Maleko 8 - Yaubada wasana: Buka Hauhauna tupwana

Yesu tamowai 4,000 ye hekaidi

¹ Huya hesau boda se tupagogoiꞌuyoma na nige kadi kai. Ede Yesu yona hekahekatao ye yoganedi na ye hededelau udiyedi ye wane,

² “Bodalakilaki ta ya katekamkamnaedi, matawuwuna mayadai haiyona maiyaguwao ka miyamiya na nige saha hesau ye miya bena kabo se kai.

³ Ena taba ma hasalidi na ya hetamalidi, meta kabo keda ne unai matadi se kamumu na se guli, matawuwuna hekadiyo kedalohaloha udiyedi se laoma.”

⁴ Na yona hekahekatao se hededelau unai se wane, “Teina balabalagaibu. Haedi kabo kai ta hai na bodalakilaki ta ta hekaidi?”

⁵ Yesu ye henamailau udiyedi ye wane, “Kami pwalawa hisa?” Siya se wane, “Haligigi-labui.”

⁶ Na ye hedede boda wa se tuli bwatano unai. Na kabo pwalawa haligigi-labui wa ye haidi na Yaubada ye lautokiyei, na kabo ye kihidi na ye mosedi yona hekahekatao udiyedi, na se soiyedi.

⁷ Yo hinage yona hekahekatao yama gagilidi hekadi kalidiwai, ede Yaubada unai ye lautokiꞌuyo, na kabo ye mosedi na se soiyedi.

⁸ Maudoidi se kaikai na bogadi se sese. Yesu yona hekahekatao kaitole wa se tanogogoidi, meta bosa haligigi-labui se hemwayaudi.

⁹ Taukaikai wa badodi ede nuwana 4,000. Na kabo ye hetamalidi se lau.

¹⁰ Na yona hekahekatao wa maiyanao se gelumwamwayau se lau Dalemanuta magaina tehana unai.

Paliseya tamowaidi hekihekinoi se kaibwadai

¹¹ Na Paliseya tamowaidi se laoma na se hetubu Yesu maiyadi se haikawayagala. Se henuwa bena Yesu se laukita, unai galewa hekihekinoina se kaibwadai kalinawai.

¹² Yesu nuwana ye kamkamna na ye wane, “Matawuwuna saha to teina isi ta hekihekinoi se kaibwadai? Ya hededemamohoi, taba nige hekihekinoi hesau ya ginauli teina komiu kalimiuwai.”

¹³ Na kabo ye laugabaedi na waga wa unai ye geluꞌuyo na ye lau hali tanakawasi ne.

Paliseya yo Heloda yodi yisti debanawai Yesu yona hekahekatao ye guguyaidi

¹⁴ Yesu yona hekahekatao nuwadi se luluhi na nige kai se bahei, na pwalawa kesega mo waga wa unai.

¹⁵ Yesu ye guguyaidi ye wane, “Kwa nanabu! Tabu Paliseya yo Heloda yodi yisti udiyedi se lupohaigomiu!”

¹⁶ Na siya se bom yodi se hedehedede se wane, “Doha teina ye hedehedede matawuwuna ede nige pwalawa ta bahei.”

¹⁷ Yodi hedehedede wa Yesu ye lapui ede ye wane, “Idohagi to kwa wane, ‘Nige pwalawa ta bahei’? Nuwana sola nige kwa kitalobai yo nuwamiu sola nige se masalaha? Idohagi to kwa nuwakwailolo?

¹⁸ Idohagi to matamiu udiyedi nige kwa kita yo beyamiu udiyedi nige kwa lapui? Taba saha ye tubutubu wa kwa nuwatui!

¹⁹ Huyana pwalawa haligigi ya kihidi na tamowai 5,000 ya hekaidi meta kaitoledi wa bosa hisa kwa usahemwayaudi?” Siya se wane, “Saudoudoi-labui.”

²⁰ “Yo pwalawa haligigi-labui ya kihidi na tamowai 4,000 ya hekaidi, na kaitoledi wa meta bosa hisa kwa usahemwayaudi?” Se wane, “Haligigi-labui.”

²¹ Kabo Yesu ye hededelau udiyedi ye wane, “Unai yisti hedehededena wa taba kwa nuwatulobai!”

Yesu tamowai matagibugibuna hesau ye henamwanamwa

²² Na kabo Yesu maiyana hekahekatao se lage Betesaida. Temenai tamowai hesau matagibugibuna se woyaiyama Yesu unai na se kaibwadai bena ye kabilau iya unai.

²³ Yesu tamowai matagibugibuna wa nimana unai ye kabi ye woyalae magai dagelana unai. Na kabo Yesu ye kaisolau tamowai wa matana unai na nimana ye tolesae na ye wane, “Saha hesau ku kita e nige?”

²⁴ Tamowai wa ye kaikewatakikili na ye wane, “Tamowai ya kitadi kadi kao doha kaiwa se taitaihileꞌusi.”

²⁵ Yesu nimana ye tolesaeꞌuyoi tamowai wa matana unai. Na matana wa se lala yo se nega. Ede kabo ginauli maudoidi ye kitanamwanamwaedi.

²⁶ Na Yesu tamowai wa ye hetamali ye lau yona magai na ye wane, “Tabu ku uyo magai ne unai.”

Petelo Yesu ye hededehemasalaha meta iya Keliso

²⁷ Na kabo Yesu maiyana hekahekatao se lau magai udiyedi Sisaliya Pilipi dedekana unai. Yodi kabalau ne unai Yesu ye henamaiyedi ye wane, “Tamowai saha se hedehedede, yau meta kaiteya?”

²⁸ Siya Yesu kalinana se bui se wane, “Hekadi se wane, Yowane Babatiso, na hekadi se wane, Eliya. Hekadi se wane, peloweta hesau.”

²⁹ Unai kabo ye henamaiyedi, “Na komiu kabo saha kwa hedede, yau meta kaiteya?” Na Petelo ye wane, “Kowa meta Keliso.”

³⁰ Ede Yesu ye guguyaidi bena tabu tamowai hesau yona se hedehedede.

Yesu yona boita yo toloꞌuyo ye hededehemasalaha

³¹ Na kabo Yesu ye hetubu yona hekahekatao ye hekatadi meta Tau Natuna kabo ye kamkamna ginauli maudoidi udiyedi. Na tamowai lakilakidi, taukaitalasam babadadi, yo laugagayo taulauhekata iya kabo se laukwatakwataei, na kabo se unuhemwaloi, na mayadai haiyona mulidiwai kabo ye toloꞌuyo.

³² Yesu ye hededehemasalahanamwanamwaei, unai Petelo Yesu ye woyahesuwala na ye wane, “Tabu temeta doha ku hedehedede.”

³³ Yesu ye tolobui ye kitalau yona hekahekatao wa udiyedi na ye hededebayao Petelo unai ye wane, “Ku tausuwalawa, kowa Satani. Temeta nuwatu me nige Yaubada unai ye laoma, na tamowai siya yodi nuwanuwatu.”

Yesu idohagi hemuhemuliwatanina

³⁴ Na kabo boda wa ye yoganedi se laoma yona hekahekatao maiyadiyao na ye hededelau udiyedi ye wane, “Ena kaiteya ye henuwa bena ye hemuliwatanigau, meta taba tanoubu ta maulina ye nuwagabaei, yona sataulo ye bahei na ye hemuliwatanigau.

³⁵ Ena tanoubu ta maulina ye gadosisiyei, meta yona mauli namwanamwana kabo ye tauwadam. Ena tanoubu ta maulina ye nuwagabaei yau yo ewaneliya debamaiwai, kabo mauli namwanamwana ye lobai.

³⁶ Taba tamowai hesau tanoubu ginaulidi maudoidi ye haidi, na yona mauli namwanamwana ye tauwadam, meta yona namwa saha?

³⁷ Saha namwanamwana unai kabo yona mauli ne ye haiꞌuyoi?

³⁸ Ena hesau teina isi ganaganawalina yo yabayababana ta unai ye mwadineigau yo yogu hedehedede ta unai ye mwadine, Tau Natuna hinage kabo ye mwadinei huyana Tamana yona namanamali unai ye uyoma maiyana yona anelu tabudiyao.”