1.بادشاهَہ 16 - Sindhi Bible

¹ ۽ خدا جو ڪلام ياهو بن حناني وٽ بعشا جي برخلاف آيو، ۽ چيائين تہ،

² مون توکي مٽيءَ مان چاڙهي مٿي ڪيو، ۽ پنهنجي قوم اسرائيل تي توکي بادشاهہ ڪيم؛ تہ بہ تون يربعام جي رستي تي هليو آهين، ۽ منهنجي قوم اسرائيل کان گناهہ ڪرايو اٿيئي، جنهنڪري هنن جي گناهن سبب مون کي ڪاوڙ آئي؛

³ ڏس، آءٌ بعشا ۽ سندس گهراڻي کي بلڪل ٻهاري ڪڍندس؛ ۽ آءٌ تنهنجو گهراڻو يربعام بن نباط جي گهراڻي جهڙو ڪندس.

⁴ بعشا جو جيڪو بہ ماڻهو شهر ۾ مرندو تنهن کي ڪتا کائيندا، ۽ انهيءَ جو جيڪو ماڻهو جهنگ ۾ مرندو تنهن کي هوا جا پکي کائيندا.

⁵ هاڻي بعشا جا باقي ٻيا ڪم، ۽ جيڪي هن ڪيو، ۽ هن جي طاقت، اهي سڀ اسرائيل جي بادشاهن جي تواريخ ۾ لکيل نہ آهن ڇا؟

⁶ ۽ بعشا پنهنجي ابن ڏاڏن سان گڏ وڃي سُتو، ۽ ترضہ ۾ دفن ڪيو ويو، ۽ سندس پٽ ايلہ سندس جاءِ تي بادشاهہ ٿيو.

⁷ ۽ تنهن کان سواءِ ياهو بن حناني نبيءَ جي هٿان بعشا جي برخلاف ۽ سندس گهراڻي جي برخلاف ڪلام آيو، ڇالاءِ جو هن خداوند جي نظر ۾ گهڻا ئي خراب ڪم ڪيا هئا ۽ پنهنجن هٿن جي ڪم سان هن کي ڪاوڙايو هئائين، ڇالاءِ جو هو يربعام جي گهراڻي جهڙو هو، ۽ هن انهي کي ماريو بہ هو.

⁸ يهوداہ جي بادشاهہ آسا جي ڇويهين سال ۾، ايلہ بن بعشا جي بادشاهي اسرائيل تي ترضہ ۾ شروع ٿي، ۽ اُنهيءَ ٻہ ورهيہ بادشاهي ڪئي.

⁹ ۽ هن جو نوڪر زمري، جو سندس رٿن مان اڌ حصي جو داروغو هو، تنهن سندس برخلاف منصوبو ڪيو: هاڻي هو (يعني بادشاهہ) ترضہ ۾ ارضہ جي گهر، جو سندس گهر جي ڪم ڪار جي مٿان رکيل هو، شراب پي مست ٿيو پيو هو.

¹⁰ ۽ زمريءَ اندر وڃي هن کي ڌڪ هڻي ماري وڌو، ۽ اهو واقعو يهوداہ جي بادشاهہ آسا جي ستاويهين ورهيہ ۾ ٿيو، ۽ زمري هن جي جاءِ تي بادشاهہ ٿيو.

¹¹ ۽ هيئن ٿيو تہ جڏهن هو بادشاهي ڪرڻ لڳو تڏهن تخت تي ويهڻ شرط هن بعشا جي ساري گهراڻي کي مارائي ڇڏيو: هن انهيءَ جو هڪڙو ڇوڪر بہ نہ ڇڏيو، نہ سندس مٽن مائٽن جو، ۽ نہ سندس دوستن جو.

¹² انهيءَ طرح جيڪو ڪلام خداوند ياهو نبيءَ جي معرفت بعشا جي برخلاف ڪيو هو، تنهن موجب زمريءَ بعشا جو سارو خاندان چٽ ڪري ڇڏيو.

¹³ هن ڪري جو بعشا ۽ سندس پٽ ايلہ گهڻا گناهہ ڪيا ۽ اسرائيل کان گناهہ ڪرايائون، جنهن ڪري خداوند هن جي اجاين ڪمن سبب ڪاوڙجي پيو.

¹⁴ هاڻي ايلہ جا ٻيا ڪم ۽ جيڪي هن ڪيو، سو اسرائيل جي بادشاهن جي تواريخ جي ڪتاب ۾ لکيل نہ آهي ڇا؟

¹⁵ يهوداہ جي بادشاهہ آسا جي ستاويهين ورهيہ ۾ زمري ترضہ ۾ ست ڏينهن بادشاهي ڪئي. هاڻي ماڻهو جبتون جي سامهون منزل ڪري لٿا پيا هئا، جو فلستين جو شهر هو.

¹⁶ ۽ جيڪي ماڻهو لٿل هئا تن چوندو ٻڌو تہ زمريءَ منصوبو ڪيو آهي ۽ بادشاهہ کي ماريو بہ اٿس: تنهنڪري سڀني اسرائيلين اُنهيءَ ڏينهن لشڪرگاهہ ۾ سپهہ سالار عمريءَ کي اسرائيل تي بادشاهہ ڪيو.

¹⁷ ۽ عمري ساري اسرائيل کي ساڻ ڪري جبتون مان چڙهي ويو، ۽ وڃي ترضہ کي گهيرو ڪيائين.

¹⁸ ۽ هيئن ٿيو تہ جڏهن زمريءَ ڏٺو تہ شهر وٺجي ويو، تڏهن هو بادشاهہ جي گهر جي قلعي ۾ ويو، ۽ پنهنجي مٿان بادشاهہ جي گهر کي باهہ ڏيئي ساڙيائين، ۽ مري ويو.

¹⁹ ڇالاءِ جو هن خداوند جي نظر ۾ خراب ڪم ڪرڻ سان گناهہ ڪيا هئا، ۽ هو يربعام جي رستي تي هليو هو، ۽ اسرائيل کان گناهہ ڪرائڻ سان بہ گناهہ ڪيو هئائين.

²⁰ هاڻي زمريءَ جا باقي ٻيا ڪم ۽ جيڪا بغاوت هن ڪئي، سا اسرائيل جي بادشاهن جي تواريخ جي ڪتاب ۾ لکيل نہ آهي ڇا؟

²¹ تنهن کانپوءِ اسرائيل جي قوم ٻن فرقن ۾ ورهائجي ويئي: اڌ قوم تبني بن جينت جي پٺيان لڳي، انهيءَ لاءِ تہ هن کي بادشاهہ ڪن: ۽ اڌ عمريءَ جي پٺيان لڳي.

²² پر جيڪي ماڻهو عمريءَ جي پٺيان لڳا هئا سي انهن تي غالب آيا جي تبني بن جينت جي پٺيان لڳا هئا: انهيءَ طرح تبني مئو، ۽ عمري بادشاهہ ٿيو.

²³ يهوداہ جي بادشاهہ آسا جي ايڪٽيهين ورهيہ ۾ عمري اسرائيل جي مٿان بادشاهي ڪرڻ لڳو، ۽ هن ٻارهن ورهيہ بادشاهي ڪئي: ترضہ ۾ هن ڇهہ ورهيہ بادشاهي ڪئي.

²⁴ ۽ هن سمر کان چانديءَ جا ٻہ قنطار ڏيئي سامريہ جو ٽڪر خريد ڪيو؛ ۽ اُنهيءَ ٽڪر تي هن هڪڙو شهر اڏايو، ۽ جيڪو شهر اڏايائين اُنهيءَ تي اُنهيءَ ٽڪر جي مالڪ سمر جي نالي پٺيان سامريہ نالو رکيائين.

²⁵ ۽ عمريءَ اُهي ڪم ڪيا جي خداوند جي نظر ۾ خراب هئا، ۽ جيڪي ماڻهو کانئس اڳي هئا تن سڀني کان بڇڙي هلت ڪيائين.

²⁶ ڇالاءِ جو هو هر طرح يربعام بن نباط جي رستن تي هليو، ۽ اسرائيل کان گناهہ ڪرائڻ جو گناهہ ڪري، خداوند اسرائيل جي خدا کي اُنهن جي اجاين ڪمن سان ڪاوڙايائين.

²⁷ هاڻي عمريءَ ٻيا جيڪي ڪم ڪيا، ۽ جيڪا بهادري هن ڏيکاري، سا اسرائيل جي بادشاهن جي تواريخ جي ڪتاب ۾ لکيل نہ آهي ڇا؟

²⁸ نيٺ عمري وڃي پنهنجن ابن ڏاڏن سان سُتو ۽ سامريہ ۾ دفن ڪيو ويو: ۽ سندس پٽ اخي آب سندس جاءِ تي بادشاهہ ٿيو.

²⁹ ۽ يهوداہ جي بادشاهہ آسا جي اٺٽيهين ورهيہ ۾، اخي آب بن عمري اسرائيل تي بادشاهي ڪرڻ لڳو: ۽ اخي آب بن عمري اسرائيل تي سامريہ ۾ ٻاويهہ ورهيہ بادشاهي ڪئي.

³⁰ ۽ خداوند جي نظر ۾ اخي آب بن عمري، جيڪي ماڻهو کانئس اڳي هئا تن کان بہ وڌيڪ بڇڙا ڪم ڪيا.

³¹ ۽ هيئن ٿيو تہ ڄڻ يربعام بن نباط جي گناهن تي هلڻ هن کي هلڪي ڳالهہ نظر ٿي آئي، جو هن صيدونين جي بادشاهہ اتبعل جي ڌيءَ ايزبل سان شادي ڪئي، ۽ وڃي بعل جي خدمت ڪيائين، ۽ اُنهيءَ کي سجدو ڪيائين.

³² ۽ هن سامريہ ۾ جيڪو بعل جو مندر جوڙايو هو، تنهن ۾ بعل جي لاءِ هڪڙي قربانگاهہ ٺهرايائين.

³³ ۽ اخي آب يسيرت جوڙايو؛ ۽ اخي آب اڃا بہ ٻيا ڪم ڪيا جن سان خداوند اسرائيل جي خدا کي ايترو ڪاوڙايائين جيترو اسرائيل جي ٻين بادشاهن نہ ڪاوڙايو هو، جي کانئس اڳي ٿي گذريا هئا.

³⁴ هن جي ڏينهن ۾ حي ايل بيت ايليءَ يريحو اڏايو: هن پنهنجي پهريتي پٽ ابرام تي اُنهيءَ جو بنياد وڌو، ۽ پنهنجي سڀ کان ننڍي پٽ سجوب تي اُنهيءَ جا در بيهاريائين؛ جيئن ڪ خداوند يشوع بن نون جي معرفت ڪلام ڪيو هو.