Gosota-Kəmkàrje 1 - Maktub gə́ To gə Kəmee

¹ Gosota-kəmkàrje lə Salomo̰, ŋgolə Dabid, mbai gə́ Israɛl.

² Gə mba gər kəmkàr gə tandoo ləm, Gə mba ndoo ne gintaje Gə́ ka̰ gosonégər ləm tɔ,

³ Gə mba kiŋga tandoo Gə́ askəm kar kəmi àr ləm, Néra gə́ gə dɔ najee ləm, Kɔrkəmta gə́ gə goo rəbee ləma, Néra gə́ danasur ləm tɔ,

⁴ Gə mba kar deḛ gə́ meḛ dee tɔ kujitar el lé Gər kɔr kəm né ləm, Gə mba kar basa gər ne né Karee la̰ji ne toree mée’g ləm tɔ.

⁵ Maji kar njekəmkàr oo ta ndá A kila ne négər ləa dɔ maree’g ləm, Yeḛ gə́ to njegosonégər lé kara A gər ne goso ra ne né ləm tɔ.

⁶ Gə mba gər gin gosota-kəmkàrje lé Esé nénaa gə́ to loo-kiya’g ləm, Gə tapa njékəmkàrje ləma, Gə taje lə dee gə́ to loo kiya’g ləm tɔ.

⁷ Ɓəl Njesigənea̰ ɓa To gin gosonégər gə́ dɔtar, Mbəje lé d’ə̰ji takəmkàr Gə tandoo lé bəḭ-bəḭ.

Məəi dɔ rɔi’g mbata basaje gə́ njémeeyèrje

⁸ Ŋgonəm, oo tandoo lə bɔbije ləm, Ɔs godndu kɔinje rəw el ləm tɔ,

⁹ Mbata to dɔgugu-noji gə́ ka̰ kula dɔi’g ləm, Gə nékuraje gə́ ka̰ kɔm gwɔsi’g ləm tɔ.

¹⁰ Ŋgonəm, ɓó lé njékaiyaje Ndigi su kəmi ndá Maji kari ndigi sə dee dɔ’g el.

¹¹ Ɓó lé deḛ pana: Gə ree aw sə sí! Ar sí j’aw j’umje loo n’tɔl dee ləm, Ar sí j’iyaje gum no̰ dəw’d gə́ ta wa dəa el ləm,

¹² Ar sí n’turu deeje kəmba ya Asəna gə ɓee lə njé gə́ d’wəi bèe ləma, Ar sí n’turu deeje bura Asəna gə deḛ gə́ d’ɔm dee mee bwa’g ləm tɔ.

¹³ Jeḛ j’a kiŋga némajije ɓəd-ɓəd Gə́ gad dee to yaa̰ ləm, J’a kar nébanrɔje rusu mee kəije lə sí njḭ-njḭ ləm tɔ,

¹⁴ I a kiŋga né gə́ wɔji dɔi sə sí na̰’d ləm, Jeḛ lai lé ɓɔl-lar lə sí a to gə́ kára ba ya ləm tɔ.

¹⁵ Ŋgonəm, orè sə dee rəw na̰’d més el ləm, Ila gɔli kila-rəw’g lə dee el ləm tɔ.

¹⁶ Mbata gɔl dee un dee pélé-pélé gə́ loo néra gə́ majel’g ləm, Deḛ d’ɔs rɔ dee ɓad Gə mba kila məs ləm tɔ.

¹⁷ Ɓó lé dəw ila jám no̰ néje’d Gə́ d’aw gə bag dee lé ndá a kila pi,

¹⁸ Deḛ lé darɔ dee-deḛ ya ɓa D’umee gə mba tɔlee ləm, Kisi kəmba lə dee-deḛ ya ɓa D’iya gum nea̰’g ke’n ləm tɔ.

¹⁹ Yee ɓa gə́ néra dəwje gə́ mal kiŋga né gə goo rəbee el lé Wa meḛ dee, Deḛ gə́ d’ula rɔ dee keneŋ mbiriri lé Deḛ tuji ne tɔ.

Ooje ta ndəji kɔr lə Njesigənea̰

²⁰ Kəmkàr ɔr ndia gə tar wəl dan kila-rəwje’g ləm, Yeḛ pata gə ndia gə́ ɓar dó-dò dan looje’g ləma,

²¹ Ndia ɓar ta loo-kunda-bulaje’g Ar dee d’oo tapeaje tarəwkɔgje’d Gə́ mee ɓee-boo’g lé ləm tɔ pana:

²² Seḭ gə́ négər na meḛ sí tas lé See ndɔ gə́ ra ɓa a kəwje rɔ sí raje né Gə́ gə mḭdé ba lé wa. Seḭ njékula sul dɔ loo’gje lé See kula sul dɔ loo’d gə́ lel sí lé A kundaje ŋgaŋgee ndɔ gə́ ra wa. Seḭ mbəje kara see ndɔ gə́ ra ɓa A kundaje ŋgaŋ mbad gər gin né lé wa.

²³ Telje gə́ goo tandəjije ləm gə́ nee! Amje, m’ar ndiləm ɔm dɔ sí’g ləm, M’a kar sí gərje tapamje ləm tɔ.

²⁴ Mbata ma m’ɓar sí Nɛ seḭ mbad reeje ləm, Ma m’ula jim ndiŋ Nɛ dəw kára kara oo gə́ né el ləm,

²⁵ Takwɔji-kəmkàrje ləm lai lé Seḭ ɔsje rəw ləma, Ta̰dəjije ləm lé kara Seḭ ndigije el ləm tɔ lé,

²⁶ Ndá ma nja kara m’a kogo sí Loo gə́ seḭ a síje dan némeeko̰’g ləm, M’a kula sul dɔ sí’g Loo gə́ néɓəl-boo a teḛ dɔ sí’g ləm tɔ.

²⁷ Loo gə́ néɓəl-boo a biri sí Asəna gə lel-boo bèe ləm, Némeeko̰ a kaḭ dɔ sí sub Asəna gə lel-mal bèe ləma, Loo gə́ néurti gə nékila kúla D’a ɓugu na̰ dɔ sí’g ləm tɔ lé ndá

²⁸ D’a ɓarm nɛ m’a kila dee keneŋ el ləm, D’a saŋgəm pir-pir nɛ d’a kiŋgam el ləm tɔ.

²⁹ Mbata deḛ d’ə̰ji négər bəḭ-bəḭ ləm, Deḛ ndigi ɓəl Njesigənea̰ el ləm,

³⁰ Deḛ ndigi takwɔji-kəmkàr ləm el ləma, Ta̰dəjije ləm lai lé kara D’oo gə́ né el ləm tɔ.

³¹ Ndá d’a kul rɔ dee gə kandə né Gə́ ḭ dan panjaa dee’g ləm, Takwɔji-kəmkàrje lə dee-deḛ ya ɓa A kas dee nag-nag ləm tɔ.

³² Mbata kɔs ta rəw lə njégərnéelje lé Tɔl dee ya ləm, Jɔg-rɔ el lə mbəje lé Tuji dee ya ləm tɔ.

³³ Nɛ yeḛ gə́ oo ta ləm ndá A kwa rəa gə meendakaḭ ləm, Yeḛ a si lɔm ɓó A ɓəl né majel kára kara el ləm tɔ.