حزقي ايل 42 - Sindhi Bible

¹ پوءِ هن مون کي اُتر واري رستي کان ڪڍي ٻاهرين ايوان ۾ آندو: ۽ جيڪا ڪوٺي انهي علحدي جاءِ جي آمهون سامهون هئي، ۽ جيڪا اُتر پاسي واري عمارت جي آمهون سامهون هئي، تنهن ۾ هن مون کي آندو.

² اُتر واري دروازي جي اڳيان ڊيگهہ هڪ سؤ هٿ هئي ۽ ويڪر پنجاهہ هٿ هئي.

³ جيڪي ويهہ هٿ اندرين ايوان سان هئا، تن جي آمهون سامهون، ۽ ٻاهرين ايوان جي فرش بنديءَ جي آمهون سامهون، ٽئين طبقي ۾، ورانڊي جي سامهون ورانڊو هو.

⁴ ۽ ڪوٺين جي اڳيان اندرين پاسي ڏهن هٿن جيترو ڪشادو ميدان هو؛ ۽ هڪ هٿ جيترو موڪرو رستو هو ۽ انهن جا در اُتر ڏانهن هئا.

⁵ هاڻي مٿيون ڪوٺيون ننڍيون هيون: ڇالاءِ جو انهن مان هيٺين ۽ وچين ڪوٺين کان وڌيڪ عمارت جو حصو انهن ورانڊن ۾ اچي ٿي ويو.

⁶ ڇالاءِ جو انهن جا ٽي طبقا هئا، ۽ ايوانن جي پيلپاون وانگر انهن کي پيلپاوا ڪين هئا: تنهنڪري مٿين ڪوٺي وچين ۽ هيٺين ڪوٺيءَ کان سوڙهي هئي.

⁷ ۽ جيڪا ڀت ٻاهر ڪوٺين جي ڀرسان، ڪوٺين جي اڳيان ٻاهرين ايوان جي پاسي هئي، تنهن جي ڊيگهہ پنجاهہ هٿ هئي:

⁸ ڇالاءِ جو ٻاهرين ايوان جي ڪوٺين جي ڊيگهہ پنجاهہ هٿ هئي، ۽ هيڪل جي اڳ ۾ هڪ سؤ هٿ هئا.

⁹ ۽ انهن ڪوٺين جي هيٺان، اُڀرندي پاسي، ٻاهرين ايوان مان، انهن ۾ وڃڻ لاءِ جاءِ هئي.

¹⁰ اُڀرندي واري ايوان جي ڀت جي شڪم ۾ علحدي جاءِ جي اڳيان ۽ عمارت جي اڳيان ڪوٺيون هيون.

¹¹ ۽ انهن جي اڳ وارو رستو ڏسڻ ۾ اهڙو هو جهڙو انهن ڪوٺين جو رستو، جي اُتر ڏانهن هيون؛ جهڙي سندن ڊيگهہ تهڙي سندن ويڪر هئي: ۽ انهن جا سڀ ٻاهر وڃڻ جا رستا، انهن جي نموني ۽ انهن جي درن موافق هئا.

¹² ۽ رستي جي منهن تي، يعني جيڪو رستو ڪوٺين ۾ گهڙڻ واري هنڌان اُڀرندي جي بلڪل اڳيان هو، تنهن ۾ هڪڙو در هو، جو ڏکڻ پاسي وارين ڪوٺين جي درن جهڙو هو.

¹³ تڏهن هن مون کي چيو تہ اُتر واريون ڪوٺيون ۽ ڏکڻ واريون ڪوٺيون، جي علحدي جاءِ جي اڳيان آهن، سي پاڪ ڪوٺيون آهن، جتي اُهي ڪاهن، جي خداوند جي حضوري ۾ وڃن ٿا، سي تمام پاڪ شيون کائيندا: اُتي هو تمام پاڪ شيون ۽ کاڌي جي قرباني، ۽ گناهہ جي قرباني ۽ ڏوهہ جي قرباني رکن؛ ڇالاءِ جو اُها جاءِ پاڪ آهي.

¹⁴ جڏهن ڪاهن اُتي لنگهي اچن، تڏهن هو انهي پاڪ جاءِ مان نڪري ٻاهرين ايوان ۾ نہ وڃن، پر اُتي هو پنهنجا ڪپڙا رکن، جن ۾ هو خدمت چاڪري ڪن ٿا؛ ڇالاءِ جو اُهي پاڪ آهن: ۽ هو ٻيا ڪپڙا پائي عام ماڻهن واري جاءِ جي ويجهو وڃن.

¹⁵ هاڻي جڏهن هن اندريون گهر ماپي بس ڪيو، تڏهن هن مون کي انهي در جي رستي ٻاهر آندو، جنهن جو رخ اُڀرندي ڏانهن آهي، ۽ انهي جي چوڌاري ماپ ڪرڻ لڳو.

¹⁶ هن ماپ ڪرڻ واري ڪاني سان اُڀرندي پاسي ماپ ڪئي تہ چوڌاري ماپ پنج سؤ ڪانا ٿي.

¹⁷ هن اُتر پاسي بہ ماپ واري ڪاني سان چوڌاري ماپ ڪئي تہ پنج سؤ ڪانا ٿي.

¹⁸ ڏکڻ پاسي هن ماپ ڪئي تہ ماپ واري ڪاني سان پنج سؤ ڪانا ٿي.

¹⁹ هو ڦري اُلهندي پاسي ويو ۽ ماپ واري ڪاني سان پنج سؤ ڪانا ماپيائين.

²⁰ هن چئني پاسن کان انهي جي ماپ ڪئي: انهي کي چوڌاري هڪڙي ڀت هئي، جنهن جي ڊيگهہ پنج سؤ ڪانا هئي، انهي لاءِ تہ جيڪي پاڪ هو تنهن کي عام کان ڌار ڪري.