Саалтыр 114 - Сибэтиэй Биибилийэ кинигэлэрэ

¹ Айыы Тойону таптыыбын – Кини мин саҥабын, мин ааттабылбын истэрин иһин.

² Мин этэрбин Кини болҕойон иһиттэ, онон мин олоҕум устата Кинини ыҥырар буолуом.

³ Өлөр өлүү ситимигэр иҥнэммин, үтүгэн түгэҕин үлүгэригэр түбэһэммин, мин муҥу-сору көрбүтүм, муҥур уһукка түспүтүм.

⁴ Онно Айыы Тойон аатын ыҥырбытым, «Оо, Айыы Тойон, олохпун өрүһүй!» – диэбитим.

⁵ Айыы Тойон аһыныгас сүрэхтээх, кырдьыктаах, биһиги Таҥарабыт амарах санаалаах.

⁶ Айыы Тойон кэнэннэри харыстыыр: Кини миигин, күүһүм эстибитигэр, быыһаан ылла.

⁷ Дууһам миэнэ, уоскулаҥҥар төнүн, Айыы Тойон эйиэхэ үтүөнү оҥордо.

⁸ Эн өрүһүйдүҥ мин дууһабын өлүүттэн, харахпын – харах уутуттан, атахпын – бүдүрүйэртэн.

⁹ Онон мин бу тыыннаахтар сирдэригэр Айыы Тойон иннигэр сылдьыаҕым.