Gosota-Kəmkàrje 3 - Maktub gə́ To gə Kəmee

Kəmkàr gə kila ŋgonkoji dɔ Ala’g lé

¹ Ŋgonəm, ar məəi wəi dɔ taje’d Gə́ ma m’ndooi lé el, Maji kari ŋgəm godndumje dɔ ɓəŋgəri’g,

² Yee ɓa a kar ndɔje ləi Gə ləb si kəmbaje ləi d’ḭ ne dɔ maree’d gə́ kédé-kédé ləm, Meelɔm ləi kara a k’ḭ ne dɔ maree’g ləm tɔ.

³ Maji kar meemaji gə ŋgonkoji d’ubai d’ya̰’i el, Tɔ dee gwɔsi’g ləm, Ndaŋ dee dɔ ɓəŋgəri’g ləm tɔ.

⁴ Togə́bè ɓa i a kiŋga ne meenoji Gə takə̰ji gə́ maji kəm Ala’g lé ləm, Gə kəm dəwje’g ləm tɔ.

⁵ Ɔm məəi jəb-jəb dɔ Njesigənea̰’g Ɓó nduna rɔi dɔ négər’g ləi-i el.

⁶ Maji kari gəree rəw-kabije’g lai Ndá yeḛ a kar kila-rəwkabije d’asəna rai-rai.

⁷ Maji kari oo rɔi gə́ njekəmkàr el, Ɓəl Njesigənea̰ ndá Unda rɔi ɓad dɔ néra gə́ majel’g.

⁸ Yee ɓa kuburu-rɔije D’a ŋgəŋ ne ŋgəŋ-ŋgəŋ ləm, Siŋgarɔije d’a kul ne lɔm-lɔm ləm tɔ.

⁹ Tədkag Njesigənea̰ gə némajije ləi ləm, Gə néje gə́ doŋgɔr lai gə́ i iŋga dee ləm tɔ.

¹⁰ Togə́bè ɓa damje ləi d’a rusu tub-tub ləm, Dura mán-nduúje ləi kara d’a rusu tub-tub ruba naŋg pɔ-pɔ ləm tɔ.

¹¹ Ŋgonəm, maji kari ə̰ji takwɔji-kəmkàr Le Njesigənea̰ lé bəḭ-bəḭ el ləm, Ar məəi ila kas bilim Loo gə́ yeḛ ndaŋgi dɔ néraije’g el ləm tɔ .

¹² Mbata yeḛ gə́ Njesigənea̰ Undá dan kəmee’g ɓa Yeḛ wɔjee kəmkàr asəna gə ŋgon gə́ mee bɔbeeje lelee dəa’g bèe.

Kəmkàr gə si dan maji’g

¹³ Rɔlel nai gə dəw gə́ iŋga kəmkàr ləm, Gə dəw gə́ tel to njegosonégər ləm tɔ.

¹⁴ Mbata né gə́ yeḛ iŋga keneŋ lé Maji ur dɔ larnda’g ləm, Némaji gə́ yeḛ iŋga keneŋ kara Ur dɔ larlɔr’g ləm tɔ.

¹⁵ Yee lé gadee ur dɔ mərkwɔjije’g ləm, Majee ur dɔ némajije’g ləi lai ləm tɔ.

¹⁶ Kur ndɔje (lə dəw) lé To mee jikɔlee’g ləm, Nébao gə rɔnduba lé kara To mee jigelee’g ləm tɔ.

¹⁷ Rəwje ləa lai to rəwje gə́ ar mee dəw lelee ləm, Kila-rəwje ləa lai lé kara To kila-rəw meelɔmje ləm tɔ.

¹⁸ Yee to kag-kəmə mbata deḛ lai Gə́ d’wá gə ji dee ləm, Deḛ gə́ d’wá ga̰ lé kara Rɔ dee lel dee ne ləm tɔ.

¹⁹ Gə goo kəmkàr ɓa Njesigənea̰ Unda ne naŋg nee ləm, Gə goo gosonégər lé ɓa Yeḛ ar dara to ne njaŋg ləm tɔ,

²⁰ Gə goo gosonégər ləa ɓa Ta ɓul-manje to ne tag ləm, Kil-lə-ndi ar mán tàl wa ne naŋg nee ləm tɔ.

Njesigənea̰ aḭ bada dɔ njekəmkàr’g

²¹ Ŋgonəm, maji kari un kəmi rəw Dɔ tandooje’g neelé el. Maji kari aa dɔ kəmkàr Gə dɔ ta gə́ la̰ji toree məəi’g ləm tɔ.

²² Deḛ d’a to kəmə ləi ləm, D’a to nékura gə́ bə̰dərə bə̰ Gə́ to gwɔsi’g ləm tɔ.

²³ Togə́bè ɓa I a nda ne məəi kaḭ dɔ rəw-kabi’g ləm, Né kára kara a tuga gɔli keneŋ el ləm tɔ.

²⁴ Loo gə́ i to naŋg ndá I a ɓəl né kára kara el ləm, Loo gə́ i a to naŋg lé I a toɓi gə meelɔm ya ləm tɔ.

²⁵ Maji kari ɓəl néɓəl-boo Gə́ a teḛ wai el ləm, Gə kuba naŋg bus lə njémeeyèrje el ləm tɔ.

²⁶ Mbata Njesigənea̰ ɓa a to nékɔm mee dɔ’g ləi ndá Yeḛ a ŋgəm gɔli kar gum wai el tɔ.

Kunda mari dan kəmi’g

²⁷ Loo gə́ i askəm ra maji Gə dəw gə́ aw ndòo né jii’g ndá Maji kari maḭ gə rɔi dɔ’g el.

²⁸ Maji kari ula njeboatakəi ləi pana: Aw ɓa gə́ ree ɓəi, Ndá bèlè ɓa m’a kari (né lé) ɓəi, Loo gə́ né to jii’g lé, Maji kari pa bèe el.

²⁹ Loo gə́ njeboatakəi ləi si lɔm mbɔri’g ndá Maji kari wɔji-kwɔji ra səa né gə́ majel el.

³⁰ Loo gə́ dəw ra səi né gə́ majel el ndá Maji kari kɔl səa gə mḭdé ba el.

³¹ Dəw gə́ njera né kərm-kərm lé Maji kar kəmi əḭ dəa’g el ləm, Maji kari un rəw-kabeeje kára kara Mba njaa keneŋ el ləm tɔ.

³² Mbata dəwje gə́ njéra né kori-korije lé Njesigənea̰ oo dee gə́ né gə́ mina̰ Nɛ yeḛ to baokura lə dəwje gə́ njéra nédanaje.

³³ Ndɔl lə Njesigənea̰ To mee kəi’g lə njémeeyèrje Nɛ yeḛ tɔr ndia dɔ loo-si njémeekarabasurje’g.

³⁴ Yeḛ ula sul dɔ njékula sul dɔ mar deeje’g Nɛ yeḛ wa noji gə njékula dɔ deeje.

³⁵ Njékəmkàrje lé Rɔnduba ɓa d’a kwa gə́ nénduba lə dee Nɛ mbəje lé rɔkul ɓa gə́ né ka̰ dee-deḛ ya.