Misee 7 - Maktub gə́ To gə Kəmee

Ta no̰ lə njetegginta

¹ Meeko̰ oso dɔm’g! Mbata ma m’to m’asəna gə dəw Gə́ aw mba kinja kandə kag naḭkuli bèe ləm, M’to m’asəna gə njekaw ɓuru tor kandə nduú’g bèe ləm tɔ: Néɓuru gə́ ka̰ sɔ lé godo ləm, Kandə kodé gə́ doŋgɔr gə́ məəm ndigi lé godo ləm tɔ.

² Dəw gə́ njemeemaji godo mee ɓee’g ləm, Dəw gə́ njera nédanasur godo mbuna dəwje’g ləm tɔ, Deḛ lai d’um loo gə mba kila məs, Ar nana kara iya gum gə mba kwa ne ŋgokea̰.

³ Ji dee adə lam-lam gə mba ra ne némajel, Mbaije gə njégaŋ-rəwtaje dəji néndogo-gel Ɓa gə mba ra ne né gə́ maji ləm, Dəwje gə́ boi lé riba dɔ mal nékiŋga Gə́ ra dee ŋgwɔd-ŋgwɔd ləm tɔ, Yee ɓa d’ɔm ne na̰’d téréré dɔ néra dee’g.

⁴ Dəw gə́ maji ur dɔ dee’g mbuna dee’g lé To asəna gə kun pɔrɔrɔ bèe ləm, Dəw gə́ danasur ur dɔ dee’g lé Majel ur dɔ kun’g ləm tɔ. Ndɔ gə́ bo̰ néra sí a kɔs ta sí’g Gə́ njéteggintaje lə sí d’ila mberee lé nai dəb ba ŋga. Yee gə́ bèe ɓa seḭ lai meḛ sí to ne kəgəgə mba̰.

⁵ Maji kar sí ɔmje meḛ sí dɔ baokuraje’g lə sí el ləm, Ǝsjeta dɔ njékṵda sí dan kəm dee’gje el ləm tɔ. Deḛ gə́ seḭ sə deeje toje mee kəi’g lé Maji kar sí ŋgəmje ta sí no̰ dee’g.

⁶ Mbata ŋgon gə́ diŋgam ula sul dɔ bɔbeeje’g ləm, Ŋgon gə́ dené ɔs ta lə kea̰je rəw ləm, Njeməm gə́ dené ɔs ta lə məmeeje gə́ dené rəw ləma, Njémeekəije kara to njéba̰je lə njekəi ləm tɔ.

⁷ Ma ndá m’a tel kəm par gə́ rɔ Njesigənea̰’g ləm, M’a kunda məəm yel gə́ dɔ Ala gə́ to njekajim ləm tɔ, Ala ləm a koo ndum ya.

Meekundayel gə tamaji lə koso-dəwje

⁸ Seḭ njéba̰je lə sí lé, maji kar sí alje rɔ sí Wɔjije ne dɔ síjeḛ el Mbata jeḛ j’oso ya Nɛ j’a kḭje ta ɓəi. Ɓó lé j’isi dan loondul’g kara Njesigənea̰ a to lookàr lə sí ɓəi.

⁹ Jeḛ j’waje meḛ sí mbidi n’tije dɔ oŋg’d lə Njesigənea̰ Mbata jeḛ n’raje kaiya j’ɔsje ne ta ləa rəw ya, Saar loo gə́ yeḛ a koso gel sí’g Kɔr ne ta lə sí gə goo rəbee lé Yeḛ a kɔr no̰ sí teḛ sə sí dan lookàr’g ləa Ndá j’a kooje néra gə́ gə dɔ najee ləa.

¹⁰ Njéba̰je lə sí lé d’a kée ndá Rɔkul a dəb dɔ dee’g, Deḛ gə́ dəji sí pana: See Ala lə sí gə́ Njesigənea̰ lé si ra ɓəi wa lé, Loo gə́ d’a mbula dee naŋg gə gɔl dee to gə́ bɔrɔ gə́ kila-rəwje’g bèe ndá Kəm sí a koo dee gə rɔlel ɓa.

¹¹ Ndɔ gə́ d’a tel kunda ndògo-bɔrɔje lə sí gogo ndá Mee ndəa’g neelé d’a kila kəm-rəw-nimje lə sí dɔ maree’g.

¹² Mee ndəa’g neelé ŋgako̰ síje d’a tel ree rɔ sí’g, D’a kḭ Asiri gə ɓee-booje gə́ Ejiptə ləm, Un kudee Ejiptə saar teḛ ne ta baa’g ləm, Un kudee ta baa-boo gə́ kára saar teḛ ne baa-boo gə́ raŋg’d ləma, Un kudee dɔ mbal gə́ kára saar teḛ ne dɔ mbal’d gə́ raŋg’d ləm tɔ.

¹³ Ges ɓee gə́ nai lé a tel to dɔdilaloo Mbata dəwje gə́ d’isi keneŋ Mbata lə kandə néra gə́ yèr lə dee lé.

¹⁴ Maji kari ul koso-dəwje ləi gə kag gə́ ɗugu ləi, Deḛ gə́ to koso-nékulje gə́ to nékaḭ lé Deḛ gə́ d’isi gə kar dee ba dan mee kag-kɔr gə́ Karmel! Maji kar dee tel d’o̰ mu gə́ Basan gə Galaad To gə́ d’o̰ ne kédé bèe ya.

¹⁵ N’a kar sí ooje némɔrije To gə́ mee ndəa gə́ kédé gə́ seḭ undaje ne loo mee ɓee gə́ Ejiptə teḛje lé.

¹⁶ Ginkoji dəwje gə raŋg d’a koo ndá Rɔkul a dəb dɔ dee’g Gə dɔ nésiŋgamoŋje’g lə deḛ lai, D’a kwa ta dee sud si ta dee mundu ləm, Mbi dee a kudu jig-jig ləm tɔ.

¹⁷ D’a munu nduji naŋg to gə́ li bèe ləm, To gə́ néje gə́ d’ag naŋg gə ta mee dee bèe ləm tɔ: D’a kḭ kəi-kaar-kɔgərɔje’g lə dee Kunda loo teḛ gə kəm ɓəl ləm tɔ, D’a ɓəl kunda bala tigi-tigi no̰ Njesigənea̰, Ala’g lə sí ləm, D’a ɓəl sí ləm tɔ.

¹⁸ See Ala gə́ raŋg gə́ njekar mée oso lemsé dɔ néra gə́ kori-kori’g ləm, Gə njekar mée wəi dɔ kaiyaje’g Le ges dəwje gə́ to nékea̰je ləm tɔ lé ɓa ra wa. Yeḛ ŋgəm oŋg ləa saar-saar gə no̰ el Mbata meekoso lemsé ɓa taa kəmee ya.

¹⁹ Mée a kaw taḭ-taḭ gə mbata lə sí ya ɓəi ləm, Yeḛ a tuba néra kori-korije lə sí gə gɔlee ləm tɔ. I a kɔm kaiyaje lə sí lai gel baa-boo-kad’g.

²⁰ I a riba dɔ meenda londoŋ ləi kar Jakob ləm Gə dɔ meenoji ləi kar Abrakam ləm tɔ To gə́ i man ne rɔi ar bɔ síje-je kédé gə́ ləw lé ya tɔ.