ڳاڻاٽو 29 - Sindhi Bible

¹ ۽ ستين مهيني جي پهرئين ڏينهن اوهين پاڪ جماعت گڏ ڪجو: ۽ ڪوبہ محنت مزوريءَ جو ڪم نہ ڪجو: اهو اوهان جي لاءِ ترين وڄائڻ جو ڏينهن آهي.

² اوهين خداوند جي حضور ۾ وڻندڙ خوشبوءِ جي لاءِ هڪڙي سوختني قرباني چاڙهجو؛ يعني هڪڙو وهڙو، هڪڙو گهٽو، ۽ ست يڪسالا بي عيب گهيٽا:

³ ۽ انهن سان گڏ کاڌي جي قربانيءَ لاءِ، تيل ۾ گڏيل ميدو، هرهڪ وهڙي جي پٺيان هڪڙي ايفہ جون ٽي ڏهايون، ۽ گهٽي جي پٺيان هڪڙي ايفہ جو پنجون حصو.

⁴ ۽ ستن گهيٽن جي لاءِ هرهڪ گهيٽي جي واسطي، هڪڙي ايفہ جو ڏهون حصو:

⁵ ۽ هڪڙو ٻڪر گناهہ جي قربانيءَ لاءِ، تہ اوهان جي لاءِ ڪفارو ٿئي:

⁶ انهي کان سواءِ نئين چنڊ جي سوختني قرباني، ۽ انهيءَ سان گڏ کاڌي جي قرباني، ۽ هميشہ واري سوختني قرباني، ۽ انهيءَ سان گڏ کاڌي جي قرباني، ۽ انهن سان گڏ پيئڻ واريون قربانيون، اهي سڀ سندن قانون موجب پيش ڪندا رهجو، اها وڻندڙ خوشبوءِ جي لاءِ خداوند جي حضور ۾ باهہ سان ساڙيل قرباني آهي.

⁷ انهي ستين مهيني جي ڏهينءَ تاريخ اوهان جي پاڪ جماعت گڏ ٿيندي؛ ۽ اوهين پنهنجي روح جي رياضت ڪجو؛ ۽ ڪنهن بہ قسم جو ڪم نہ ڪجو:

⁸ پر اوهين خداوند جي حضور ۾ وڻندڙ خوشبوءِ جي لاءِ هڪڙي سوختني قرباني چاڙهجو؛ يعني هڪڙو وهڙو، هڪڙو گهٽو، ست يڪسالا گهيٽا؛ اهي سڀ بي عيب هئڻ گهرجن:

⁹ ۽ انهن سان گڏ کاڌي جي قربانيءَ لاءِ تيل ۾ گڏيل ميدو، هرهڪ وهڙي جي لاءِ ايفہ جون ٽي ڏهايون، ۽ گهٽي جي لاءِ هڪڙي ايفہ جو پنجون حصو،

¹⁰ ۽ ستن گهيٽن جي لاءِ هرهڪ گهيٽي جي واسطي هڪڙي ايفہ جو ڏهون حصو:

¹¹ ۽ هڪڙو ٻڪر گناهہ جي قربانيءَ لاءِ؛ هيءَ قرباني، ڪفاري واريءَ گناهہ جي قربانيءَ، ۽ انهن سان گڏ کاڌي جي قربانيءَ، ۽ پيئڻ واري قربانيءَ کان ڌار پيش ڪجو.

¹² ۽ ستين مهيني جي پندرهينءَ تاريخ اوهان جي پاڪ جماعت گڏ ٿيندي؛ ۽ اوهين ڪوبہ محنت مزوريءَ جو ڪم نہ ڪجو، ۽ ست ڏينهن خداوند جي لاءِ عيد ڪجو:

¹³ ۽ اوهين سوختني قربانيءَ لاءِ تيرهن وهڙا، ٻہ گهٽا، چوڏهن يڪسالا گهيٽا، جي سڀ بي عيب هجن، سي خداوند جي حضور ۾، وڻندڙ خوشبوءِ جي لاءِ، باهہ سان ساڙڻ واري قربانيءَ طور پيش ڪجو:

¹⁴ انهن سان گڏ کاڌي جي قربانيءَ لاءِ، تيل ۾ گڏيل ميدو، ۽ تيرهن وهڙن مان هرهڪ وهڙي جي لاءِ هڪڙي ايفہ جون ٽي ڏهايون، ۽ هرهڪ گهٽي جي لاءِ هڪڙي ايفہ جو پنجون حصو،

¹⁵ ۽ چوڏهن گهيٽن جي لاءِ هرهڪ گهيٽي جي واسطي هڪڙي ايفہ جو ڏهون حصو:

¹⁶ ۽ هڪڙو ٻڪر گناهہ جي قربانيءَ لاءِ؛ انهيءَ کان سواءِ هميشہ واري سوختني قرباني، ۽ انهيءَ سان گڏ کاڌي جي قرباني، ۽ پيئڻ واري قرباني بہ پيش ڪجو.

¹⁷ وري ٻئي ڏينهن اوهين ٻارهن وهڙا، ٻہ گهٽا، چوڏهن يڪسالا بي عيب گهيٽا پيش ڪجو:

¹⁸ ۽ انهن سان گڏ کاڌي جي قرباني، ۽ پيئڻ واري قرباني، وهڙن، گهٽن، ۽ گهيٽن جي لاءِ، سندن شمار ۽ قانون موجب پيش ڪجو:

¹⁹ ۽ هڪڙو ٻڪر گناهہ جي قربانيءَ لاءِ؛ انهيءَ کان سواءِ هميشہ واري سوختني قرباني، ۽ انهيءَ سان گڏ کاڌي جي قرباني، ۽ پيئڻ واري قرباني بہ پيش ڪجو.

²⁰ وري ٽئين ڏينهن يارهن وهڙا، ٻہ گهٽا، چوڏهن يڪسالا بي عيب گهيٽا پيش ڪجو؛

²¹ ۽ انهن سان گڏ کاڌي جي قرباني ۽ پيئڻ واري قرباني، وهڙن، گهٽن، ۽ گهيٽن جي لاءِ، سندن شمار ۽ قانون موجب پيش ڪجو:

²² ۽ هڪڙو ٻڪر گناهہ جي قربانيءَ لاءِ، انهيءَ کان سواءِ هميشہ واري سوختني قرباني، ۽ انهيءَ سان گڏ کاڌي جي قرباني، ۽ پيئڻ واري قرباني بہ پيش ڪجو.

²³ وري چوٿين ڏينهن ڏهہ وهڙا، ٻہ گهٽا، چوڏهن يڪسالا بي عيب گهيٽا پيش ڪجو؛

²⁴ ۽ انهن سان گڏ کاڌي جي قرباني ۽ پيئڻ واري قرباني، وهڙن، گهٽن، ۽ گهيٽن جي لاءِ، سندن شمار ۽ قانون موجب پيش ڪجو:

²⁵ ۽ هڪڙو ٻڪر گناهہ جي قربانيءَ لاءِ، انهيءَ کان سواءِ هميشہ واري سوختني قرباني، ۽ انهيءَ سان گڏ کاڌي جي قرباني، ۽ پيئڻ واري قرباني بہ پيش ڪجو.

²⁶ وري پنجين ڏينهن نوَ وهڙا، ٻہ گهٽا، چوڏهن يڪسالا بي عيب گهيٽا پيش ڪجو؛

²⁷ ۽ انهن سان گڏ کاڌي جي قرباني ۽ پيئڻ واري قرباني، وهڙن، گهٽن ۽ گهيٽن جي لاءِ، سندن شمار ۽ قانون موجب پيش ڪجو:

²⁸ ۽ هڪڙو ٻڪر گناهہ جي قربانيءَ لاءِ؛ انهيءَ کان سواءِ هميشہ واري سوختني قرباني، ۽ انهي سان گڏ کاڌي جي قرباني، ۽ پيئڻ واري قرباني بہ پيش ڪجو.

²⁹ وري ڇهين ڏينهن اٺ وهڙا، ٻہ گهٽا، چوڏهن يڪسالا بي عيب گهيٽا پيش ڪجو؛

³⁰ ۽ انهن سان گڏ کاڌي جي قرباني، ۽ پيئڻ واري قرباني، وهڙن، گهٽن، ۽ گهيٽن جي لاءِ، سندن شمار ۽ قانون موجب پيش ڪجو:

³¹ ۽ هڪڙو ٻڪر گناهہ جي قربانيءَ لاءِ؛ انهيءَ کان سواءِ هميشہ واري سوختني قرباني، ۽ انهيءَ سان گڏ کاڌي جي قرباني، ۽ پيئڻ واري قرباني بہ پيش ڪجو.

³² وري ستين ڏينهن ست وهڙا، ٻہ گهٽا، چوڏهن يڪسالا بي عيب گهيٽا پيش ڪجو؛

³³ ۽ انهن سان گڏ کاڌي جي قرباني، ۽ پيئڻ واري قرباني، وهڙن، گهٽن ۽ گهيٽن جي لاءِ، سندن شمار ۽ قانون موجب پيش ڪجو:

³⁴ ۽ هڪڙو ٻڪر گناهہ جي قربانيءَ لاءِ؛ انهيءَ کان سواءِ هميشہ واري سوختني قرباني، ۽ انهيءَ سان گڏ کاڌي جي قرباني، ۽ پيئڻ واري قرباني بہ پيش ڪجو.

³⁵ اٺين ڏينهن اوهان جي پاڪ جماعت گڏ ٿيندي: اوهين ڪوبہ محنت مزوريءَ جو ڪم نہ ڪجو:

³⁶ پر اوهين سوختني قربانيءَ لاءِ هڪڙو وهڙو، هڪڙو گهٽو، ست يڪسالا بي عيب گهيٽا، خداوند جي حضور ۾ وڻندڙ خوشبوءِ جي لاءِ باهہ سان ساڙڻ واري قربانيءَ طور پيش ڪجو:

³⁷ ۽ انهن سان گڏ کاڌي جي قرباني، ۽ پيئڻ واري قرباني، وهڙن، گهٽن ۽ گهيٽن جي شمار ۽ قانون موجب پيش ڪجو:

³⁸ ۽ هڪڙو ٻڪر گناهہ جي قربانيءَ لاءِ؛ انهيءَ کان سواءِ هميشہ واري سوختني قرباني، ۽ انهيءَ سان گڏ کاڌي جي قرباني، ۽ پيئڻ واري قرباني بہ پيش ڪجو.

³⁹ اهي اوهين خداوند جي حضور ۾ پنهنجين مقرر ڪيل عيدن تي پيش ڪجو، انهيءَ کان سواءِ اوهان جون مڃتائون، ۽ اوهان جون خوشيءَ جون قربانيون، ۽ اوهان جون سوختنيون قربانيون، ۽ اوهان جون کاڌي جون قربانيون، ۽ اوهان جون پيئڻ واريون قربانيون، ۽ اوهان جون سلامتيءَ جون قربانيون بہ پيش ڪندا رهجو.

⁴⁰ ۽ موسيٰ بني اسرائيل کي اهي سڀ ڳالهيون ٻڌايون، جيئن ڪ خداوند موسيٰ کي فرمايو هو.