Gosota-Kəmkàrje 9 - Maktub gə́ To gə Kəmee

Kəmkàr lé ɓar-ɓar

¹ Kəmkàr lé ra kəi ləa, Yee tɔl gaji-ŋgɔ-kagje ləa siri.

² Yeḛ tḭja gwɔs nékulje ləa ləm, Pélé mán-nduú ləa mḭ na̰’d ləma, Gɔl loo-nésɔ ləa ləm tɔ.

³ Yee ula ŋganjélookisije ləa gə́ dené Tɔɓəi yee ra né wəl dɔdərlooje Gə́ ndəw’g lə ɓee-boo lé pana:

⁴ Maji kar dəw gə́ gər né el lé Tel ree nee! Yee ula deḛ gə́ kəmkàr na meḛ dee tas pana:

⁵ Gə́ reeje, o̰je muru ləm ləm, Aije mán-nduú gə́ mḭ gə́ m’pélé na̰’d ləm tɔ,

⁶ Maji kar sí ubaje négərel lé yá̰je Ndá a síje tɔɓəi Seḭ a njaaje dan rəw’g lə gosonégər!

Njekəmkàr gə njebeelé

⁷ Yeḛ gə́ ndaŋg njekula sul dɔ loo’g lé D’ə̰jee gə́ kḛji, Yeḛ gə́ wɔji njemeeyèr kəmkàr lé Iŋga rɔkul boo tɔ.

⁸ Maji kari ndaŋg njekula sul dɔ loo’g el Nà yeḛ a kḛjii bəḭ-bəḭ, Maji kari ndaŋg njekəmkàr ɓa Yeḛ a kundai dan kəmee’g.

⁹ Ndoo njekəmkàr ta ndá Kəmee a kàr kunda nje gə́ kédé, Ndoo njemeekarabasur ta ndá Négər ləa a kḭ dɔ maree’d gə́ kédé-kédé tɔ.

¹⁰ Ɓəl Njesigənea̰ Ɓa gə́ gin kəmkàr gə́ dɔtar, Négər lə njémeendaje lé Ɓa gə́ gosonégər tɔ.

¹¹ Mbata mbɔl dɔm-ma ɓa ndɔje ləi D’a bula kunda ne njé gə́ kédé ləm, Ləbje gə́ ka̰ si kəmba ləi kara D’a kḭ ne dɔ maree’d gə́ kédé-kédé ləm tɔ.

¹² Ɓó lé i to njekəmkàr ndá I to njekəmkàr mbata ləi-i ya, Ɓó lé i to njekula sul dɔ loo’g ndá Bea̰ a kɔs tai’g gə kari ba ya.

Mbə-dəw ɓar-ɓar to

¹³ Mbə-dené lé to njetaɓar ləm, Gə njegərnéel gə́ gər gin né kára kara el ləm tɔ.

¹⁴ Yeḛ si tarəwkəi’g ləa ləm, Dɔ kag-siée’g dɔ dɔdərlooje Gə́ ndəw’g lə ɓee-boo,

¹⁵ Gə mba ɓar dee-deḛ gə́ dəs tar, Deḛ gə́ d’aw sur rəw-kaw dee’g pana:

¹⁶ Maji kar dəw gə́ gər né el lé Tel ree loo gə́ nee’g! Yeḛ ula dəw gə́ kəmkàr na mée tas pana:

¹⁷ Manje gə́ ɓogo dee lé kul yururu ləm, Muru gə́ loo ŋgəḭ’g lé lel jula-jula ləm tɔ!

¹⁸ Nɛ debee neelé gər to gə́ lée neelé To loo lə njé gə́ d’wəi bèe el ləm, Deḛ gə́ yeḛ ɓar dee lé kara Yeḛ gər to gə́ d’isi wəl-looje’g Le njé gə́ d’wəi lé el ləm tɔ.