Саалтыр 131 - Сибэтиэй Биибилийэ кинигэлэрэ

1 Дабайыы ырыата.

¹ Дабайыы ырыата. Умнума, Айыы Тойон, Давиды, кини тулуйбут бары ыарахаттарын,

² хайдах кини Айыы Тойоҥҥо андаҕайбытын, Иаков Күүстээх Таҥаратыгар мэктиэ тылын биэрбитин:

³ «Киириэм суоҕа мин олорор дьиэбэр, сытан ылыам суоҕа утуйар ороммор;

⁴ харахпын тымныта түһүөм суоҕа, кыратык да нухарыйан ылыам суоҕа –

⁵ Айыы Тойоҥҥо олохсуйар сир була иликпинэ, Иаков Күүстээх Таҥаратыгар олорор дьиэ була иликпинэ».

⁶ Биһиги ковчег туһунан Ефрафаҕа истибиппит, Иарим хонуутуттан ону булан ылбыппыт.

⁷ «Барыаҕыҥ Кини олорор сиригэр, сүгүрүйүөҕүҥ Кини бүрүстүөлүн тирэҕэр».

⁸ Айыы Тойон, туран, сынньанар сиргэр аас, улуу күүскүн туоһулуур ковчегкын кытта киир.

⁹ Эн аҕабыыттаргын кырдьык эҥээрдэһиэхтин, Эн сибэтиэйдэриҥ үөрүүлээх саҥалара ньиргийиэхтин.

¹⁰ Кулутуҥ Давид туһугар, киэр хайыһыма Бэйэҥ ыраахтааҕыгыттан.

¹¹ Айыы Тойон Давидка дьиҥ кырдьыгынан андаҕайбыта, Кини ол тылын уларытыа суоҕа: «Сүрэх удьуордаргыттан биирдэрин бүрүстүөлгэр олордуом.

¹² Уолаттарыҥ Мин кэс тылбын толордохторуна, үөрэппит сокуоннарбын тутустахтарына, кинилэр уолаттара эмиэ үйэлэр тухары Эн бүрүстүөлгэр олоруохтара».

¹³ Айыы Тойон Сиону талан ылбыта, Кини онно дьиэлэниэн баҕарбыта:

¹⁴ «Бу – Мин үйэлэр тухары сынньанар сирим, онон манна, баҕалаах сирбэр, олохсуйуом.

¹⁵ Байым аһылыгынан бу сири Мин алгыам, дьадаҥыларын килиэбинэн дуоһута аһатыам.

¹⁶ Аҕабыыттарын быыһабыл аргыстыам; кини сибэтиэйдэрэ үөрэн-көтөн өрөгөйдүөхтэрэ.

¹⁷ Манна Давид удьуоруттан улуу Ыраахтааҕыны таһаарыаҕым; Талыылааҕым сибэтиинньигин Мин бэлэмнээн турабын.

¹⁸ Кини өстөөхтөрүн саакка-суукка угуоҕум, оттон Кини кэппит мэнньиэһэ күлүмнүү оонньуу туруоҕа».