Esai 41 - Maktub gə́ To gə Kəmee

Dəw gə́ Njesigənea̰ undá rəbə

¹ Seḭ gə́ síje dɔgoré-looje’g lé Maji kar sí síje mundu ooje ta ləm! Maji kar koso-dəwje d’ar siŋga dee ḭ dɔ maree’g ləm, Maji kar dee rəm pər gə mba pata ləm tɔ! Ar sí n’rəmje pər gə mba kɔr kəm ta lə na̰.

² See na̰ ɓa ar dəw gə́ njekur dɔ loo’g unda loo bər teḛ, Yeḛ gə́ ndu kaji ɓar gée’g lé wa. See na̰ ɓa ɔm ginkoji dəwje gə raŋg jia’g ləm, Ar mbaije d’ula dɔ dee nea̰’g ləm tɔ wa. See na̰ ɓa ar kiambas lə dee tel nduji naŋg ləm, Ar ɓandaŋgje lə dee tel to ləm mu gə́ lel ula ne bèe ləm tɔ wa.

³ Yeḛ tuba goo dee dəs gə́ majee aw Gə rəw gə́ yeḛ ila gɔlee keneŋ gɔl kára el ɓəi.

⁴ See na̰ ɓa ra néje neelé Ar dee d’aw lée’g béréré-béréré wa. To yeḛ nja ɓa ɓar ginka dəwje-dəwje kédé gə́ dɔtar. Ma Njesigənea̰ ya m’to yeḛ gə́ dɔtar ləm, M’a to yeḛ gə́ rudu ləm tɔ.

⁵ Deḛ gə́ d’isi dɔgoré-looje’g d’ée Ndá d’isi ne dan ɓəl’g ləm, Deḛ gə́ d’isi gwɔi naŋg’d kara D’unda bala ləm tɔ, Deḛ rəm pər ree nee ya.

⁶ Deḛ la gə na̰ Ar nana kara ula ŋgokea̰ pana: Wa rɔi kɔgərɔ!

⁷ Njetɔl néndaji ula diŋgam mee njelḛ̀ né’g, Yeḛ gə́ njekoo-né gə mo̰ ula diŋgam mee yeḛ gə́ njekunda né dɔ ɗaŋg’d, Yeḛ pa wɔji dɔ né gə́ léer né keneŋ pana: Wa maji ya. Ndá yeḛ ɓər néndaji magə neelé Gə ŋgawlarje gə mba karee oso el.

Ɓasinè, gə́ ɓəlje el

⁸ Nɛ seḭ Israɛlje gə́ toje kuraje ləm, Seḭ ŋgaka Jakob gə́ ma m’ɔr sí, Seḭ ŋgaka Abrakam gə́ m’unda sí dan kəm’g lé.

⁹ Seḭ gə́ m’ɔr sí gwɔi naŋg’d ləm, M’ɓar sí ɓee gə́ əw’g m’ree sə sí ləm tɔ lé M’ula sí m’pana: Seḭ toje kuraje ləm, Ma nja m’ɔr sí ɓó m’uba sí m’ya̰ sí el.

¹⁰ Ɓəlje el Mbata ma m’nai sə sí, Maji kar sí aaje loo gə kəm ɓəl el Mbata ma m’to Ala lə sí, M’a kar siŋga sí ḭ dɔ maree’g ləm, M’a ree la sə sí ləma, M’a gəd sí gə jikɔlm gə́ ɓar mèr-mèr ləm tɔ.

¹¹ Aa ooje, deḛ lai gə́ d’ḭ sə sí lé Kəm sɔḭ gə rɔkul a dəb dɔ dee’g, Deḛ lai gə́ kɔl sə sí lé D’a tel to né gə́ kari ba ləm, D’a tuji pugudu-pugudu ləm tɔ.

¹² Seḭ a saŋg deeje nɛ A kiŋga deeje el, Deḛ gə́ saŋg sə sí ta lé Deḛ gə́ rɔ sə sí kara D’a tel to né gə́ kari ba Gə́ to gə́ né el tɔ.

¹³ Mbata ma m’to Ala lə sí gə́ Njesigənea̰ Gə́ m’ar jikɔl sí to kɔgərɔ-kɔgərɔ. Ma m’to yeḛ gə́ ula sí pana: Ɓəlje el, M’a la sə sí lé ya.

¹⁴ Seḭ njé’g lə Jakob gə́ d’oo sí gə́ ŋgan kuruje lé, Seḭ ges Israɛlje gə́ siŋga sí godo lé Ɓəlje el Njesigənea̰ pana: M’a ree la sə sí, Njemeenda lə Israɛlje to njekaji sí ya.

¹⁵ Aa ooje, ma m’un sí m’ar sí toje Asəna gə gɔl pusu gə́ wɔji dɔ kó Gə́ to gə́ sigi ləm, adə làm-làm ləma, Ŋgaŋgee to keneŋ ləm tɔ. Seḭ a tɔje dɔ mbalje pɔs-pɔs Təd dee ne njigi-njigi ləm, Seḭ a puguduje dɔdərlooje lé naŋg pugudu-pugudu To gə́ ləm mu bèe ləm tɔ.

¹⁶ Seḭ a tó deeje séréré-séréré Ndá lel a kɔr dee kaw sə dee əw ləm, Lel-mal a sané dee kad-kad ləm tɔ. Nɛ seḭje lé seḭ a kalje rɔ sí gə mbata lə Njesigənea̰ ləm, Seḭ a kɔsje gaji rɔ sí wɔji ne dɔ Njerɔkunda lə Israɛlje lé ləm tɔ.

¹⁷ Njénékəmndooje gə njéndooje lé Saŋg mán ndá d’iŋga el, Ta dee tudu kurum-kurum Mbata kṵdaman gə́ tɔl dee Ndá ma Njesigənea̰ m’a koo ndu no̰ lə dee, Ma Ala lə Israɛlje m’a kuba dee kya̰ dee nda̰ el.

¹⁸ M’a kar mán baa ula yal-yal dɔdərlooje’g ləm, Ŋgira manje d’a tuba tir-tir kəm wəlje’g ləm tɔ, M’a kar dɔdilaloo tel to gə́ duu-mán ləm, Naŋg gə́ tudu kurum-kurum lé M’a karee tel to gə́ kəm-rəw-mán ləm tɔ.

¹⁹ M’a kar kag-sɛdrə, gə kag-akasia, Gə bəe, gə koiyo d’uba na̰’d dɔdilaloo’g ləm, M’a kar kag-siprɛs, gə ɗəŋgərə, gə warəm, D’uba na̰’d loo gə́ mán godo keneŋ ləm tɔ,

²⁰ Gə mba kar dee d’oo gər ləm, Kar dee la̰ji toree d’oo njai ləm, Kar dee d’oo to gə́ ji Njesigənea̰ Ɓa ra néje neelé ləma, Njerɔkunda lə Israɛlje ɓa gə́ njegin néje neelé ləm tɔ.

Magəje d’as ra né kára el

²¹ Njesigənea̰ pana: Ɔrje kəm ta lə sí, Mbai lə ŋgaka Jakob pana: Teḛje gə ta lə sí gə́ kəm taa ne dɔ rɔ sí.

²² Maji kar dee teḛ gə taree gə́ raga d’ula sí Né gə́ a gə teḛ. See ta gə́ seḭ paje taree ləw Gə́ wɔji dɔ néje gə́ d’a gə ree lé to ban wa. Paje mba kar sí j’unda ne kəmkàr dɔ rɔ sí’g Gə mba kar sí n’gərje loo gə́ née teḛ, Esé paje ta né gə́ a gə teḛ Ndɔ gə́ gogo ar sí j’ooje.

²³ Paje ta né gə́ a gə ree gogo ar sí j’ooje Gə mba kar sí n’gərje To gə́ seḭ toje gə́ magəje ya, Raje né gə́ maji əsé né gə́ majel ya kara Mba kar sí mbo̰je kəm sí dɔ’g sɔmɔmo̰ j’ooje.

²⁴ Aa ooje, seḭ toje gə́ né el, Kula ra sí to gə́ né gə́ kari ba, Kɔm meḛ sí dɔ sí-seḭ’g lé To né gə́ mina̰ ya.

²⁵ Ma m’ɓar dəw kára par gə́ dɔgel Ndá yeḛ si ree ya, Loo-kuba’g lə kàr lé deḛ ɓar ria keneŋ, Yeḛ mbula njésiŋgamoŋje naŋg To gə́ mbula ne bɔrɔ bèe ləm, To gə́ njekubajo mbɔḭ ne a̰ji bèe ləm tɔ.

²⁶ Un kudee ndɔ gə́ dɔtar lé See na̰ ɓa ila mber mba kar sí n’gərje wa. See na̰ ɓa ula sí taree kédé gə́ ləw Mba kar sí m’pajena: To né gə́ tɔgərɔ ya wa. Dəw kára kara ila mberee əsé pa taree kédé el ləm, Dəw kára kara oo taje lə sí el ləm tɔ.

²⁷ Ma nja ɓa m’to njekula njé gə́ Sio̰ ta doŋgɔr M’pana: Aa oo deeje, yḛ̀ d’aar’n! Ma nja m’ula njé gə́ Jerusalem m’pana: M’ula njekaḭkula kára gə taje gə́ maji.

²⁸ Ma m’aa loo ndá M’oo dəw kára kara el ləm, Ala kára kara mbuna dee’g Gə́ to njekwɔji ta kəmkàr Gə́ askəm kila ta’d gə́ m’dəji dee lé godo ləm tɔ.

²⁹ Aa ooje, deḛ lai to né gə́ kari ba ləm, Kula ra dee to gə́ né el ləma, Magəje lə dee kara to gə́ lel gə́ ula kari ba ləm tɔ.