Саалтыр 137 - Сибэтиэй Биибилийэ кинигэлэрэ

1 Давид псалома.

¹ Давид псалома. Айхал этэбин Эйиэхэ, Айыы Тойон, бүтүн сүрэхпинэн, таҥаралар иннилэригэр Эйиэхэ ыллыыбын;

² Эн Бэйэҥ тылгын хайа да ааккынааҕар үрдэппитиҥ иһин, сибэтиэй Храмыҥ иннигэр тураммын, Эйиэхэ сүгүрүйэбин, бигэ тапталыҥ, кырдьыгыҥ иһин, Эн ааккар айхал этэбин.

³ Эйигин ыҥырбыт күммэр миэхэ хардаран, Эн сүргэбин көтөхтүҥ, куппун-сүрбүн бөҕөргөттүҥ.

⁴ Айыы Тойон, Эн этэргин иһиттэхтэринэ, сир бары ыраахтааҕылара Эйигин айхаллыахтара.

⁵ Таҥара сүдү килбиэннээҕин иһин, кинилэр Айыы Тойон суолларын ыллыахтара.

⁶ Айыы Тойон үрдүк: Кини кыраны-хараны көрөр, бэрдимсиги ыраахтан билэр.

⁷ Төһө да мин кутталлаах сиринэн сырыттарбын, Эн миигин өстөөхтөрүм өһөгөйдөрүттэн көмүскүүгүн, илиигин миэхэ утары уунаҥҥын, миигин уҥа илиигинэн өрүһүйэн ылаҕын.

⁸ Айыы Тойон эрэннэрбитин мин туспар толоруоҕа; Эн бигэ тапталыҥ, Айыы Тойон, – үйэлэр тухары. Бэйэҥ илииҥ оҥоһугун хаалларыма.