Esai 28 - Maktub gə́ To gə Kəmee

Njéba̰je gə́ mee kəi’g gə deḛ gə́ d’ḭ raga

¹ Meeko̰ a koso dɔ ɓee-boo gə́ Samari Gə́ to dɔgugu-beelé lə Eprayimje Gə́ to njéra ɓər lə kidoje lé ləm, Gə pudu gə́ to néɗɔi-rɔ dɔ wəl-loo gə́ aar kó’g Gə́ wɔji dɔ deḛ gə́ d’ar kido tɔs dee ndəgərə naŋg lé ləm tɔ.

² Aa ooje, dəw gə́ njesiŋgamoŋ gə tɔgmbaŋ Gə́ ḭ rɔ Njesigənea̰’g si ree Asəna gə ndi gə́ ər ləm, Gə ko̰ ndi gə́ to njetuji loo ləma, Asəna gə lel-boo gə́ ar kəm-rəw-manje d’ula kalaŋ ləm tɔ, Ndá yeḛ tɔsee tilá gə siŋgamoŋgee.

³ Ɓee-boo gə́ Samari Gə́ to dɔgugu-beelé lə Eprayimje Gə́ to njéra ɓər lə kidoje lé D’a tubá naŋg gə gɔl dee,

⁴ Ndá pudu gə́ ndòlé gə́ to néɗɔi-rɔ Dɔ wəl-loo gə́ aar kó’g lé A to kasəna gə kandə kodé gə́ kas Gə́ d’oo kédé ɓa naḭ kḭjá teḛ ɓəi lé Loo gə́ dəw ti wa jia’g ndá Sɔ gə́ lé gən ya.

⁵ Mee ndəa’g neelé Njesigənea̰ gə́ njeboo-néje a to gə́ dɔgugu-ronduba Gə néɗɔi-rɔ mbata lə ges koso-dəwje ləa gə́ nai lé ləm,

⁶ Yeḛ a kar takə̰ji néra gə́ gə dɔ najee Wa meḛ deḛ gə́ d’isi loo-gaŋg-rəwta’g ləma, Yeḛ a to siŋgamoŋ mbata lə deḛ Gə́ d’ɔs njéba̰je rəw saar d’unda dee tarəwɓee’g ləa ləm tɔ.

Njékidoje gə́ d’ula sul dɔ njetegginta’g

⁷ Nɛ deḛ nja kara d’ai mán-nduú d’aw ne jogè-jogè ləm, Nékai gə́ mḭ ar dɔ dee tel ne wagəsa ləm tɔ, Njékinjanéməsje gə njéteggintaje d’aw jogè-jogè dan nékai gə́ mḭ’g ləm, Man-nduú taa rɔ dee pəl-pəl ləm tɔ. Nékai gə́ mḭ ar dɔ dee tel wagəsa ləm, Deḛ d’aw jogè-jogè loo gə́ deḛ tegginta ləm, Deḛ ləŋg dɔ gaŋg rəwta’g ləm tɔ.

⁸ Dɔ tabulje lai lé tɔmé gə néje gə́ majel ɓa taa pəl-pəl Ar loo gə́ tḛ́ bèe kara nai el.

⁹ Deḛ dəji pana: See na̰je ɓa yeḛ ndigi ndoo dee ta kəmkàr wa. See na̰je ɓa yeḛ ndigi ndoo dee ta ndooje wa. See to ŋganje gə́ d’ɔg dee mbà Gə́ d’ya̰ mbà ko̰ deeje ɓa Yeḛ a gə ndigi ndoo dee ne wa.

¹⁰ Mbata to gə́ ndukun kila ndukun dɔ’g, Ndukun kila ndukun dɔ’g ləm, Rəbee kila rəbee dɔ’g, rəbee kila rəbee dɔ’g ləma, Lam teḛ nee, lam teḛ nu ləm tɔ.

¹¹ Yee ɓa dəwje to ne njépa taŋgɔmje gə́ lal gər ginee, Gə njépa takɔjije gə́ raŋg lé Ɓa Njesigənea̰ a kun dee Mba kula ne koso-dəwje neelé ta.

¹² Yeḛ ula dee kédé pana: Aa ooje, loo-kwa-rɔ to nee Ndá ya̰je loo arje yeḛ gə́ dao wa rəa keneŋ, Aa ooje, loo-kwa-rɔ to nee! Nɛ deḛ ndigi koo ta el.

¹³ Deḛ lé ta lə Njesigənea̰ gə́ a kwɔji dɔ dee ɓa nee: Ndukun kila ndukun dɔ’g ləm, Rəbee kila rəbee dɔ’g ləma, Lam teḛ nee, lam teḛ nu ləm tɔ, Gə mba kar loo gə́ d’aw njaa ndá D’oso gaŋnda təd rɔ dee ləm, Gə mba kar dee d’oso wul ba̰də’g Aree wa dee ləm tɔ.

Mbal kunda dɔ kum kəi

¹⁴ Seḭ njékula sul dɔ loo’gje Seḭ gə́ o̰je dɔ koso-dəwje gə́ Jerusalem lé Ooje ta lə Njesigənea̰:

¹⁵ Seḭ pajena: Jeḛ manje rɔ sí j’ar yoo ləm, Jeḛ j’ɔmje ta lə sí na̰’d gə ɓee lə njé gə́ d’wəi ləm tɔ, Loo gə́ néyoo gə́ a kun loo lad-lad a dəs Ndá a teḛ dɔ sí’g el, Mbata taŋgɔmje ɓa gə́ njo̰loo-kula-dɔ lə sí ləm, Néra gə́ gə goo rəbee el ɓa gə́ né gə́ o̰ dɔ sí ləm tɔ.

¹⁶ Gelee gə́ nee ɓa Mbaidɔmbaije gə́ Njesigənea̰ pa togə́bè pana: Aa ooje, ma m’unda mbal gə́ moŋg kəi mee ɓee gə́ Sio̰, To mbal gə́ neán, To mbal kunda dɔ kum kəi gə́ gadee to yaa̰ Gə́ d’unda d’aree to njaŋg, Ndá yeḛ gə́ ɔm mée dɔ’g ndá A ndəb-ndəb kaḭ el.

¹⁷ M’a kar né gə́ danasur to kúla-kwɔji-né ləm, Gə néra gə́ gə dɔ najee a to nékwɔji maree ləm tɔ. Nɛ ndi-kwɔji a tuji njo̰loo-kula-dɔ gə́ ŋgɔm lé ləm, Man-kunda a tur dɔ nékɔn-rɔ Gə́ to néra gə́ gə goo rəbee el lé ləm tɔ.

¹⁸ Manrɔ gə́ seḭ manje rɔ sí gə yoo lé A tuji pugudu ləm, Kɔm gə́ seḭ ɔmje na̰’d gə ɓee lə njé gə́ d’wəi lé kara A godo ləm tɔ. Loo gə́ néyoo gə́ un loo lad-lad a gə dəs ndá Yee a tuba sí gə gɔlee mbajila-mbajila.

¹⁹ Loo gə́ rara gə́ yee a dəs ndá yee a kwa sí, mbata yee a dəs gə ndɔ, gə dan kàrá, gə loondul’g, gə ndɔje kára-kára lai ndá keaa gə́ a ɓar ta kára ba ya a kar dee d’unda ne bala tigi-tigi.

²⁰ Tira a gwɔji ɗugusu ba as ndɔji rɔ keneŋ el ləm, Pal-kubu kila dɔ’g kara a pèrèrè ba as kə́ ne rɔ el ləm tɔ.

²¹ Mbata Njesigənea̰ a kḭ tar To gə́ yeḛ ḭ ne dɔ mbal gə́ Perasim ləm, Oŋg a kḭ səa pu To gə́ ḭ ne səa wəl-loo gə́ Gabao̰ ləm tɔ Gə mba ra kula ləa gə́ to kula gə́ ɓəd ləm, Gə mba tɔl kula ləa gə́ to kula gə́ dəw oo kédé el ləm tɔ.

²² Ɓasinè maji kar sí ya̰je rɔ sí dan nékula sul dɔ’g el nà banelə kúla gə́ d’wa sí ne lé a ŋgəŋ ŋgəŋ-ŋgəŋ. Mbata ta tuji ɓeeje lai lé to njaŋg mba̰, ma m’oo taree rɔ Mbaidɔmbaije gə́ Njesigənea̰ gə́ njeboo-néje’g.

Kəmkàr lə njendɔ gə kəmkàr lə Ala

²³ Urje mbi sí ooje ne ndum! Sije gèŋ ooje ta ləm!

²⁴ Dəw gə́ ra ndɔ gə mba dubu né lé See a ra ndɔ gə́ kédé-kédé wa. See a tɔr kɔr naŋg gə tɔs kɔm tar gə́ kédé-kédé wa.

²⁵ See loo gə́ yeḛ ra ndɔ aree àr ŋgad-ŋgad mba̰ ɓa Yeḛ ila kər-bədərə gə dubu kamnaḭ gə́ ria lə kumin ləm, Yeḛ dubu kó gə goo na̰ goo na̰ ləm, Yeḛ dubu kó-ɔrj ta doa’g ləma, Yeḛ unda teḭ rəw-nimeeje’g ləm tɔ ɓəi el wa.

²⁶ Ala ləa ndée rəw gə́ kəm karee njaa keneŋ ləm, Yeḛ tɔjee néje gə́ kəm ra ləm tɔ.

²⁷ Dəw gə́ a ndɔr kun dɔ kamnaḭ gə́ to kər-bədərə el ləm, Esé a dəs gə gɔl pusu dɔ kamnaḭ gə́ ria lə kumin el ləm tɔ, Nɛ kər-bədərə gə kamnaḭ gə́ ria lə kumin lé Deḛ kunda gə ŋgon kag ɓa səgə-səgə.

²⁸ Deḛ d’ur kó lé gə mba ra muru Nɛ d’usu gə́ kusu el.

²⁹ Né neelé ḭ rɔ Njesigənea̰ gə́ njeboo-néje’g, Ta né gə́ yeḛ wɔji-kwɔji ra lé maji dum ləm, Kəmkàr ləa boo al dɔ loo sula ləm tɔ.