Pakɔsje 114 - Maktub gə́ To gə Kəmee

Pakɔs ndɔ ra naḭ Pag’g

¹ Loo gə́ Israɛlje d’unda loo mee ɓee gə́ Ejiptə’g teḛ lé Loo gə́ gel-bɔje lə Jakob D’unda rɔ dee ɓad rɔ koso-dəwje gə́ takɔji dee to ɓəd’g tɔ ndá

² Dɔ naŋg ɓee gə́ Juda tel to loo-si Njesigənea̰ gə́ to gə kəmee doi ləm, Ɓee gə́ Israɛl tel to dɔ naŋg ləa ləm tɔ.

³ Baa-boo-kad lé oo né neelé ndá Aḭ aw əw ləm, Man baa gə́ Jurdɛ̰ lé kara Rəm ula gə́ gogo ləm,

⁴ Mbalje lé tal jagəra-jagəra to gə́ bàl bya̰je bèe ləma, Dɔ diŋgri mbalje lé kara tal jagəra-jagəra asəna gə ŋgan badje bèe ləm tɔ.

⁵ I Baa-boo-kad lé See ɗi ɓa rai ɓa aḭ aw əw bèe wa. Esé i mán baa gə́ Jurdɛ̰ lé See ɗi ɓa rai ɓa i rəm ula ne gə́ gogo ɓəi wa.

⁶ Seḭ mbalje lé See ɗi ɓa ra sí ɓa talje jagəra-jagəra to gə́ bàl bya̰je bèe wa. Esé seḭ dɔ diŋgri mbalje lé See ɗi ɓa ra sí ɓa tel talje jagəra-jagəra asəna gə ŋgan badje ne ɓəi wa.

⁷ Ǝi naŋg, maji kari unda bala tigi-tigi no̰ Mbaidɔmbaije’g Gə́ to Ala lə Jakob.

⁸ Yeḛ lé ar biri mbal tel to duu-mán ləm, Biri mbal gə́ kədərə kaw-kaw lé kara Aree tel to kəm-rəw-mán gə́ aḭ kuji-kuji ləm tɔ.