زبور 124 - Sindhi Bible

¹ هاڻي اسرائيل هيئن چوي، تہ جيڪڏهن خداوند اسان جي پاسي نہ هجي ها؛

² جڏهن ماڻهو اسان جي برخلاف کڙا ٿيا هئا، تڏهن جي خداوند اسان جي پاسي نہ هجي ها:

³ تہ جڏهن انهن جي ڪاوڙ اسان تي ڀڙڪو کاڌو، تڏهن اهي اسان کي جيئرو ئي ڳڙڪائي وڃن ها:

⁴ انهيءَ مهل پاڻيءَ جي اُٿل اسان جي مٿان لنگهي وڃي ها، ۽ اسان جي جان وهڪري ۾ وهي وڃي ها:

⁵ ۽ تکيون لهرون اسان جي جان تان لنگهي وڃن ها.

⁶ شل خداوند مبارڪ هجي، جنهن اسان کي انهن جي ڏندن جو شڪار ٿيڻ نہ ڏنو.

⁷ اسان جي جان ائين ڇٽي ويئي آهي جيئن ڪو پکي ماريءَ جي ڦانڌي مان ڇٽي: ڦانڌي ڇڄي پيئي آهي، ۽ اسين ڇٽي ويا آهيون.

⁸ اسان جي مدد خداوند جي نالي ۾ آهي، جنهن آسمان ۽ زمين کي جوڙيو.