Иона 3 - Сибэтиэй Биибилийэ кинигэлэрэ

Иона АЙЫЫ ТОЙОҤҤО бас бэринэр

¹ АЙЫЫ ТОЙОН Ионаҕа иккиһин эппитэ:

² «Айаҥҥа тур! Улахан куоракка Ниневияҕа баран, Мин эйиэхэ тугу этэрбин олохтоохторго иһитиннэр».

³ Бу сырыыга Иона туох да уталытыыта суох айаҥҥа турбута: АЙЫЫ ТОЙОН соруйбутун курдук, Ниневияҕа аттаммыта. Ниневия буоллаҕына сүүнэ улахан куорат этэ: усталаах туоратын киһи үс күнүнэн эрэ кэрийэн бүтэрэрэ.

⁴ Иона куоракка киирэн биир күннүк суолу ааһан баран: «Аны түөрт уон хонугунан Ниневия урусхал буолуоҕа!» – диэн биллэрбитинэн барбыта.

⁵ Онон Ниневия олохтоохторо Таҥараны итэҕэйэн, ким да аһыа да, иһиэ да суохтаах кураанах күннэрин биллэрэн, кыратыттан улаханыгар тиийэ бука бары кутурҕан таҥаһын таҥныбыттара.

⁶ Ити туһунан сурах Ниневия ыраахтааҕытыгар тиийбитигэр ыраахтааҕы, бүрүстүөлүттэн туран, мааны таҥаһын устан кэбиспитэ, кутурҕан таҥаһын таҥнан баран, күл кутуллубут сиригэр олорбута.

⁷ Кини бэйэтин уонна үрдүк сололоохторун ааттарыттан Ниневияҕа маннык ыйааҕы таһаарбыта: «Ким да аска-үөлгэ чугаһаабатын, ууну испэтин. Дьиэ сүөһүтүн эмиэ, ынахтары да, барааннары да, мэччитэ ыыппатыннар, уулаппатыннар.

⁸ Дьон барыта кутурҕан таҥаһын таҥнан, сүөһүтүн эмиэ оннук таҥаһынан бүрүйэн баран, туох баар күүһүн ууран туран Таҥараны ыҥырдын. Хас биирдии киһи аньыылаах суолу тутуһарын, күүһүнэн өттөйөрүн уураттын.

⁹ Туох билэр, баҕар, Таҥара санаата уларыйан уордайбыта уҕарыйыа, оччоҕо биһиги өлүөхпүт суоҕа».

¹⁰ Ниневия олохтоохторо аньыылаах суолларыттан туораан быһыылара-майгылара көммүтүн көрөн, Таҥара, санаата уларыйан, кинилэргэ ыытыах буолбут алдьархайын ыыппатаҕа.