Саалтыр 20 - Сибэтиэй Биибилийэ кинигэлэрэ

¹ Хуор салайааччытыгар. Давид псалома.

² Айыы Тойон, Эйигиттэн күүс ылан, ыраахтааҕы үөрэр, Эн көмөлөһөҥҥүн, кини үөрүүтэ муҥура суох.

³ Сүрэҕэ баҕарбытын Эн киниэхэ биэрдиҥ, кини көрдөспүтүн ылынныҥ. Села

⁴ Үтүө алгыһынан Эн кинини көрүстүҥ, ыраас кыһыл көмүс хоруонаны төбөтүгэр кэтэртиҥ.

⁵ Эйигиттэн олоҕу көрдөөбүтэ – Эн киниэхэ үйэлэри уҥуордуур олоҕу биэрдиҥ.

⁶ Өрүһүйэн ылаҥҥын, сүдү килбиэҥҥэ тиксэрдиҥ, үрдүк чиэскэ, улуу аакка тириэртиҥ.

⁷ Үллэр үйэлэргэ Эн кинини алҕаатыҥ, Бэйэҥ иннигэр туруоран, сүрэҕин үөртүҥ.

⁸ Ыраахтааҕы Айыы Тойоҥҥо эрэнэр, Үрдүктэн Үрдүк үтүөтүнэн кини тулхадыйбат.

⁹ Эн илииҥ өстөөххүн барытын булуоҕа, Эн уҥа илииҥ Эйигин абааһы көрөөччүлэри булуоҕа.

¹⁰ Абаран-сатаран көстүөҥ эрэ кэрэх, күлүбүрүү умайар оһох курдук буолуохтара; Айыы Тойон, уордайан, кинилэри суох оҥортуоҕа – кинилэри уот мэҥиэстиэҕэ.

¹¹ Имири эһиэҕиҥ Эн кинилэр оҕолорун сир сирэйиттэн, удьуордарын – киһи аймахтан.

¹² Эйигин утары куомуннастахтарына, хара дьайдаах суолга сананнахтарына, соруктарын ситиэхтэрэ суоҕа.

¹³ Эн кинилэри үрүө-тараа ыһаттыаҥ, ох сааҥ охторунан сирэйгэ ытыалыаҥ.

¹⁴ Үрдээ, Айыы Тойон, сүдү күүскүнэн! Эн улуу кыаххын биһиги уруйдаан ыллыахпыт.