Саалтыр 19 - Сибэтиэй Биибилийэ кинигэлэрэ

¹ Хуор салайааччытыгар. Давид псалома.

² Санаарҕабыллаах күҥҥэр эйигин Айыы Тойон иһиттин, Иаков Таҥаратын аата эйигин көмүскээтин.

³ Сибэтиэй Дьиэтиттэн Кини эйиэхэ көмө ыыттын, Сион хайатыттан эйигин бөҕөргөттүн.

⁴ Биэрбит бэлэххин-туһаххын барытын аҕыннын, бүтүннүү умаппыт сиэртибэҕин үөрүүнэн ылыннын. Села

⁵ Сүрэҕиҥ сөбүлүүрүн Таҥара эйиэхэ биэриэхтин, бары баҕа санааҕын барытын толоруохтун.

⁶ Биһиги, эн быыһанаҥҥын, өрөгөйдүү үөрүөхпүт, былаахпытын Таҥарабыт аатыгар күөрэччи көтөҕүөхпүт. Айыы Тойон толоруохтун эн бары көрдөһүүгүн.

⁷ Билигин мин билэбин: Айыы Тойон Бэйэтин ыраахтааҕытын быыһыаҕа; уҥа илиитинэн кинини өрүһүйэн, сибэтиэй халлааныттан хардарыаҕа.

⁸ Сорох колесницатынан, сорох атынан күөн туттар, оттон биһиги Айыы Тойон Таҥарабыт аатынан күөн туттабыт.

⁹ Кинилэр, тирэхтэрин сүтэрэн, бүдүрүйэн охтуохтара, оттон биһиги, сүһүөхпүтүн булунан, бигэтик туруохпут.

¹⁰ Айыы Тойон, ыраахтааҕыны быыһаа уонна, Эйигин ыҥырдахпытына, биһигини иһит.