Саалтыр 107 - Сибэтиэй Биибилийэ кинигэлэрэ

¹ Ырыа. Давид псалома.

² Мин сүрэҕим бэлэм, Айыы Таҥара; ырыа ыллыам, Эйигин айхаллыам. Уһугун, дууһам миэнэ!

³ Уһуктуҥ, арфа уонна лира! Мин сарыалы уһугуннарыам.

⁴ Айыы Тойон, мин норуоттар ортолоругар Эйиэхэ махтаныам, омуктар ортолоругар Эйигин айхаллыам.

⁵ Эн бигэ тапталыҥ халлааннары аһара барар, Эн кырдьыгыҥ былыттардыын быысаһар.

⁶ Халлааннар уҥуордарынан айхаллан, Айыы Таҥара, бүтүн сир үрдүнэн көһүннүн Эн килбиэниҥ.

⁷ Эн таптыыр дьонуҥ быыһаналларын туһугар, уҥа илиигинэн кинилэри өрүһүйэн ыл, миигин иһит.

⁸ Таҥара сибэтиэй Дьиэтиттэн эрэннэрдэ: «Мин Сихем сирин, өрө көтөҕүллэн туран, үллэриэм, Сокхоф хочотун усталаах туоратын мээрэйдиэм.

⁹ Галаад – Миэнэ, Манассия эмиэ – Миэнэ; Ефрем – баһым кураахтаах куйаҕа, Иуда – Мин скипетрым.

¹⁰ Моав – Мин суунар кытаҕым, оттон Едомҥа атаҕым таҥаһын быраҕыам. Филистина үрдүнэн Мин өрөгөйдөөх хаһыым дуораһыйыа».

¹¹ Ким миигин бөҕөргөтүнүүлээх куоракка киллэриэҕэй? Ким миигин Едомҥа тиэрдиэҕэй?

¹² Эн буолбатах дуо, Айыы Таҥара, биһигини туора аспыт, биһиги сэриилэрбитин кытта барсыбатах Таҥара?

¹³ Оо, өстөөҕү утары охсуһарбытыгар биһиэхэ көмөлөс – киһи көмөтө көдьүүһэ суох.

¹⁴ Таҥараны кытта сылдьан, биһиги күүстээх буолуохпут, Кини биһиги өстөөхтөрбүтүн сууһарыаҕа.