Саалтыр 142 - Сибэтиэй Биибилийэ кинигэлэрэ

1 Давид псалома.

¹ Давид псалома. Айыы Тойон, иһит мин Эйиэхэ үҥэрбин, болҕой ааттаһар саҥабын, эрэбиллээх, кырдьыктаах Бэйэҥ миэхэ хардар.

² Кулуккун дьүүлгэ тардыма: ким да суох бу сиргэ Эн иннигэр буруйа суох.

³ Өстөөх, миигин сонордоон, сиргэ-буорга тэпсэн эрэр, былыр өлбүт дьоннуу им балайга олордор.

⁴ Онтон мин санаам түһэр, сүрэҕим айманар.

⁵ Былыргы күннэри мин өйдөөн кэлэбин; Эн дьайыыларгын анааран, биһиэхэ тугу оҥорбуккун барытын эргитэ саныыбын.

⁶ Эйиэхэ мин икки илиибин өрө уунабын; дууһам куура хаппыт сир курдук, Эйигин кэтэһэр. Села

⁷ Оо, хардара оҕус миэхэ, Айыы Тойон, мин тыыным-быарым кылгаата; миигиттэн киэр хайыһыма, Эн киэр хайыстаххына, мин бэйэбин өлбүттүү сананыаҕым.

⁸ Сарсыарда эрдэттэн иһитиннэр миэхэ бигэ тапталгын, Эйиэхэ мин эрэнэбин. Ыйан биэр дуу хайа суолунан барарбын – дууһам Эйиэхэ үөһэ дьулуһар.

⁹ Өстөөхтөрбүттэн миигин өрүһүй, Айыы Тойон, – мин Эйиэхэ көмө көрдөһө кэллим.

¹⁰ Көҥүлгүн толорорго миигин үөрэт, Эн буолаҕын мин Таҥарам. Эн үтүө Тыыныҥ миигин дэхси суолунан сирдээтин.

¹¹ Бэйэҥ аатыҥ туһугар, Айыы Тойон, олохпун быыһаа, кырдьыктаах көмөҕүнэн кыһалҕаттан таһаар.

¹² Көмүскэллээх санааҕыттан өстөөхтөрбүн имири эс, мин дууһабын абааһы көрөөччүлэри суох оҥортоо; Эн кулутуҥ буолабын эбээт мин.