Саалтыр 121 - Сибэтиэй Биибилийэ кинигэлэрэ

1 Дабайыы ырыата. Давид псалома.

¹ Дабайыы ырыата. Давид псалома. Оо, онно мин үөрбүппүн эриэхсит – Айыы Тойон Дьиэтигэр барыахха диэбиттэригэр!

² Дьэ, бу кэлэн турабыт, Иерусалим, эн олбуоруҥ ааныгар.

³ Иерусалим – биир ньыгыл сомоҕо буолардыы тутуллан тахсыбыт куорат.

⁴ Аҕа уустара, Айыы Тойон норуотун аҕаларын уустара, Израиль сокуонунан, Айыы Тойон аатын айхаллыы, хайаны дабайан, бу куоракка кэлэллэр.

⁵ Манна бааллар дьүүллүүр бүрүстүөллэр, Давид дьиэтин бүрүстүөллэрэ.

⁶ Эйэтэ көрдөһүҥ Иерусалимҥа: «Дьол-соргу тосхойдун Эйигин таптыыр дьоҥҥо!

⁷ Эн эркиннэргиттэн эйэ тэйбэтин, эн кириэппэстэргэр куттал суоһаабатын».

⁸ Аймах-билэ дьонум, доҕотторум тустарыгар этэбин: «Эйиэхэ эйэ чэчирээтин!»

⁹ Айыы Тойон Таҥарабыт Дьиэтин туһугар мин эйиэхэ үтүөнү баҕарабын.