Эсфирь 6 - Сибэтиэй Биибилийэ кинигэлэрэ

Мардохейы чиэстээһин

¹ Ити түүн ыраахтааҕы көрбүт хараҕын симмэтэҕэ. Уута кэлбэккэ, Өйдөбүнньүк кинигэтин, атыннык эттэххэ, дойдутун бэлиэ түгэннэрин үйэтитэр кинигэтин, аҕалтаран, киниэхэ ону улаханнык доргуччу ааҕалларыгар дьаһайбыта.

² Онно кини икки аттакыта, утуйар хоһун манабыллара Бигтана уонна Тереш, ыраахтааҕы тыыныгар турунарга санаммыттарын Мардохей тыллаан биэрбитин туһунан эмиэ суруллан сылдьара.

³ Ыраахтааҕы: «Мардохей ити өҥөтүн иһин туох эмэ чиэскэ-бочуокка тиксибитэ этэ дуо?» – диэн ыйыппыта. «Суох, туохха да тиксибэтэҕэ»,– диэбиттэрэ кини чугас үлэһиттэрэ.

⁴ «Билигин тиэргэҥҥэ ити ким баарый?» – диэн ыйыппыта ыраахтааҕы. Сити кэмҥэ ыраахтааҕы дьиэтин тас тиэргэнигэр Аман кэлэн турара. Кини ыраахтааҕыттан Мардохейы мин бэлэмнэппит остуолбабар ыйат диэн көрдөһөр санаалааҕа.

⁵ Чугас үлэһиттэрэ ыраахтааҕыга: «Аман кэлэн турар, тиэргэҥҥэ баар», – диэбиттэрэ. «Киирдин!» – диэн дьаһайбыта ыраахтааҕы.

⁶ Итиэннэ Аман киирбитигэр киниттэн: «Ыраахтааҕы чиэстиэн баҕарар киһитигэр туох үчүгэйи оҥоруохха сөбүй?» – диэн ыйыппыта. Аман иһигэр: «Ыраахтааҕы миигиттэн ураты ама кими өрө тутуон баҕарбыт үһүө», – дии санаабыта,

⁷ онон эппитэ: «Ыраахтааҕы кими эрэ чиэстиэн-бочуоттуон баҕарар буоллаҕына,

⁸ ыраахтааҕы таҥнар таҥаһын уонна кини миинэр миҥэтин, баһыгар мэнньиэс кэтэрдэн, аҕаллыннар.

⁹ Ол таҥаһы уонна аты ыраахтааҕы биир саамай биллэр-көстөр үрдүк сололоох киһитигэр туттардыннар, оччоҕо үрдүк сололоох киһи, ыраахтааҕы чиэстиэн баҕарар киһитигэр ол таҥаһы таҥыннаран баран, кинини акка олортун уонна куорат болуоссатын устун аты көнтөһүттэн сиэтэ сылдьан: «Ыраахтааҕы чиэстиэн-бочуоттуон баҕарар киһитэ маннык мааныланар куолута!» – диэн бар дьон ортотугар дорҕоонноохтук иһитиннэрдин».

¹⁰ Онуоха ыраахтааҕы Амаҥҥа: «Сибилигин ити эппит таҥаскын-сапкын, аккын ылан, дыбарыас олбуорун аанын аттыгар олорор иудей Мардохейга итини барытын оҥор. Барытын бэйэҥ эппитиҥ курдук гын, тугу да уларытыма!» – диэбитэ.

¹¹ Аман ыраахтааҕы таҥаһын уонна аты ылан баран, Мардохейы таҥыннаран акка олордубута уонна: «Ыраахтааҕы чиэстиэн-бочуоттуон баҕарар киһитэ маннык мааныланар куолута!» – диэн доргуччу саҥара-саҥара куорат болуоссатын устун аты көнтөһүттэн сиэтэ сылдьыбыта.

¹² Мардохей ити кэнниттэн үлэтигэр ыраахтааҕы дыбарыаһын олбуорун ааныгар төннүбүтэ, оттон Аман, көҕүс түһэн, харыс хаалан, саатыттан төбөтүн таҥаһынан бүрүнэн баран, бэрт тиэтэлинэн дьиэтигэр баран хаалбыта.

¹³ Дьиэтигэр тиийэн туох буолбутун барытын ойоҕор Зерешка уонна доҕотторугар бука барыларыгар кэпсээн биэрбитэ. Онуоха сүбэһиттэрэ уонна ойоҕо Зерешь: «Ити эн охторгор быа-туһах буолбут Мардохей төрдө-ууһа иудей буоллаҕына, эн кинини кыайбаккын, онон кини хараҕар самнарыҥ эрэ хаалбыт», – диэн хардарбыттара.

¹⁴ Итини этэн бүтэ да иликтэринэ, ыраахтааҕы аттакылара бэрт тиэтэлинэн тиийэн кэлэн, Аманы Эсфирь тэрийбит малааһыныгар илдьэ барбыттара.