Аман өһө 30 - Сибэтиэй Биибилийэ кинигэлэрэ

Агур этиитэ

¹ Иакей уола Агур эппит иэйиилээх тыллара: Айыы Таҥарам, олус да мин сырам-сылбам баранна! Олус да сырам-сылбам баранна, Айыы Таҥарам! Хайдах гынан бу киһи-хара буолан сылдьыах бэйэкэбиний?

² Мин кимнээҕэр да ньүдьү-балайбын, киһилии өй миэхэ төрүкү суоҕа,

³ муудараска ончу уһуллубатаҕым, Сибэтиэй Таҥара туһунан тугу да билбэппин.

⁴ Ким үөһээ халлааҥҥа ытта сылдьыбытай? Ким тыалы-кууһу харбаан ылан, икки ытыһыгар хаайбытай? Ким устар ууну сомсон ылан, таҥаска бобо баайбытай? Ким бу аан дойду усталаах-туоратын чэрчилээн биэрбитэй? Кини аата-суола ким диэний? Уолун аата эмиэ кимий? Кинилэр кимнээхтэрин бука эн билэр буолуохтааххын!

⁵ Айыы Таҥара хас биирдии тыла эҥкилэ суох; Киниэхэ эрэнээччилэргэ Кини халыҥ хахха, суон дурда буолар.

⁶ Таҥара эппит тылыгар тугу да эбимэ, аны эйигин сэмэлээтэҕинэ, сымыйаҥ арыллан тахсыаҕа.

⁷ Икки суолу мин Эйигиттэн көрдөһөбүн, Айыы Таҥара, ону миэхэ тыыннааҕым тухары аккаастаама:

⁸ көҥдөй сүпсүгү, албыны-сымыйаны миигиттэн киэр тэйит, аһара баай-талым, биитэр быстар дьадаҥы олоҕу миэхэ анаама, күннээҕи килиэппиттэн эрэ матарыма.

⁹ Аны тиэрэ тотон, Эйигин билиммэккэ, «Кимий ол Айыы Тойон?» диэн оруо маһы ортотунан тыллаһыам, биитэр, эстэн-быстан, уорар дьаллыкка ыбылы ылларан, Таҥарам аатын киртитиэм.

¹⁰ Чаҕары тойонугар холуннаран кэпсээмэ; холуннардаххына, эйиэхэ чаҕар кырыыһа түһүөҕэ.

¹¹ Төрөппүт аҕаларын кырыыр-таныйар, күн күбэй ийэлэрин аанньа ахтыбат дьон баар буолаллар.

¹² Кирдэрин-хохторун да сууммакка сылдьан, килбэгир ырааспыт дэнээччилэр эмиэ бааллар.

¹³ Өрүү көстөллөр, үрдүктүк сананан, атыттары сэнии көрөр, кими да бэйэлэригэр тэҥнээбэт эр бэртэрэ.

¹⁴ Ханна да бааллар бу дойду кыратын-харатын, быстыбытын-ойдубутун барытын сиэх-аһыах уһуктаах болот тиистээхтэр, эт эттээччи быһаҕын санатар сытыы кылыс сыҥаахтаахтар.

¹⁵ Ынах тыла үөн икки кыыстаах, иккиэн: «Миэхэ! Миэхэ!» – диэн кэлиилии кэбэллэр. Хаһан да баҕата хаммат үс баар, төрдүстэрэ эмиэ: «Чэ, сөп буолуо!» – диэн этиэ суоҕа:

¹⁶ ол – тыынар тыыннааҕы харайа турар анараа дойду, үйэтигэр оҕо үөскээбэт дьахтара, ардах кэлэн түһэрин өрүү кэтэһэр сир уонна: «Дьэ манан тохтуохха!» – диэн баран умуллан хаалбат уот.

¹⁷ Аҕатын күлүү гына көрөр, ийэтин улахаҥҥа уурбат киһи икки хараҕын киэҥ толоон суордара оҥон ылыахтара, сиэмэх көтөрдөр тоҥсуйан сиэхтэрэ.

¹⁸ Үс суолу мин өрүү сөҕө көрөбүн, төрдүһү эмиэ төрүт өйдөөбөппүн:

¹⁹ ол кый үрдүгүнэн көтөн ааһар хомпоруун хотой суолун, очуос хайанан сыыллар моҕой үөн суолун, киэҥ байҕал күөнүн тыыра устар хараабыл суолун, эр киһи эдэр кыыһы таптаан киниэхэ чугаһыыр суолун.

²⁰ Оттон содур дьахтар суола-ииһэ маннык: эр дьону кытта көссүүлэһэн баран, суунан-тараанан кэбиһэр уонна «мин туох да куһаҕаны оҥорботум ээ» диэн таһы-быһа мэлдьэһэр.

²¹ Үс суолтан сир үрдэ титирэстиир, төрдүһү эмиэ уйар кыаҕа суох:

²² ол – ыраахтааҕы бүрүстүөлүн ылар кулут киһини, баҕарбыт аһа-үөлэ барыта баар далай акаарыны,

²³ эргэ тахсан олорор барбах майгылаах дьахтары уонна хотунун оннугар ойох буолан киирэр чаҕар кыыһы.

²⁴ Бу сир үрдүгэр кимнээҕэр да уһулуччу өйдөөх, кыраларын көрүмэ, түөрт харамай баар:

²⁵ кымырдаҕас, быыкаайык да буоллар, аһыыр аһылыгын сайыҥҥыттан хаһаанар;

²⁶ хайа кутуйаҕа хата мөлтөхпүн дэммэт – очуос тааска уйаланар;

²⁷ аһыҥа үөн, ыраахтааҕыта суох да буоллар, биир ньыгыл кэккэнэн хаамар;

²⁸ уонна ооҕуй оҕус: төһө да ооҕуйу ытыскар ылан ууруоххун сөбүн иһин, бэйи онтукаҥ ыраахтааҕы дыбарыаһыгар сылдьар.

²⁹ Үс баар кимтэн да дьоһуннаахтык туттар-хаптар, төрдүстэрэ эмиэ өрүүтүн улуутуйа хаамар:

³⁰ ол – хахай, бары харамайтан дуоланнара, хаһан да кимтэн да чаҕыйан туруо суоҕа;

³¹ хонолдьуйа хаамар бөтүүк, хайа козела кыыл уонна халыҥ сэриитин иннигэр баран иһэр ыраахтааҕы.

³² Өскөтүн арбанан акаарытык быһыыламмыт, биитэр, саарбах суолга санаммыт буоллаххына, айаххын кэмигэр саба тутун.

³³ Хойуу сүөгэйи ытыйдахха арыы астанан тахсарын, киһини муннуга оҕустахха хаана тоҕо барарын кэриэтэ, дьону кыыһыртахха эмиэ иирээн тахсар.