Саалтыр 15 - Сибэтиэй Биибилийэ кинигэлэрэ

1 Давид ырыата.

¹ Давид ырыата. Араҥаччылаа миигин, Айыы Таҥара, Эйиэхэ мин эрэнэбин.

² Айыы Тойоҥҥо этэбин: «Эн буолаҕын мин Айыы Тойонум, Эйигиттэн тэйэ сылдьан, туох да үчүгэйи көрбөппүн».

³ Сиргэ баар сибэтиэйдэргэ, кэрэ-бэлиэ дьоҥҥо – кинилэргэ мин сүрэҕим курдаттыы тардыһар.

⁴ Туора таҥараҕа сүгүрүйээччилэр эрэйдэрин бэйэлэрэ үксэтэллэр; мин кинилэри кытта кэрэх хаанын тоҕуом суоҕа, кинилэр таҥараларын ааттарын да ааттыам суоҕа.

⁵ Айыы Тойон – мин аналым, мин дьылҕам; Эн илиигэр баар инники олоҕум.

⁶ Өлбүгэ сирим быата үтүөкэн сирдэринэн түстэ, тиксибит нэһилиэстибэм сүрэхпин үөртэ.

⁷ Миигин сүбэлиир-амалыыр Айыы Тойону мин алгыам; бэл түүнүн сүрэҕим миигин ыйан-кэрдэн үөрэтэр.

⁸ Иннибэр мин өрүүтүн Айыы Тойону көрөрүм; Кини мин уҥа өттүбэр сылдьар, онон тулхадыйыам суоҕа.

⁹ Ол иһин сүрэҕим үөрэр, дууһам өрөгөйдүүр, ол иһин бүтүн бэйэм бөҕөхпүн.

¹⁰ Мин дууһабын Эн үтүгэн түгэҕэр хаалларыаҥ суоҕа, итэҕэллээх киһигин ииҥҥэ симэлитиэҥ суоҕа.

¹¹ Олох суолун Эн миэхэ ыйан биэриэҕиҥ: Эйигин кытта сылдьан, мин толору үөрүүнү билиэҕим; Эн уҥа илиигэр баар уостубат дьол-соргу.