2.بادشاهَہ 14 - Sindhi Bible

¹ اسرائيل جي بادشاهہ يوآس بن يهوآخز جي ٻئي ورهيہ ۾، يهوداہ جو بادشاهہ امصياہ بن يوآس بادشاهي ڪرڻ لڳو.

² جڏهن هو بادشاهي ڪرڻ لڳو تڏهن پنجويهن ورهين جو هو؛ ۽ هن يروشلم ۾ اوڻٽيهہ ورهيہ بادشاهي ڪئي: ۽ هن جي ماءُ جو نالو يهوعدان هو، جا يروشلم جي هئي.

³ ۽ هن اُهي ڪم ڪيا جي خداوند جي نظر ۾ چڱا هئا، تڏهن بہ هن جي پيءُ دائود جهڙا نہ هئا: جيڪي هن جي پيءُ يوآس ڪيو هو، ان موجب هن بہ ڪيو.

⁴ پر مٿانهيون جايون هن ڊاهي نہ ڇڏيون: ماڻهو اڃا بہ اُنهن مٿانهين جاين تي قربانيون ڪندا ۽ لوبان ساڙيندا هئا.

⁵ ۽ هيئن ٿيو تہ جنهن وقت بادشاهي سندس هٿ ۾ قائم ٿي تنهن وقت جن سندس نوڪرن سندس پيءُ کي ڪُٺو هو، تن کي هن قتل ڪيو:

⁶ پر انهن خونين جي پٽن کي هن قتل نہ ڪيو: جيئن ڪ موسيٰ جي شريعت جي ڪتاب ۾ لکيل آهي، تہ خداوند حڪم ڪري فرمايو تہ پيئر پٽن جي بدران قتل نہ ڪبا، نڪي پٽ پيئرن جي بدران قتل ڪبا؛ پر سڀڪو ماڻهو پنهنجي گناهہ جي لاءِ مرندو.

⁷ هن لوڻ واريءَ واديءَ ۾ ادومين مان ڏهہ هزار ڪُٺا، ۽ جنگ ڪري سلع ورتائين، ۽ انهيءَ جو نالو يقتيل رکيائين، جو اڄ ڏينهن تائين هليو اچي.

⁸ پوءِ امصياہ اسرائيل جي بادشاهہ يهوآس بن يهوآخز بن ياهو ڏانهن قاصدن جي هٿان چوائي موڪليو تہ اچ تہ هڪ ٻئي جي منهن سامهون ٿيون.

⁹ ۽ يهوآس اسرائيل جي بادشاهہ، امصياہ يهوداہ جي بادشاهہ ڏانهن چوائي موڪليو، تہ لبنان جي ڪانڊيري لبنان جي ديودار ڏانهن چوائي موڪليو تہ پنهنجي ڌيءَ منهنجي پٽ کي پرڻائي ڏي: ۽ لبنان جو هڪڙو جهنگلي مرون اُتان اچي لنگهيو ۽ ڪانڊيري کي لتاڙي هليو ويو.

¹⁰ تو برابر ادوم کي جيتيو آهي ۽ تنهنجي دل تنهنجو مٿو ڦيرائي ڇڏيو آهي: انهيءَ تي فخر ڪري گهر ويٺو رهہ: ڇو ٿو ٻين جي ڪمن ۾ دست اندازي ڪري پاڻ کي نقصان پهچائين، متان تون پاڻ بہ ڪرين ۽ يهوداہ کي بہ پاڻ سان ڪيرائين؟

¹¹ پر امصياہ اها ڳالهہ نہ ٻڌي. تنهنڪري يهوآس، اسرائيل جو بادشاهہ اُٿي هليو؛ ۽ بيت شمس، جو يهوداہ جو شهر آهي، تنهن وٽ هو ۽ يهوداہ جو بادشاهہ امصياہ هڪ ٻئي جي منهن سامهون ٿيا.

¹² ۽ يهوداہ اسرائيل جي اڳيان شڪست کاڌي؛ ۽ سڀ ماڻهو پنهنجن پنهنجن تنبن ڏانهن ڀڄي ويا.

¹³ ۽ اسرائيل جو بادشاهہ يهوآس، يهوداہ جي بادشاهہ امصياہ بن يهوآس بن اخزياہ کي بيت شمس ۾ گرفتار ڪري يروشلم ۾ آيو، ۽ يروشلم جي ڀت افرائيم جي در کان وٺي ڪنڊ واري دروازي تائين، چار سؤ هٿ، ڊاهي ڇڏيائين.

¹⁴ ۽ هو سڀ سون ۽ چاندي، ۽ سڀ باسڻ، جي خداوند جي گهر ۾ هئا، ۽ بادشاهہ جي گهر جي خزانن ۾ هئا، ۽ اول پيل ماڻهو بہ هٿ ڪري سامريہ ڏانهن موٽي آيو.

¹⁵ هاڻي يهوآس جا ٻيا ڪم، ۽ سندس طاقت، ۽ ڪيئن هو يهوداہ جي بادشاهہ امصياہ سان وڙهيو، اهي سڀ اسرائيل جي بادشاهن جي تواريخ جي ڪتاب ۾ لکيل نہ آهن ڇا؟

¹⁶ ۽ يوآس پنهنجي ابن ڏاڏن سان وڃي سُتو، ۽ سامريہ ۾ اسرائيل جي بادشاهن سان گڏ دفن ڪيو ويو؛ ۽ سندس جاءِ تي سندس پٽ يربعام بادشاهہ ٿيو.

¹⁷ ۽ يهوداہ جو بادشاهہ امصياہ بن يوآس اسرائيل جي بادشاهہ يهوآس بن يهوآخز جي مرڻ کان پوءِ بہ پندرهن ورهيہ جيئرو هو.

¹⁸ هاڻي امصياہ جا باقي ٻيا ڪم يهوداہ جي بادشاهن جي تواريخ جي ڪتاب ۾ لکيل نہ آهن ڇا؟

¹⁹ ۽ ماڻهن يروشلم ۾ هن جي برخلاف منصوبو ڪيو؛ ۽ هو لڪيس ڏانهن اُٿي ڀڳو: پر هنن انهيءَ جي پٺيان لڪيس ڏانهن ماڻهو موڪليا، جن اُتي وڃي قتل ڪيس.

²⁰ ۽ هن کي گهوڙن تي کڻي آيا؛ ۽ هو يروشلم ۾ پنهنجي ابن ڏاڏن سان دائود جي شهر ۾ دفن ڪيو ويو.

²¹ ۽ يهوداہ جي سڀني ماڻهن عزرياہ کي وٺي سندس پيءُ امصياہ جي جاءِ تي بادشاهہ ڪيو، ۽ هو تڏهن سورهن ورهين جو هو.

²² ۽ بادشاهہ جي پنهنجن ابن ڏاڏن سان سمهڻ کانپوءِ، هن ايلات اڏايو، ۽ يهوداہ کي اُهو موٽائي ڏنائين.

²³ يهوداہ جي بادشاهہ امصياہ بن يوآس جي پندرهين ورهيہ ۾، اسرائيل جي بادشاهہ يربعام بن يوآس سامريہ ۾ بادشاهي ڪرڻ شروع ڪئي ۽ ايڪيتاليهہ ورهيہ بادشاهي ڪيائين.

²⁴ ۽ هن خداوند جي نظر ۾ بڇڙائي ڪئي: هو يربعام بن نباط جي انهن سڀني گناهن کان باز نہ آيو جن سان هن اسرائيل کان گناهہ ڪرايو.

²⁵ هن اسرائيل جي سرحد حمات جي گهڙڻ جي جاءِ کان وٺي عرباہ جي سمنڊ تائين موٽي قائم ڪئي، جيئن ڪ خداوند اسرائيل جي خدا پنهنجي ٻانهي يوناہ بن امتي، جات حفر واري نبيءَ جي معرفت ڪلام ڪيو هو.

²⁶ ڇالاءِ جو خداوند اسرائيل جي مصيبت ڏٺي تہ ڏاڍي سخت آهي: ۽ غلام توڙي آزاد پريشان هئا، ۽ اسرائيل جو ڪوبہ مددگار نہ هو.

²⁷ ۽ خداوند ائين نہ فرمايو تہ آءٌ اسرائيل جو نالو آسمان جي هيٺان مٽائي ڇڏيندس: پر هن انهن کي يربعام بن يوآس جي وسيلي بچايو.

²⁸ هاڻي يربعام جا باقي ٻيا ڪم، ۽ ٻيو جيڪي هن ڪيو، سندس طاقت، ۽ جنگيون، ۽ ڪيئن هن دمشق، ۽ حمات، جي يهوداہ جي ملڪيت هئا، سي اسرائيل لاءِ هٿ ڪيا، اهي سڀ ڳالهيون اسرائيل جي بادشاهن جي تواريخ جي ڪتاب ۾ لکيل نہ آهن ڇا؟

²⁹ ۽ يربعام پنهنجي ابن ڏاڏن سان وڃي سُتو، يعني اسرائيل جي بادشاهن سان؛ ۽ سندس پٽ زڪرياہ سندس جاءِ تي بادشاهہ ٿيو.