Саалтыр 110 - Сибэтиэй Биибилийэ кинигэлэрэ

¹ Аллилуия. Айыы Тойону мин айхаллыам бүтүн сүрэхпинэн кырдьыктаахтар ортолоругар, көнө дьон түмсүүтүгэр.

² Улуу да буоллахтара Айыы Тойон дьайыылара! Онтон үөрээччи барыта Кини оҥорбутун ырыҥалыыр.

³ Кини дьайыыта барыта албан ааттаах, кэрэ килбиэннээх, Кини үйэлэр тухары кырдьыктаах.

⁴ Сөҕүмэр дьиктилэрин Кини умнуллубат оҥорбут; Айыы Тойон аһыныгас, амарах санаалаах.

⁵ Киниттэн куттанар дьону аһынан-үөлүнэн хааччыйар; эппит кэс тылын үйэлэр тухары өйдүү сылдьар.

⁶ Кини, омуктар сирдэрин норуотугар биэрэн, күүстээх дьайыытын кинилэргэ көрдөрбүтэ.

⁷ Тугу оҥороро Киниэнэ барыта – бигэ, сиэрдээх, ыйара-кэрдэрэ барыта эрэбиллээх –

⁸ үйэттэн үйэҕэ бигэргэтиллибит, кырдьыкка, көнө быһыыга тирэҕирбит.

⁹ Кини норуотугар быыһабылы ыыппыта, мэҥэ кэс тылын кинилэргэ эппитэ. Кини аата сибэтиэй уонна дьулаан.

¹⁰ Айыы Тойонтон куттаныы – муударас төрдө, Кини кэриэстэрин тутуһааччылар чөл өйдөөхтөр. Кини үйэттэн үйэҕэ айхаллана туруоҕа.