ايوب 20 - Sindhi Bible

¹ پوءِ ضوفر نعماتيءَ ورندي ڏيئي چيو تہ:

² انهيءَ ڪري منهنجا خيال مون کي جواب سيکارين ٿا، انهيءَ جلديءَ جي ڪري جا مون ۾ آهي.

³ مون اهو طعنو ٻڌو آهي جو مون کي شرمندو ٿو ڪري، پر منهنجي عقل جو روح مون کي جواب ٿو ڏئي.

⁴ تون قديم وقت کان وٺي نٿو ڄاڻين ڇا، جنهن وقت ماڻهوءَ کي زمين تي پيدا ڪيو ويو هو،

⁵ تہ شريرن جي فتحيابي ٿوري، ۽ بيدينن جي خوشي هڪڙي لحظي جي آهي؟

⁶ جيتوڻيڪ هن جي وڏائي چڙهي آسمانن تائين وڃي پهچي، ۽ هن جو مٿو ڪڪرن تائين وڃي رسي؛

⁷ تہ بہ هو پنهنجي گونهن وانگر هميشہ لاءِ ناس ٿي ويندو: جن هن کي ڏٺو آهي سي چوندا تہ هو ڪٿي آهي؟

⁸ هو خواب وانگر اُڏامي ويندو، ۽ لڀندو ئي ڪين: هائو، هو رات جي رويائن وانگر ڀڄايو ويندو.

⁹ جنهن اک هن کي ڏٺو آهي سا وري نہ ڏسنديس؛ نڪا سندس جاءِ کيس وري ڏسندي.

¹⁰ هن جا ٻار غريبن جي مهرباني ڳوليندا وتندا، ۽ هن جا هٿ سندس دولت موٽائي ڏيندا.

¹¹ هن جا هڏا جوانيءَ سان ڀريل آهن، پر اها ساڻس گڏ مٽيءَ ۾ ليٽندي.

¹² جيتوڻيڪ شرارت هن جي وات ۾ مٺي هوندي، جيتوڻيڪ هو اها پنهنجي ڄڀ هيٺيان لڪائيندو.

¹³ جيتوڻيڪ هو انهيءَ کي بچائيندو ۽ وڃڻ نہ ڏيندو، پر پنهنجي وات منجهہ سنڀاليو رکيو ايندو:

¹⁴ تڏهن بہ هن جو کاڌو سندس آنڊن ۾ بدلجي ويندو، ۽ منجهس ڦري سپن جو زهر ٿي پوندو.

¹⁵ هو دولت ڳهي ويو آهي ۽ اها هو وري اُلٽي ڪري ڪڍندو: اها خدا هن جي پيٽ مان ڪڍي ڇڏيندو.

¹⁶ هو سپن جو زهر چوسيندو: نانگ جي زبان هن کي ماري وجهندي.

¹⁷ هو ندين کي نہ ڏسندو، يعني اهي جن ۾ ماکي ۽ مکڻ وهن ٿا.

¹⁸ جنهن جي لاءِ هن پورهيو ٿي ڪيو سو هو موٽائي ڏيندو ۽ ڳهي نہ ويندو؛ جيڪو مال ملڪيت وٽس آهي تنهن موجب هو خوشيون نہ ڪندو.

¹⁹ ڇالاءِ جو هن غريبن تي ظلم ڪيو آهي ۽ انهن کي ڇڏي ڏنو اٿس؛ هن زور زبردستيءَ سان جيڪو گهر ورتو آهي سو هو نہ اڏيندو.

²⁰ ڇالاءِ جو هن پنهنجي اندر ۾ ڪوبہ آرام نہ ڏٺو، ۽ جنهن شيءِ مان هن کي خوشي حاصل ٿي ٿئي تنهن مان ڪجهہ نہ بچائيندو.

²¹ اهڙي ڪا بہ شيءِ نہ بچي جا هن ڳڙڪائي نہ ڇڏي؛ تنهن ڪري هن جو سک جٽاءُ نہ ڪندو.

²² هو پنهنجي جهجهي ملڪيت هوندي بہ تنگيءَ سان گذاريندو: سڀ ڪنهن مصيبت ماريءَ جو هٿ هن جي مٿان رهندو.

²³ جڏهن هو پنهنجي پيٽ ڀرڻ تي هوندو، تڏهن خدا پنهنجو خوفناڪ غضب هن تي اُڇلائي وجهندو، ۽ اڃا ويٺو کائيندو تہ مٿانئس اهو مينهن وانگر وسائيندو.

²⁴ هو لوهہ جي هٿيار کان ڀڄندو، ۽ پتل جي ڪمان جو تير هن کي چُڀي ماري ڇڏيندو.

²⁵ هو انهيءَ کي ڇڪي ڪڍي ٿو ۽ اهو سندس بدن مان نڪري اچي ٿو: هائو چمڪندڙ چهنب هن جي پتي مان نڪري اچي ٿي؛ خوف هن تي غالب آهن.

²⁶ ساري اونداهي هن جي لاءِ خزانو ٿي رکيل آهي، جا باهہ ماڻهوءَ نہ ٻاري آهي سا هن کي ساڙي کائي ڇڏيندي؛ جيڪي هن جي تنبوءَ ۾ باقي بچيو آهي سو اُها ساڙي چٽ ڪري ڇڏيندي.

²⁷ آسمان هن جو گناهہ ظاهر ڪندا، ۽ زمين هن جي برخلاف اُٿندي.

²⁸ سندس گهر جي برڪت هلي ويندي، ۽ هنجو مال متاع سندس ڪاوڙ جي ڏينهن، وهي هليو ويندو.

²⁹ اهو آهي هڪڙي شرير ماڻهوءَ جو خدا وٽان آيل حصو، ۽ اهو ورثو جو خدا سندس لاءِ مقرر ڪيو آهي.