Саалтыр 108 - Сибэтиэй Биибилийэ кинигэлэрэ

1 Хуор салайааччытыгар. Давид псалома.

¹ Хуор салайааччытыгар. Давид псалома. Айхаллыыр Айыы Таҥарам, саҥата суох буолума;

² Сидьиҥ тыллаах албыннар миигин үөҕэн эрэллэр, сымыйаны мин туспунан тиһэллэр.

³ Тула өттүбэр өһүөннээх саҥалара иһиллэр, туох да төрүөтэ суох миэхэ саба түһэллэр.

⁴ Тапталбар хатаанынан хардараллар, оттон мин кинилэр тустарыгар үҥэбин эрэ.

⁵ Үтүөбүн куһаҕанынан төлүүллэр, тапталбын – өһөгөйүнэн.

⁶ Хара дьайдааҕы туруор өстөөхпүн утары, буруйдааччыны туруор кини уҥа өттүгэр.

⁷ Дьүүллэстэҕинэ, буруйдаах буолан таҕыстын, үҥэрэ кытта аньыыга аахсылыннын.

⁸ Олоҕун күнэ-дьыла кэрэгэй буоллун; кини солотун атын киһи ыллын.

⁹ Оҕолоро тулаайах хааллыннар, ойоҕо огдообо буолуохтун.

¹⁰ Оҕолоро атах-балай умналыы сырыттыннар, урусхалламмыт дьиэлэриттэн холдьоҕуллан бардыннар.

¹¹ Баардааҕын барытын иэстээх дьонугар былдьаттын, үлэтин түмүгүн туора дьоҥҥо туура туттардын.

¹² Ким да киниэхэ амарахтык сыһыаннаспатын; ким да кини тулаайахтарын аһымматын;

¹³ кини сыдьаана барыта имнэри быһыннын, кини аата иккис көлүөнэттэн умнулуннун.

¹⁴ Аҕатын буруйа Айыы Тойон иннигэр ахтылыннын, ийэтин аньыыта бырастыы гыныллыбатын.

¹⁵ Аньыыларын Айыы Тойон өрүүтүн өйдүү сырыттын, ааттарын сир үрдүттэн суола суох сүтэрдин.

¹⁶ Үтүөнү оҥорор туһунан кини санаабатаҕа, суоҕу-дьадаҥыны, кыраны-кыһалҕалааҕы, самныбыт санаалааҕы өлөрөөрү сойуолуура.

¹⁷ Кырыырын сөбүлүүрэ – кырыыһа бэйэтигэр түһүөхтүн; алгыырын абааһы көрөрө – алгыс киниттэн тэйиэхтин.

¹⁸ Таҥаһы кэтэрдии, кэбэҕэстик кыраан барара – кырыыһа, уу курдук, этигэр өтөн киириэхтин, арыы курдук, уҥуоҕар тиийэ иҥиэхтин;

¹⁹ таҥна сылдьар таҥаһыныы кинини ыга ылыахтын, куруук курданар курунуу кинини бобо тутуохтун.

²⁰ Итинник иэстэһиэҕэ Айыы Тойон мин өстөөхтөрбүттэн, миигин утары сидьиҥник тыллаһааччылартан.

²¹ Оттон Эн, Айыы Тойон, мин Айыы Тойонум, Бэйэҥ аатыҥ туһугар миэхэ көмөлөс. Эн, муҥура суох амарах тапталлаах, миигин өрүһүй.

²² Мин дьадаҥыбын, кыһалҕалаахпын, сүрэхпэр сырҕан баастаахпын.

²³ Киэһээҥҥи күлүк курдук, мин сүтэн эрэбин, саранча курдук, киэр эһилинним.

²⁴ Аһаабакка, икки тобугум ибигирэс буолла, уҥуохтаах тириим эрэ хаалла.

²⁵ Кинилэр буоллаҕына миигин күлэллэр, көрдүлэр да, бастарын быһа илгистэллэр.

²⁶ Көмөлөс миэхэ, Айыы Тойон Таҥарам, көмүскэллээх санааҕыттан миигин быыһаа.

²⁷ Эн илииҥ миигин өрүһүйэн ылбытын, бу Эн оҥоһууҥ буоларын кинилэр биллиннэр.

²⁸ Кинилэр кыраатыннар, оттон Эн алҕаа. Күөнтээбиттэрэ бэйэлэригэр саатынан-суутунан эргийдин, оттон миэхэ, кулуккар, үөрүү тосхойдун.

²⁹ Миигин буруйдааччылар ааттара алдьаннын, саатттара-сууттара кинилэри батыһа сырыттын.

^30-31 Өлөргө уурааччылартан өрүһүйээри, кыһалҕалаах киһи уҥа өттүгэр турарын иһин, мин Айыы Тойону дуораччы айхаллыам, улуу түмсүү ортотугар Кинини уруйдуом.