زبور 136 - Sindhi Bible

¹ خداوند جو شڪر ڪريو؛ ڇو جو هو نيڪ آهي: ۽ هن جو رحم هميشہ تائين آهي:

² خدائن جي خدا جو شڪر ڪريو: ڇو جو هن جو رحم هميشہ تائين آهي:

³ خداوندن جي خداوند جو شڪر ڪريو: ڇو جو هن جو رحم هميشہ تائين آهي:

⁴ انهي جو ئي جو اڪيلو وڏا وڏا ۽ عجيب ڪم ٿو ڪري: ڇو جو هن جو رحم هميشہ تائين آهي.

⁵ انهي جو جنهن دانائيءَ سان آسمان جوڙيا: ڇو جو هن جو رحم هميشہ تائين آهي.

⁶ انهي جو جنهن زمين کي پاڻي تي پکيڙيو: ڇو جو هن جو رحم هميشہ تائين آهي.

⁷ انهي جو جنهن وڏيون روشنيون جوڙيون: ڇو جو هن جو رحم هميشہ تائين اهي.

⁸ ڏينهن تي حڪومت هلائڻ لاءِ سج جوڙيائين: ڇو جو هن جو رحم هميشہ تائين آهي:

⁹ رات تي حڪومت هلائڻ لاءِ چنڊ ۽ تارا جوڙيائين: ڇو جو هن جو رحم هميشہ تائين آهي.

¹⁰ انهي جو جنهن مصر جي پهريتن کي ماريو: ڇو جو هن جو رحم هميشہ تائين آهي.

¹¹ ۽ اسرائيل کي انهن منجهان ڪڍي آيو: ڇو جو هن جو رحم هميشہ تائين آهي.

¹² هائو، پنهنجي زوراور هٿ، ۽ ڊگهيريل ٻانهن سان: ڇو جو هن جو رحم هميشہ تائين آهي.

¹³ انهي جو جنهن ڳاڙهي سمنڊ کي چيري ٻہ ڀاڱا ڪيو: ڇو جو هن جو رحم هميشہ تائين آهي.

¹⁴ ۽ اسرائيل کي انهي جي وچ مان پار لنگهايائين: ڇو جو هن جو رحم هميشہ تائين آهي.

¹⁵ پر فرعون ۽ سندس لشڪر کي ڳاڙهي سمنڊ ۾ اُڇلائي ڇڏيائين: ڇو جو هن جو رحم هميشہ تائين آهي.

¹⁶ انهي جو جنهن بيابان ۾ پنهنجي اُمت جي رهبري ڪئي: ڇو جو هن جو رحم هميشہ تائين آهي.

¹⁷ انهي جو جنهن وڏن وڏن بادشاهن کي ماريو: ڇو جو هن جو رحم هميشہ تائين آهي:

¹⁸ ۽ ناليرن بادشاهن کي قتل ڪيائين: ڇو جو هن جو رحم هميشہ تائين آهي:

¹⁹ امورين جي بادشاهہ سيحون کي: ڇو جو هن جو رحم هميشہ تائين آهي.

²⁰ ۽ بسن جي بادشاهہ عوج کي: ڇو جو هن جو رحم هميشہ تائين آهي:

²¹ ۽ انهن جو ملڪ ورثو ڪري ڏنائين: ڇو جو هن جو رحم هميشہ تائين آهي:

²² يعني پنهنجي بندي اسرائيل کي ميراث ڪري ڏنائين: ڇو جو هن جو رحم هميشہ تائين آهي.

²³ جنهن اسان جي ڏک ۾ اسان جي سار لڌي: ڇو جو هن جو رحم هميشہ تائين آهي:

²⁴ ۽ اسان جي دشمنن کان اسان کي ڇڏايائين: ڇو جو هن جو رحم هميشہ تائين آهي.

²⁵ جو سڀني ساهہ وارن کي روزي ٿو رسائي: ڇو جو هن جو رحم هميشہ تائين آهي.

²⁶ آسمان جي خدا جو شڪر ڪريو: ڇو جو هن جو رحم هميشہ تائين آهي.