Аман өһө 26 - Сибэтиэй Биибилийэ кинигэлэрэ

¹ Сай ортото хаар түһэрэ, хомуур үгэнигэр ардах кэлэрэ куһаҕанын курдук, акаарыны арбааһын эмиэ сиэрэ суох быһыы.

² Барабыай көтөн баран хааларыныы, хараҥаччы харах далыттан сүтэринии, олоҕо суох кырыыс туолбат.

³ Ат кымньыыланар, өсүөл үүннэниллэр, оттон акаары таһыллар.

⁴ Акаары киһи ааргы ыйытыытыгар эппиэттиэҥ – бэйэҥ киниэхэ тэҥнэһиэҥ.

⁵ Эн киниэхэ, халы мааргытык ыйыппытын өйдүүрүн курдук, хардар, инньэ гымматаххына, өйдөөхпүн дэниэҕэ.

⁶ Акаарыны сорукка ыыппыт киһи атаҕын быстыбытын тэҥэ – сору булунан ылбыт.

⁷ Доҕолоҥ ыраах кыайан хаампатын курдук, акаары эмиэ ох тылы кыайан таба туттубат.

⁸ Акаарыны арбыыр киһи, айатын иитэн баран, элбэрээгин хам баайан кэбиспит булчукка холоонноох.

⁹ Ох тылы туттарга холонор хоҥ мэйии илиитигэр киирбит хатыыны таһаара сатыыр итириккэ холоонноох.

¹⁰ Хас ааргыны, ааһан иһээччини барытын үлэҕэ ылааччы, дьону, ким да буоллун, ох саанан ытыалааччыга холоонноох.

¹¹ Ыт кулгуйбут сиригэр төннөн кэлэрин курдук, акаары оҥорбут алҕаһын хатылыы турар.

¹² Муударайбын дэнэр киһини көрбүтүҥ дуо? Киниэхэ эрэниэхтээҕэр акаарыга эрэммит ордук.

¹³ Сүрэҕэ суох үлэлии барымаары этэр: «Суолга хахай турар! Уулуссаҕа хахай сылдьар!»

¹⁴ Аан иэччэҕэр эргийэринии, күөх көппө эмиэ оронугар сытан уҥа-хаҥас эргийэр.

¹⁵ Сүрэҕэ суох, илиитин астаах иһиккэ уган баран, айаҕар тиэрдэрин ыарырҕатар.

¹⁶ Сүрэҕэ суох акаарыбын дэниэ суоҕа – үтүө тыллаах-өстөөх сэттэ муударайдааҕар да өйдөөхпүн дэниэҕэ.

¹⁷ Атын дьон иирээнигэр кыттыһыы ааһан иһэр ыты кулгааҕыттан харбаабыкка тэҥнээх.

¹⁸ Иирбитэ буолан кубулунар киһи дьону уоттаах оноҕоһунан ытыалаан өлөртүү сыһарын курдук,

¹⁹ сорох-сорохтор доҕотторун албыннаан баран, оонньоон эппитим диэн куотуналлар.

²⁰ Хардаҕаһа бүппүт оһох умуллан хааларыныы, хобуоччу суох буоллаҕына, иирээн эмиэ намырыыр.

²¹ Чох – ититэргэ, мас – уматарга, оттон хобуоччу – иирээни тардарга.

²² Хобуоччу тыла-өһө минньигэһэ сүрдээх – искэр-үөскэр дириҥник өтөн киирэр.

²³ Абааһы көрөрүн кистэнэн амаҕаччылаан кэпсэтээччи көмүс дуйдаах туой боччук кэриэтэ.

²⁴ Уодаһыннаах утарынан бэрт буолуо гынан баран, оҕуруктуурун толкуйдуу олоруоҕа.

²⁵ Төһө да тылын-өһүн минньиттин, кинини итэҕэйимэ – иһигэр сэттэ сидьиҥ санаалаах буолуоҕа.

²⁶ Сирэйгэр бэрт эрээри, иһигэр эйигин абааһы көрөр киһи өһүөннээх санаатын улахан мунньахха биллэриэҕэ.

²⁷ Киһи суолугар иин хаһааччы бэйэтэ ииҥҥэ түһүөҕэ, дьоҥҥо тааһы үҥкүрүтээччи бэйэтэ тааска баттатыаҕа.

²⁸ Түөкэй киһи үктэтэр дьонун абааһы көрөр, ньылаҥ эмиэ охторгун оҥорор.