Gosota-Kəmkàrje 2 - Maktub gə́ To gə Kəmee

Kəmkàr ɔg sí dɔ néra gə́ majel’g

¹ Ŋgonəm, ɓó lé i taa taje ləm ləm Ŋgəm godndumje məəi’g ləm,

² Ɓó lé i ur mbii gèŋ dɔ takəmkàr’g Ar məəi ndolè goo gosonégər ləm,

³ Ɓó lé i ɓar kəmkàr Ɔr ndui gə́ tar wəl gə́ rɔ gosonégər’g ləm,

⁴ Ɓó lé i saŋgee to gə́ saŋg ne larnda ləma Ndolè gée to gə́ nébao bèe ləm tɔ ndá

⁵ Yen ɓa i a gər loo ɓəl Njesigənea̰ ləm, Kəmi a kinja dɔ gər ndaa Ala’g lé ləm tɔ.

⁶ Mbata Njesigənea̰ ɓa Ar dəw kəmkàr, Tea-yeḛ nja ɓa négər Gə gosonégər d’ḭ keneŋ,

⁷ Kəmkàr gə́ ka̰ teḛkɔr lé Yeḛ unda kul mbata lə dəwje Gə́ njéra nédanaje ləm, Yeḛ to dər-rɔ lə deḛ gə́ panjaa dee To gə goo rəbee ləm tɔ

⁸ Gə mba ŋgəm ne kila-rəwje Gə́ ka̰ néra gə́ gə dɔ najee ləm, Gə mba gəd ne majikojije ləa Dɔ rəw-kaw dee’g ləm tɔ.

⁹ Bèe ɓa i a gər ne néra gə́ gə dɔ najee ləm Gə goo rəbee ləm, gə néra gə́ danasur ləma Gə goo rəw gə́ rara kara gə́ maji ləm tɔ.

¹⁰ Mbata kəmkàr a ree məəi’g ləm, Négər a kari rɔlel ləm tɔ.

¹¹ Ta gə́ i iya məəi’g lé A kaa dɔi kər-kər ləm, Gosɔnégər a ŋgəmi maji ləm tɔ

¹² Gə mba kɔri ne rəw né gə́ majel’g Kilai tar ləm, gə ji dəw’d Gə́ njepata kori-kori ləma,

¹³ Gə ji deḛ gə́ d’uba kila-rəwje Gə́ danasur d’ya̰ Gə mba njaa ne dan rəwje’d gə́ ndul njudu-njudu ləm tɔ.

¹⁴ Deḛ gə́ d’iŋga rɔlel loo ra né gə́ majel’g D’ar rɔ dee lel dee dɔ néra gə́ kori-kori’g ləm,

¹⁵ Deḛ gə́ rəwje lə dee ɔr goŋ ləm Gə kila-rəwje lə dee nduni koŋ-koŋ ləm tɔ,

¹⁶ Gə mba kɔri ji dené gə́ raŋg’d, Dené gə́ to kaḭ el gə́ njepa taje gə́ rii.

¹⁷ Yeḛ gə́ uba ŋgawkasee yá̰ Ar mée wəi dɔ ta manrɔ’g lə Ala ləa lé,

¹⁸ Mbata kəi ləa to podè gə́ loo-yoo’g ləm, Rəw-kabeeje aw njal Teḛ ɓee lə njé gə́ d’wəi’g ləm tɔ,

¹⁹ Dəw kára kara mbuna deḛ gə́ D’aw rəa’g lé tel ree el ləm, Esé tel iŋga kila-rəwje Gə́ ka̰ kisi gə kəmə lé gogo el ləm tɔ.

²⁰ I lé a njaa togə́bè rəw-kaw dəwje’d Gə́ njéra némajije ləm, I a ŋgəm kila-rəw-kaw njémeekarabasurje ləm tɔ.

²¹ Mbata dəwje gə́ njéra nédanaje Ɓa d’a si mee ɓee’g ləm, Dəwje gə́ njéra né gə goo rəbeeje lé Ɓa d’a nai keneŋ ləm tɔ.

²² Nɛ njémeeyèrje lé D’a kɔr dee mee ɓee’g ləm, Deḛ gə́ to majikojije el kara D’a tɔs dee rɔd-rɔd Tɔr dee keneŋ ləm tɔ.