پيدائش 23 - Sindhi Bible

¹ هاڻي سارہ جي عمر هڪ سؤ ستاويهہ ورهيہ هئي: سارہ جي حياتي ايترن سالن جي هئي.

² ۽ سارہ ڪنعان جي ملڪ ۾ قريت اربع، يعني حبرون ۾ وفات ڪئي ۽ ابرهام سارہ جي لاءِ ماتم ڪيو ۽ رنو.

³ پوءِ ابرهام پنهنجي مردي وٽان اٿي، حت جي پٽن کي چيو تہ

⁴ آءٌ اوهان وٽ ڌاريو ۽ مسافر آهيان: مون کي پاڻ وٽ قبرستان جي لاءِ زمين جو ٽڪر ڏيو تہ آءٌ پنهنجو مردو پنهنجيءَ نظر کان پاسي ڪري، اتي دفن ڪريان.

⁵ تڏهن حت جي پٽن ابرهام کي ورندي ڏيئي چيو تہ

⁶ اي سائين، اسان جي ڳالهہ ٻڌ، تون اسان جي وچ ۾ هڪڙو وڏو امير آهين، اسان جي قبرستان ۾ جيڪا قبر توکي وڻي، تنهن ۾ پنهنجو مردو دفن ڪر، اسان مان ڪوبہ توکي پنهنجيءَ قبر کان منع نہ ڪندو، ڀلي تون پنهنجو مردو دفن ڪر.

⁷ تڏهن ابرهام اٿي انهن ماڻهن، يعني حت جي پٽن اڳيان ڪنڌ نمايو.

⁸ ۽ چيائين تہ جيڪڏهن اوهان جي مرضي آهي تہ آءٌ پنهنجو مردو پنهنجيءَ نظر کان پاسي ڪري دفن ڪريان، تہ منهنجي ڳالهہ ٻڌو، صحر جي پٽ عفرون کي منهنجي سفارش ڪريو،

⁹ تہ هو مڪفيلہ جو غار، جو سند ملڪيت آهي، ۽ سندس ٻنيءَ جي پڇاڙيءَ ۾ آهي، تنهن جي پوري قيمت وٺي مون کي ڏي؛ تہ اوهان جي وچ ۾ هڪڙو قبرستان منهنجي ملڪيت ٿئي.

¹⁰ هاڻي عفرون اتي حت جي پٽن جي وچ ۾ ويٺو هو: سو انهن سڀني جي اڳيان، ۽ جيڪي حت جا پٽ سندس شهر جي دروازي مان اندر ٿي آيا، تن جي روبرو ابرهام کي چوڻ لڳو،

¹¹ تہ منهنجا سائين، منهنجي ڳالهہ ٻڌ، اها ٻني ۽ جيڪو غار منجهس آهي، سي ٻئي آءٌ توکي مفت ۾ ٿو ڏيان، اهي آءٌ پنهنجيءَ قوم جي پٽن جي روبرو توکي ٿو ڏيان: تون ڀلي پنهنجو مردو دفن ڪر.

¹² تڏهن ابرهام انهيءَ ملڪ جي ماڻهن جي اڳيان ڪنڌ نمايو.

¹³ ۽ هن انهيءَ ملڪ جي ماڻهن جي روبرو عفرون کي چيو تہ جي تون راضي آهين، تہ آءٌ توکي عرض ٿو ڪريان، تہ منهنجي ڳالهہ ٻڌ؛ آءٌ ٻنيءَ جي قيمت ڏيان ٿو، اها مون کان وٺ، تہ پوءِ آءٌ اتي پنهنجو مردو دفن ڪريان.

¹⁴ تڏهن عفرون ابرهام کي ورندي ڏيئي چيو تہ

¹⁵ منهنجا سائين، منهنجي ڳالهہ ٻڌ، هن زمين جي ٽڪر جي قيمت چانديءَ جا چار سؤ سڪا آهن، سي تنهنجي ۽ منهنجي وچ ۾ ڇا آهن؟ تون ڀلي پنهنجو مردو دفن ڪر.

¹⁶ ۽ ابرهام، عفرون جي ڳالهہ قبول ڪئي؛ ۽ ابرهام اوتري چاندي، جيتري هن حت جي پٽن جي روبرو چئي هئي، يعني چانديءَ جا چار سؤ سڪا، جي واپارين ۾ چالو هئا، سي توري ڏنائينس.

¹⁷ انهيءَ طرح عفرون جي اها ٻني، جا مڪفيلہ ۾ ممري جي سامهون هئي، ۽ غار جو منجهس هو، ۽ جيڪي وڻ ٻنيءَ ۾، ۽ انهيءَ جي چئني حدن ۾ هئا تن سوڌي،

¹⁸ حت جي پٽن ۽ جيڪي هن جي شهر جي دروازي جي اندر آيا ٿي، تن جي روبرو ابرهام کي پڪيءَ طرح قبضي ۾ ملي.

¹⁹ تنهن کان پوءِ ابرهام پنهنجيءَ زال سارہ کي مڪفيلہ واريءَ ٻنيءَ جي غار ۾، جو ممري، يعني حبرون جي سامهون ڪنعان جي ملڪ ۾ آهي؛ اتي دفن ڪيو.

²⁰ ۽ اُها ٻني ۽ جيڪو غار منجهس آهي، سي حت جي پٽن، قبرستان جي لاءِ پڪيءَ طرح ابرهام جي قبضي ۾ ڏنا.