2.بادشاهَہ 16 - Sindhi Bible

¹ فقحہ بن رملياہ جي سترهين ورهيہ ۾، آخز بن يوتام، يهوداہ جو بادشاهہ بادشاهي ڪرڻ لڳو.

² ۽ بادشاهہ ٿيڻ وقت آخز ويهن ورهين جو هو؛ ۽ هن يروشلم ۾ سورهن ورهيہ بادشاهي ڪئي: ۽ هن اُهي ڪم نہ ڪيا جي خداوند جي نظر ۾ چڱا هئا، جيئن ڪ سندس پيءُ دائود جا هئا.

³ پر هو اسرائيل جي بادشاهن جي رستي تي هليو، هائو، ۽ جن غير قومن کي خداوند بني اسرائيل جي اڳيان ڪڍي ڇڏيو هو، تن جي ڪراهت جهڙين رسمن موجب هن پنهنجي پٽ کي باهہ مان لنگهايو.

⁴ ۽ مٿانهين جاين تي، ۽ ٽڪرين تي، ۽ سڀني ساون وڻن هيٺ هو قرباني ڪندو هو، ۽ لوبان ساڙيندو هو.

⁵ تڏهن رضين، ارام جو بادشاهہ، ۽ فقحہ بن رملياہ اسرائيل جو بادشاهہ، يروشلم تي جنگ ڪرڻ لاءِ ڪاهي آيا: ۽ اُنهن آخز کي گهيرو ڪيو، پر انهيءَ کي جيتي نہ سگهيا.

⁶ انهيءَ وقت ڌاري ارام جي بادشاهہ رضين، ايلات موٽي هٿ ڪري ارام کي ڏنو، ۽ يهودين کي ايلات مان هڪلي ڪڍيائين: ۽ ارامي اچي ايلات ۾ رهڻ لڳا، جتي اڄ تائين رهندا اچن.

⁷ پوءِ آخز اسور جي بادشاهہ تگلت پلاسر ڏانهن قاصدن جي هٿان چوائي موڪليو تہ آءٌ تنهنجو ٻانهو ۽ تنهنجو پٽ آهيان: اچي مون کي ارام جي بادشاهہ، ۽ اسرائيل جي بادشاهہ جي هٿن مان بچاءِ، جو اُهي مون سان وڙهڻ لاءِ ڪاهي ٿا اچن.

⁸ ۽ آخز جيڪو سون ۽ چاندي خداوند جي گهر ۾، ۽ بادشاهہ جي گهر جي خزانن ۾ هو، سو کڻي تحفو ڪري اسور جي بادشاهہ ڏانهن ڏياري موڪليو.

⁹ ۽ اسور جي بادشاهہ هن جي ڳالهہ مڃي: ۽ اسور جو بادشاهہ دمشق تي چڙهي ويو ۽ اُهو ورتائين، ۽ اُنهيءَ جا ماڻهو قيد ڪري قير ڏانهن وٺي ويو، ۽ رضين کي قتل ڪيائين.

¹⁰ ۽ آخز بادشاهہ اسور جي بادشاهہ تگلت پلاسر کي گڏجڻ لاءِ دمشق ڏانهن ويو، ۽ دمشق ۾ جيڪا قربانگاهہ هئي سا ڏٺائين: ۽ آخز بادشاهہ انهيءَ قربانگاهہ جو نقشو ۽ انهيءَ جو نمونو اورياہ ڪاهن وٽ، ان جي ساريءَ ڪاريگريءَ جي ڪم جي بيان سميت ڏياري موڪليو.

¹¹ ۽ اورياہ ڪاهن هڪڙي قربانگاهہ جوڙائي. جيڪو نمونو آخز بادشاهہ دمشق مان موڪليو هوس، اُن موجب اورياہ ڪاهن اها جوڙائي، جيسين ڪ آخز دمشق مان موٽي اُتي آيو.

¹² ۽ جڏهن بادشاهہ دمشق مان آيو تڏهن هن اُها قربانگاهہ اچي ڏٺي: ۽ بادشاهہ انهيءَ قربانگاهہ کي ويجهو ويو، ۽ انهيءَ تي قرباني چاڙهيائين.

¹³ ۽ هن پنهنجي سوختني قرباني ۽ پنهنجي کاڌي جي قرباني ادا ڪئي، ۽ پيئڻ واري قرباني هاريائين، ۽ پنهنجين سلامتيءَ وارين قربانين جو رت قربانگاهہ تي ڇٽيائين.

¹⁴ ۽ جيڪا پتل جي قربانگاهہ خداوند جي اڳيان هئي، سا گهر جي اڳ تان، پنهنجي قربانگاهہ ۽ خداوند جي گهر جي وچان ڪڍي آڻي پنهنجي قربانگاهہ جي اُتر پاسي رکيائين.

¹⁵ ۽ بادشاهہ آخز اورياہ ڪاهن کي حڪم ڏيئي چيو تہ انهيءَ وڏي قربانگاهہ تي صبح واري سوختني قرباني چاڙهہ، ۽ شام واري کاڌي جي قرباني ۽ بادشاهہ جي سوختني قرباني ۽ سندس کاڌي جي قرباني، ملڪ جي سڀني ماڻهن جي سوختني قربانيءَ سميت، ۽ سندن کاڌي جي قرباني، ۽ پيئڻ وارين قربانين سميت بہ چاڙهہ؛ ۽ اُنهيءَ تي سوختني قرباني ۽ ذبح ڪرڻ واري قربانيءَ جو سڀ رت ڇاٽار: پر پتل جي قربانگاهہ منهنجي سوال ڪرڻ لاءِ ٿيندي.

¹⁶ جيئن بادشاهہ آخز حڪم ڏنو تيئن اورياہ ڪاهن ڪيو.

¹⁷ ۽ بادشاهہ آخز گاڏين جا ڪنارا وڍي ڇڏيا، ۽ انهن تان حوضي ڪڍي ڇڏيائين؛ ۽ سمنڊ جي هيٺان جيڪي پتل جا ڏاند هئا تن تان اُهو لاهي ڇڏيائين، ۽ پٿرن جي فرش تي کڻي رکيائين.

¹⁸ ۽ گهر جي اندر سبت جي لاءِ جيڪو ڍڪيل رستو جوڙايو هئائون، ۽ ٻاهران جيڪو بادشاهہ جي گهڙڻ جو در هو، سو اسور جي بادشاهہ جي ڪري هن ڦيرائي خداوند جي گهر ڏانهن ڪيو.

¹⁹ هاڻي آخز جا باقي ٻيا ڪم جي هن ڪيا، سي يهوداہ جي بادشاهن جي تواريخ جي ڪتاب ۾ لکيل نہ آهن ڇا؟

²⁰ ۽ آخز پنهنجن ابن ڏاڏن سان وڃي سُتو، ۽ دائود جي شهر ۾ پنهنجي ابن ڏاڏن سان گڏ دفن ڪيو ويو ۽ سندس پٽ حزقياہ سندس جاءِ تي بادشاهہ ٿيو.