Эн үтүгэн түгэҕиттэн таһаардыҥ, ииҥҥэ түспэтим туһугар, миигин тыыннаах хааллардыҥ.

⁵ Ыллааҥ Айыы Тойоҥҥо, итэҕэллээх дьоно, айхаллааҥ Кини сибэтиэй аатын.

⁶ Кини чыпчылҕан эрэ түгэнэ уордайар уонна олоҕуҥ тухары үтүөтүк сыһыаннаһар. Киэһэ ытабыл-соҥобул иһиллэр, оттон сарсыарда үөрүү ыаллаһар.

⁷ Кыһалҕаны билэ иликпинэ: «Хаһан да халбаҥныам суоҕа!» – диирим.

⁸ Айыы Тойон, Эн миэхэ үтүөтүк сыһыаннаһаҥҥын, миигин таас хайалыы бигэ оҥорбутуҥ; онтон хайа күн миигиттэн киэр хайыспыккар мин аймаһыйа түспүтүм.

⁹ Эйигин, Айыы Тойон, ыҥырбытым, Айыы Тойонтон ааттаспытым:

¹⁰ «Туох туһалаах буолуой мин өлөрүм, мин иин түгэҕэр түһэрим? Иин куоппаһа Эйигин айхаллыа дуо? Кини Эн кырдьыккын иһитиннэриэ дуо?

¹¹ Иһит, Айыы Тойон, миигин аһын-харыһый, Айыы Тойон, миэхэ көмөлөс».

¹² Мин санаарҕабылбын Эн үөрүүгэ кубулуттуҥ, кутурҕан таҥаһын миигиттэн устаҥҥын, дьол-соргу курунан миигин куустардыҥ;

¹³ айхаллыа мин дууһам Эйигин, уурайыа суоҕа; Айыы Тойон Таҥарам, үйэм тухары Эйигин уруйдуоҕум.