پيدائش 11 - Sindhi Bible

¹ ۽ ساري زمين تي هڪڙي زبان ۽ هڪڙي ٻولي هئي.

² ۽ هيئن ٿيو جو اڀرندي ڏانهن مسافري ڪندي ڪندي اهي سنعار ملڪ جي هڪڙي ميدان ۾ آيا، ۽ اتي رهي پيا.

³ اتي هو هڪ ٻئي کي چوڻ لڳا تہ اچو تہ سرون ٺاهي انهن کي باهہ ۾ پچايون. سو انهن پهڻن جي بدران سرون، ۽ چن جي بدران گارو ڪم ۾ آندو.

⁴ ۽ هنن چيو تہ اچو تہ پنهنجي لاءِ هڪڙو شهر ۽ هڪڙو ٺلهہ جوڙيون، جنهن جي چوٽي آسمان تائين وڃي پهچي ۽ اهڙيءَ طرح پنهنجو نالو قائم ڪريون؛ متان پوءِ اسين ساريءَ زمين تي پري پري پکڙجي وڃون.

⁵ تڏهن خداوند اهو شهر ۽ ٺلهہ جو آدم جي اولاد جوڙيو هو، سو ڏسڻ لاءِ لهي آيو.

⁶ ۽ خداوند چيو تہ ڏسو، هي سڀ هڪڙي قوم آهن، ۽ سندن ٻولي بہ هڪڙي آهي، ۽ اهي جو هيئن ڪرڻ لڳا آهن، سو هو جيڪو ڪم ڪرڻ گهرندا، تنهن ۾ کين روڪ ڪانہ ٿيندي.

⁷ تنهنڪري اچو تہ اتي هلي سندن ٻوليءَ ۾ مونجهارو وجهون، تہ هو هڪ ٻئي جو ڳالهائڻ سمجهي نہ سگهن.

⁸ سو خداوند انهن کي اتان هٽائي ساريءَ زمين تي پکيڙي ڇڏيو: تڏهن هنن اهو شهر جوڙڻ ڇڏي ڏنو.

⁹ تنهنڪري انهيءَ شهر جو نالو بابل پئجي ويو؛ ڇالاءِ جو اتي خداوند ساري زمين جي ٻولي منجهائي ڇڏي: ۽ اتان خداوند انهن کي ساري زمين تي پکيڙي ڇڏيو.

¹⁰ سم جو نسب نامو هن ريت آهي. جڏهن سم هڪ سؤ ورهين جو ٿيو، تڏهن طوفان کان ٻہ سال پوءِ هن مان ارفڪسد پيدا ٿيو.

¹¹ ۽ ارفڪسد جي پيدا ٿيڻ کان پوءِ سم پنج سؤ ورهيہ جيئرو رهيو ۽ کيس پٽ ۽ ڌيون ڄايون.

¹² جڏهن ارفڪسد پنجٽيهن ورهين جو ٿيو، تڏهن هن مان سلحہ پيدا ٿيو:

¹³ ۽ سلحہ جي پيدا ٿيڻ کان پوءِ ارفڪسد چار سو ٽي ورهيہ جيئرو رهيو، ۽ کيس پٽ ۽ ڌيون ڄايون.

¹⁴ جڏهن سلحہ ٽيهن ورهين جو ٿيو، تڏهن هن مان عبر پيدا ٿيو:

¹⁵ ۽ عبر جي پيدا ٿيڻ کان پوءِ سلحہ چار سؤ ٽي ورهيہ جيئرو رهيو، ۽ کيس پٽ ۽ ڌيون ڄايون.

¹⁶ جڏهن عبر چوٽيهن ورهين جو ٿيو، تڏهن هن مان فلجہ پيدا ٿيو:

¹⁷ ۽ فلجہ جي پيدا ٿيڻ کان پوءِ عبر چار سؤ ٽيهہ ورهيہ جيئرو رهيو، ۽ کيس پٽ ۽ ڌيون ڄايون.

¹⁸ جڏهن فلجہ ٽيهن ورهين جو ٿيو، تڏهن هن مان رعو پيدا ٿيو:

¹⁹ ۽ رعو جي پيدا ٿيڻ کان پوءِ فلجہ ٻہ سؤ نو ورهيہ جيئرو رهيو، ۽ کيس پٽ ۽ ڌيون ڄايون.

²⁰ جڏهن رعو ٻٽيهن ورهين جو ٿيو، تڏهن هن مان سروج پيدا ٿيو:

²¹ ۽ سروج جي پيدا ٿيڻ کان پوءِ رعو ٻہ سؤ ست ورهيہ جيئرو رهيو، ۽ کيس پٽ ۽ ڌيون ڄايون.

²² جڏهن سروج ٽيهن ورهين جو ٿيو، تڏهن هن مان نحور پيدا ٿيو:

²³ ۽ نحور جي پيدا ٿيڻ کان پوءِ سروج ٻہ سؤ ورهيہ جيئرو رهيو، ۽ کيس پٽ ۽ ڌيون ڄايون.

²⁴ جڏهن نحور اوڻٽيهن ورهين جو ٿيو، تڏهن هن مان تارح پيدا ٿيو:

²⁵ ۽ تارح جي پيدا ٿيڻ کان پوءِ نحور هڪ سؤ اوڻيهہ ورهيہ جيئرو رهيو، ۽ کيس پٽ ۽ ڌيون ڄايون.

²⁶ جڏهن تارح ستر ورهين جو ٿيو، تڏهن هن مان ابرام، نحور ۽ حاران پيدا ٿيا.

²⁷ تارح جو نسب نامو هن ريت آهي: تارح مان ابرام، نحور ۽ حاران پيدا ٿيا؛ ۽ حاران مان لوط پيدا ٿيو.

²⁸ ۽ حاران پنهنجي پيءُ تارح جي جيئري، پنهنجي ڄمڻ واري هنڌ، يعني ڪسدين جي اور ۾ مري ويو.

²⁹ ۽ ابرام ۽ نحور شادي ڪئي. ابرام جي زال جو نالو ساري هو، ۽ نحور جي زال جو نالو ملڪہ هو، جا انهيءَ حاران جي ڌيءَ هئي جو ملڪہ ۽ اسڪہ جو پيءُ هو.

³⁰ ساري سنڍ هئي؛ ۽ کيس ڪو ٻار ڪونہ هو.

³¹ پوءِ تارح پنهنجي پٽ ابرام ۽ پنهنجي پوٽي لوط کي، جو حاران جو پٽ هو، ۽ پنهنجيءَ ننهن، يعني ابرام جي زال ساريءَ کي پاڻ سان وٺي نڪتو، ۽ اهي سڀيئي ڪسدين جي اور مان روانا ٿيا ۽ ڪنعان جي ملڪ ڏانهن ويا. جڏهن اهي حاران ۾ آيا، تڏهن اتي رهي پيا.

³² تارح جي ساري عمر ٻہ سؤ پنج ورهيہ هئي: ۽ تارح حاران ۾ مري ويو.